WWW.TUNGZANGNEWS.COM

 
2014 Kawlgambup mi kisimna ah Minam min pulaak nading vai kikupna
TBCY Biakinn, December 30, 2013


Lungdamna
· ZCD makaihna tawh maikum National Census ah Zomi ci-in minam min pulak ciat ding theihsakna 
leh tangkona ah Tedim Kipawlna tangin thugen hun ngah kahihman lungdam ing.
Ngaihsut huai Thute Atom in Pulak kik pakna


· LST genna, leitung paizia, Kawlgam khuahun kihon laitak leh Zomite lungsim puakzia tawh 
kizawitawn in tulaitakin pilvang takin, “Thu tawh I teen mahmah ding akisap pen laitak hun hi” 
kaci nuam hi.


· Abeisa hun enkik pak lehang: 1886 January kha a kipan British colony i tun cil in ei Kawlgam leh 
India gam kikal mualtung a teengte in Zomite’ gegu, lai neilo, makai neilo ihih manin “Kuki, Chin, 
Lusei (Lushai)” in hong kiciamteh khamawkna min tawh tudong in hong kilo suaksuak hi. Chin 
pen Kawlte hong theihna leh hong min lawhna ahihi. Eite kuamah in ei kam ciatin “Chin” cih 
kammal a zang khat zong ki-om lo hi. Tu in gam lian thum sungah Zomite ikikhen thangta hi.


· 1947 Panglong Agreement leh Kawlgam First Constitution, 1974 2nd
Constitution leh 2008 3rd Constitution kigelh lai-in I min kilawhna tatak tawh kheelding i ngaihsun kha ban kei hi.


· 1953 kum in Zomi Baptist Convention kikhun lai-in ei min Zomi hihang cih Biakna makai masa 
lam khanglui mipil tangthu theite in amuhkhiat leh thukimna uh a om hangin Kumpi theihpih zah 
dongin kipulak kha ngeilo in Biakna lam leh ei Zogam bek ah kizang ahi hi. Kua mawhpuak ici ding 
hiam?


· 2012 May kha in ZNC party te vai tawh Election Commissionte in Kawlgam ah Zomi om kei uhteh 
hong cih uhteh Tedim Kipawlna in ki-ommawk theilo in, initiation lakna tawh Zomi ommah cih 
pulak nading meeting kisam, a thu kigeel, reference documents kizong in ZNC te min tawhin
Election Commission leh akisapna mun citengah akipuaktoh ciangin Phone tawh theihpihna May 
31, 2012 ni-in ZNC Makaipi tung ah akizaksak kikna pan Zomi ommah cih hong kikipsak kik bek 
hi. Lai tawh hong kipia hilo lai hi.


· I sanggam Lusei te in 1947 akipan in amin uh amau Kumpi tungah lai tawh na pulak den in 1967 in 
Mizo National Front min tawh phu in 1987 ciangin Mizo cih minlawhna (identity) tawh Mizo State
a ngahta uh hi.


· India gam lam ah om I sanggam laiguizomte in zong 1988 kum 1st World Zomi Convention, 1991
kum 2nd World Zomi Convention te pan thumuhna hangin tu in 3rd World Zomi Convention 
(October 25-27, 2013), Lamka ah Zomi min tawh ana kipumkhat khit ban uah Zomi leh Mizo
akhiatna kibang, pum khat hihang ci-in Zomi pen kampau/lai pau hi in Mizo pen la kammal hi 
nacita in na kipumkhat siamta uh hi. Kipumkhatna tawh na dingta uh hi.


· Tu-in ei Kawlgam ah mai 2014 March-April Kawlgam Census ah minam min utbang at theih ding 
akicih ciang ‘Zomi’ min mahtawh gelh ni aci ihi hi.


Zomi leh Chin min


· 1997 December in Lt.Col. Hla Min in “Political Situation Of Myanmar And Its Role In The Region” 
ci-in Office of Strategic Studies, Ministry of Defense, Union of Myanmar, (26th Edition October 
2000) sung ah Kawlgam mi bup nam giat a kithei toto kimlai 135 phasak in Composition of the 
Different Ethnic Groups under the 8 Major National Races in Myanmar sung Section D na sung ah 
ei Chin a hong kilote 53 tak hong phasak mawk hi.

· 2001 kum November kha in C. Thang Za Tuan, Deputy Director General, Department of Basic 
Education 1, Ministry of Education, Union of Myanmar i makaihna tawh Chin Historical Research 
Committee in “A Concise Study of Historical Facts of the Chin People and their Traditional 
Cultural Custom and Manners” cih laibu sungah Chin ci a hong kiciamtehte in ei leh ei kilawhna 
ahuamkim (Main Tribes) in nam 7 in: Asho, Cho, Khumi, Laimi, Matu, Mizo, Zomi ci-in 
ciaptehna neih ding kithukim hi. Tuate pen ei pau tektawh “Chin” cih tang a kizang ciat ahi hi.
(p.215) Tua laibu Kumpi phalna tawh in kithohkhia ahihi.


· 1990s kum nungsang akipan in Refugee leh Asylum hangin gamdang akizuat ciangin “Chin” cih 
mintawh Malaysia gam atungkha lak-ah advantage, benefit, help ala tuam pawlkhat hong omciang 
leh Zogam ah Chin National Front (CNF) ci-in gamsung beelte in ei Zomite hong thah, hong mat 
leh hen (kidnap), hong hih uh ciangin “Chin” min zang aa ei hong niilkhinte, hong simmawh pawl
tawh kithuhual theihding kikak phot suakkha hihang. ‘Chin’ cih min a kizadah pah hizaw lo-in Chin 
min tawh political advantage alapah nuamte tawh aki-uitui theilo hihang ci-in kei muhna hong pulak 
ing. Amau Laimi akici kimlai ‘Chinmi’ kici nuam sawnsawn uh hi.


2014 Census ah


· Zomi ahihkeh Zomi-Chin cih zat ding in hoih ding hi. Banghang hiam cihleh tuniciang dongin 
Kawlgam Constitution ah Chin State cih om in Zo State cih kiguang kha nailo ahihman hi. 
Minam = Zomi; Teenna mun= Chin State; I gam = Kawlgam (Myanmar) mah hi.


· Zomi icih ciang in pau kithei teng, kamphen kullo teng hihang. Ahizongin a nen asi in kei Simmi, 
Malmi: Dim, Khuano, Saizang, Sihzang, Tedim, Teizang, Thahdo, Vaiphei, Zote cihbangin… a
nennen in kici nuam sawnsawn lehang Kawlte in hong nopneh baih mahmah thei ding cih theihhuai, 
kidophuai, telhuai hi. Asho, Cho, Khumi, Matu, Laimi, ci-a kilote zong Zomi cih gensiam lehang a 
deih om tham hi.


· Township zui in miphazah etkak baih nading in hong pulak ing. 
Tedim Township = 87,251; Tonzang Township = 19,156; Cikha Township =10,320
Falam Township = 44,351; Rih Khuadar = 5,390; Hakha = 48,731
Thantlang = 51,164; Matupi = 39,556; Rezua = 13,500
Mindat = 39,871 Kanpalet = 19,049 Paletwa= 80,063
Avekpi gawm = 458,402
Source: ZOLUS Vol.13, 2009 p.134.


Thukhupna
Ei Zomi scholar, politician and leader ahi Dr. Vum Ko Hau in, “Tangtawng akipan in ko leh ko 
Zomi akici hi ung….Chin leh Kuki pen minam kibang ahi hi… Hua hunlai in Kuki cih kammal sangin 
Kawlgam, East Pakistan (Bangladesh) leh Assam gam a teeng sikhat sakhatte ahi Zomite in Zomi ci-in 
nakilopah hileh sawtpi peka kipan in min tawh buaibuai nonlo mah ding hivehang” naci ngeungau ngei 
hi, (History of the Zomi (Chin) Race in ‘Profile of a Burma Frontier Man’ p. 297-312).


Kipumkhat thei ding teng kipumkhat siamna tawh dingtangto zaw ding ut zaw maw 
(ahihkeh) kikhen taklo napi kikhenthang lailai in, puk zengzang zaw ding ut zaw maw cih 
teelding thu hita hi. Pilvang hun hi. Kipawlsiam hun hi. Dinkhop hun hong tungta cih telhuai hi.


“Abeisa hun in bangci in kimakaih cih na theihnopleh tuni in i khuasakzia en in. Mailam ah 
bangci khuasak ding cih na theihnop leh tuni in ikimakaihzia en in,” Lord Buddha.
Tuni in ei teeltheih hun ahih lai-in I min pulaak siam leh khuadaak siam in teelkhial nonlo in tua 
Zomi cih min khat tawh legalized sak zawh nading akisam bangin vantohtoh lai ding hizawta hi.


Pa C. Thang Za Tuan
Makaipi, Tedim Kipawlna, Yangon

 


Comments




Leave a Reply