WWW.TUNGZANGNEWS.COM

 
Zomi Sisanpihte,

Hun beisa-ah kahong suutzeel mahbang-in Zomi tuhun khang-tawh khingkhaina-ah pilehpu' khang, nulehpa' khang, nanglehkei' khang ci-in khangthum-a aki-et ciang-in pulehpa' khang-ah leitung siamsinna niam-in itna leh thumaan cihtakna lian-hi. Nulehpa' khang-ah itna leh thumaan cihtakna kiam-in leitung siamsinna lam-ah tawicinglo (disqualify) taleh akhan-in pawmkhan, pongkhan gawp-hi. Nulehpa' khanghun lungpuak-in nanglehkei' khanghun hong lawh (infected)-a, minam leh biakna limciitna susia mahmah-hi. Aziak/ahaang (reason/fact) ka' lungngai zeel-a, ahithei thute (probabilities) honkhat ka' muh lak-ah nengcik khat:

Nulehpate' khanghun pan-a hong kipattahna taangthute-in nanglehkei' khang naakpi-in hong susia-in ka-muhi. Taangthu akisin/ngaih ciang-in neihsiam taangpaal leh liapaal (actor and actress)-pen naupangte-in ciingpah, amau' lungpuakbang puaksawmpah, amau' gamtatbang tatsawmpah ahihziak-in akhangto minamte-in limhing (movie, video) abawl ciang-in ataangpi neihsiam taangpaal-in asiangtho lungsim-tawh luangkham-a mite hehpih, honkhia, huh, thumaan-ah dingkip cihte naakpi-in kibawl khia ziahziah-hi. Amau' tuplehngiim-pen khangthakte' lungsim-ah midang hehpih theihna, cimawh simmawhthuak (oppressed)te panpih nop nading, huhnop nading, thumaan nading deihna bulpi ahihi. Sumlehpaai leh hun tampi bei-in  gualnop movie maimai-pen apiicing company te-in bawl ngeilo uhhi.

Zomi Movie (limhing akibawl naailo) minthangpen leh akiza kimpen Gaal Ngam' Taangthu ahihi. Hihpen nulehpa' khang-a gamh/gou khat bang-in nanglehkei' khang-ah akisin ahihi. Ataangthu atom-in; Gaal Ngam-in pheisamh (gamdawi khebaai) akihtaak man-in Haang Saai akici Tawmi lawmbawl-a, kizawl (kilawmta) uhhi. Haang Saai-pen mihing lim-a akibawl sahaang (kaamkeii nam) hihtuak-hi. Ahizong-in "zawl (kinaaipih mahmah lawm ~ closed friend) hongneih ciang-in ama' sahaang lungsim-tawh kalsuan lo-in, azawlpa it mahmah-hi. Gaal Ngam-in ahihleh pheisamh kihtaak man-a alawmbawlpak ahihna tung-ah dingkip ahihman-in azawlpa itlo-hi. Kheem thapaai-a, agamh/gou manpha phuisam siamnateng guuksak laai-hi. Thamlo-in Haang Saai' ai (taanglaai-a aki thupisak mahmah, mikim' neihloh, Dahpa Khuang zahphial-a avaangnei dawi-ai) nangawn guuksak tazen-hi.

Haang Saai thumaan kingkeng-in azawlpa' cihcih um zahdong-in azawlpa a-it kimlaai, azawlpa neih-in kheem den-in aphuisam siamna leh ai khempeuh aguuk khit baan-ah atawpna-ah Haang Saai' khuapihteng naangawn-in sihlawh-hi. Amulkimhuai penpen-ah Haang Saai-in athuakzawh nawnloh zahdong ding-in lungsim kihhuaipi-tawh Gaal Ngam hong gamtat niloh man-in, "Mual-ah kituahleh Mual-ah, Guam-ah kituahleh Guam-ah kithatding" cih dongciang hongtung mawk-hi. Gaal Ngam-in kheemna-mah zangh zomto ahihman-in ama' lim bang-in milim khat bawl-in buuktau tung-ah taamngai (flute) muutsak hiauhiau-a, anuai-ah sô (ling/tuulzum) dawh-in abuuktau khuamteng geek (akitan dektak-a koih)-hi. Haang Saai-in naa salua mahmah ahihman-in lokhung pan-in bawh suk-a, buuktau puuk-in anuai-a tuulzumte-in Haang Saai sunlum-hi.

Hihzah-a lungsim kawi, azawlpa nangawn kheemkheemkheemkheem-in atawpna-ah athat Gaal Ngam-pen neihsiam taangpaal (minta, actor, hero) khat-in taangthu hong kihilh mawk-pen nanglehkei' khang-a khatlehkhat ki-kheemna, ki-hazaatna, ki-heekna, ki-paampaihna, kituambawlna, ei' supna honglawh hetlopi nangawn khatpeuh' genna ziak-a gimneihna leh elna-a kipan tualsung khantohna' ading lampi khempeuh akhaaktan, a-uihsak, asiasak ngaihsutna-in hong tuamcip ahi khadiam ci-in ka-lungngai zeel-hi. Hih Zomi Movie minthangpen Gaal Ngam' taangthu-in nulehpa' khang leh nanglehkei' khang naakpi-in hong thuzawh, hong vukcip ahih man-in akithutuakthei mahmahlo, lawmte khatpeuh akhangto, akilaamsaang pian khat omleh "phek" sa-a alehpan, asiatgen, apaampaih, anawlkhiin, a-elbawl thapaai kihi ding-in ka' ummawh-hi.

Gaal Ngam-pen a-om taktak-hiam, akiphuak taangthu mawkmawk-hiambel theikhang: awilo-lua mahmah kahih man-in ka' neulaai-in ka' Pa kadong-hi. Ama' hong genna-ah, "Thahdo min hi-in a-om taktakleh kilawm, apa Zau Haang hi-in gaalhaang mahmah ahihman-in atapa' min Gaal Ngam aphuak kici. Nuaisuk leh Tonkaai akici Zomite' daak ngaih mahmah, amanpha mahmah penzong Leeng (Meitei) Maangpa' kumpi huang pan-a ava la-kiik gaalhaang khat kici,…… (ka Pa' hong gen Zau Haang' thu akhong akhia-in tel laai-ing)." hongci sawnsawn-a, naakpi-in ka' lungnuam hetlo-hi, banghanghiam cihleh athumaan leh ameelmawl mekmek Haang Saai' thuakna (Zawl-aw, nang kong humna-in ka' neihteng ka' lamteng beita, ka' khuapih tuipihteng nangawn sita,…hih kammal) ziak-in danh thum ka' sinlaai hi-a, ka' khitui luang-hi. Banghang-in amah a-it mahmah lawmhoih khat hihbang-in kheemcip-in lehbawl dikdek laaizang-hiam ci-in naa kasa mahmah-hi.

Zomi akici-tawh akici nuamlo-tawh I' minam sung-ah tuni dongmah, maailam-ahzong hithei khalaai-in um-ing; Gaal Ngam lungsim tam cihtak-in tam-a, amah a-it, athumaan asanggampa/asisanpihpa' sepsateng akawino khat-tawh ama' angsung ading-a aheii khiaziau, ama' bawllohpi asisanpih khatpeuh' bawlsateng ama' bawl akisa ding-a lepziau, lawmta-mah, sisan khatpihmah, kikheem, kizuak, ki-heek, ki-el, atawpna-ah kigaalbawl; Gaal Ngam' khanghun laaibang hileh akithat takpiding zahdong lungpuak Zomite-in neimawk uhhi. Nangzong khat hikha mawhloding cihtheih ahihi. Thumaanna leh itna kimaaiguan nawnlo, "thumaante'n lawm ngahlo,.." cizawlaai, Pasian Pasian-lah cici vaanglak! Hihpen lungsim kawipilna-tawh kilepsiamna hi-a, Gaal Ngam pan-a akingah gamhsia/gousia khat-in ka-muhi.

Nanglehkei' khang-ah hih lungpuakzia siahuaipi kipletna pan-in suahtaak nading naakpi-in I-haanciam kuul dinghi. Spiderman Movie sung-ah neihsiam taangpaal anii-in tha apiakna-ah, "…… khatveivei I' lunggulhpen-zong I-khahsuah (give up) kisam-hi" acihleh Sai Kham Leik-in, "… tuplehngiimna ziak-in ngaihno nangawn a-nusia ngalliam om-e,…" acih mahbang-in, Gaal Ngam lungpuak-pen pilna khat, mi-zawhna khat-a I-sehna pan-in deihmahmah talehang I-khahsuah (give up) kuul ta-hi. Haang Saai lungpuak; alawm it mahmahpa-in kheemkheem taleh, aneihteng sut taleh it teeiteeiding, thumaan teeiteeiding cih lam-ah kihei tani! Haang Saai mihing-hiam sahaang-hiam theikhang, tua-thu thupi lo-hi, athupi-pen; a-it azawlpa-in simmawhna-tawh selnoh-in eengcih zeel-a, "keii" dektak zeelsaam napi, Gaal Ngam-in "I' ciamnuihna hi-e," cileh lungkim kiikpah lel-a, alawmpa it mahmah lelmawk-hi, hih' sang-a I' deihzawk lungsim omtuan dinghiam?

Zomi Movie Minthang Masapen "Gaal Ngam leh Haang Saai" taangthu ei' khang (adiak-in kum 40 nuaisiahte' hun)-ah anuai-a bang-in kilumlet tahi:

"Gaal Ngam-in amah a-it mahmah, a-ai teng angahna Haang Saai athah nading-in buuktau tung-ah amahbang milim bawl-a, Haang Saai' ai mah-tawh taamngai (flute) tumsak veuveu-hi. Haang Saai-in, "Ka' neihteng sumh khinzo, ka' khuapih tuipihteng si khinzo, ka' zawlpa si laailaaileh bang meetna omding-hiam?" ci-in paisan-hi. Gaal Ngam-in a-ai zat siamlo-in milim' tung-ah zanghkhin ahihman-in Khimpi' Nu-in va simh-a, suangtum lianpi-in valh cihthu Haang Saai-in azaak ciang-in, "Kei hihzah-a hong netumpa,.." cilo-in, "Ka' zawlpa ka-laplaai khaakleh,.." ci-in delhpah vingveng-hi. Suangtumpi-in Gaal Ngam akawng nuaisiah mancip khin-a, Haang Saai' ai-lah Gaal Ngam-in guuksak ahihman-in Haang Saai-in ahaanciam hang-in honkhia zo nawnlo-in Gaal Ngam hong si-hi. Haang Saai-in khitui naptui-tawh azawlpa' luang Ciimnuai-ah pua-in hoihtak-in guui-hi." 

Hong it lawmlehgual, mipih sapihte neektumsawm, lumlehsawm, heeksawm, tutkhiatsawm, amau' vawhsa an laaksawm, amau' lawhsa paak totsawm batsawm, amau' matsa vompi ngaltang ei'a bang-a aihna-a kipan akihhuai Gaal Ngam lungpuak I-ngai mahmah phial zong-in nusia tani! I' zawnleh I' zawnna bangbang-in, I' hauhleh I' hauhna bangbang-in, I' pilleh I' pilna bangbang-in, I' haiileh I' haiina bangbang-in, I' meel I' sa, I' bangkim ahibangbang-in ki-it siamding haanciam ciatni! Zomi pilehpute' ki-itna leh muanhuaina zongkiik tani! Hong sihgup theiding penglam gaalkaap khat leh nih neih man-in thumaan nusia peuhmah keini, banghanghiam cihleh thumaanthutak-in ZEISU hi-a, ZEISU nei minamte I-hihding lunggulh I-hih man-in I' sung-ah zuauthu, maai-et tuamna, simmawh tuamna, humtuam paihtuam cihte omlo-hi. Tua ZEISU ahi thumaanthutak-ah I-dinkip theih nading-in makaai-tawh kaailo-tawh I' vekpi-in naakpi-in thasaanding hihang!

Paunaak Laai Siangtho sung-ah, "Thumaanna-in minam tawisaang-hi" kici-a, tua Laai Siangtho-mah abulphuhte I-hih man-in, thumaan nading leh thumaanna it theih nading I-haanciam naakleh I' minam atawisaangte I-hi ding-a, tua thumaanthutak-in suahtaakna bucing hongpia dinghi. Nanglehkei' Khang-a thungaihsun thei khempeuh-in lungngai tahen! 

Zomi Pasian' Thupha!

Zokhai




 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 


Comments




Leave a Reply