WWW.TUNGZANGNEWS.COM

 
Ei tum ciatin ei san ciatah ciak ngeingai hang e, phual ngakte’n Kawl kumpi thuneite tung mahah i gen nop bang gena amau thuneite’n zong a hite a hi mah banga hong san’ theih kei leh i pu i pate in ‘tui sung pau‘, a cih bang lel ding hi.

Makai dinga i teelte mah in minam itna, veina takpi mah tawh kumpi thuneite tungah a gen uh kul ding hi. Kumpi thuneite’n, hi maw, ci-a hong sanga a hi banga ZOMI ci-a hong ciapteh mateng tui sung pau mah bang den lel ding hi hang. Ke’n hih lam zumah gen sawm ngei-a, Kawlgam pan ZOMI hong kicih masak kul ding hi, hong kici mawk a hih manin a din’ khawl hi ing. I ngaihsut peuh, i ut peuh internet khawngah i mantai simin kigelhgelh thei mah napi internet sunga committee tuamtuam i vaihawmhawm mah tawh kibang lel ding hi. Official recognition kisam hi hang.

Kumpite’n code number pia, ci-a khu lianga i gente zong, minam hi lo hi: Code number 39na-a Khawno, 45na-a Gwete (Guite), 46na-a Ngorn (Chin, Ngawn), 47na-a Zizan (Sizang), 49na-a Saing Zan, 53na-a Zo (Tedim), 56na-a Tiddim (Hai-Dim), 57na-a Tay-Zan, 61na-a Dim, hihte pe n minam tuam hi lo-in hihteng ka kigawm uh ciang ZOMI a kici hi ung, mah ci-a teltaka i gen ding kisam ding hi. Amau hong piak bangbang man’ khit pahpah ding hi lo hi. Mual suang tunga gelh banga laih theih nawn loh ding hi sam lo hi.

Spelling dong maha i gen ding kisam ding hi. Gentehna-in pawl khat in, Zo/mi, a hih kei leh Zo-mi, cih bang peuhin i minam min gelh sawm uh hi. Slash (/) leh hyphen (-) a kizatna i theih loh man hi ding hi.

Slash (/) pen “a hi kei leh” cihna-a a kizang hi. Gentehna-in, numei/pasal bang ci le’ng, numei a hih kei leh pasal, cihna hi-a, ei minam min pen ‘Zo a hih kei leh mi’ cih bang hi lo hi. Tua mah bangin America-a teng Zomite i gen nop ciangin Zomi-American ci-in a kibang lo nih nam khat i suah nop cianga a kizang a hihi. Tua ahih manin, i minam min Zo-mi ci-in gelh le’ng, nidanga a kibang ngei lo, Zo leh mi, nam khat a suah nuam tawh kibang ding hi hang. Ei gen nop pen Zogama teng minamte hi-a ZOMI ci-a gelh ding a hihi.

Zomin phuah tawh kibang lo hi. Zomite’n min i phuah ciangin a mal simin khiatna nei hi. Gentehna-in kei min bang, Ngin Hang hi-a, Ngin pen ka tappa, ka pano Dong Khua Ngin min nunung la-a ka nu ka pate’n min hong phuah a hihi. Hang leuleu ciangin ka pano-i hihna a genna uh hi-a gawm theih mawkmawk ding zong hi lo hi. Western min gelh dan zui nuam teu-a i min khawng i ut bang peuha gawm mawkmawk theih hi lo hi.

ZOMI a hih leh a kikhen thei ding hi lo hi.

13th century pek pana Chin hong kicih, tu donga Chin hong kicih theihna zong thu dang hi lo-in i pu i pate in phamawh sa lo mai uh a hi ding hiam? Kawlte cih bang bang a man sa-a nial theih ding ngaihsun lo kha uh a hi hiam? Amau cih bangbang a na man’ suksuk mana tu dong mah ut lopipi-in Chin (Lawh pua, bawm pua, peuh, deih kaih zuktak le’ng lawm), cihna peuh hi lawmlawma minam min hi sam lo hi.

Nidangin America-a sila-a a khawite uh simmawhna-in Negro kici hi. Abraham Lincoln in silate suahtakna a piak khit sawtpi dong mah negro kicici lai hi. A hi zongin amau negrote hong pil semsem uha, simmawhna tawh negro a kicih za nuam nawn lo uh hi. Negro hong ci nawn kei un, ci-in American kumpi tungah gen ngiat uh hi. American kumpi zong nampi kumpi a hih zah khatin, “Hi mah ei”, ci-in negro peuh mah America-ah kilo mengmeng nawn lo hi. Kilo kha tanghial leh zong minam simmaawh kici-in lungsim gina nei lo-in kigen pah lian uh hi. Tangthu tawh kizoma negro lawh nading khawng a om leh zong, negro tang cih nawn lo-in, a mal kipatna tawh, the “N” word, ci khilkhial bek tanghial ta uh hi. America-a teng Zomite na ut peuhin na ciak kha kei un. Negro khawng na lo ziahziah kha kei un. Mivomte’n hong za leh thah dingin zong hong deih lo ding uh hi.

Mipilte’n minam vai tua zahin thupi ngaihsut uh hi.

Visa vai-a American consulate-a consular general, Mr. Furst, ka thu zawh dikdekna zong tua thu mah hi. Makaite’n minam hong vei un la, kumpi thuneite tungah limtakin hong gen ta un. Tutung buang in pawh.

Rev. Eddie Ning Hang

Zomi Baptist Church

Nashville, Tennessee

U. S. A.

 


Comments




Leave a Reply