WWW.TUNGZANGNEWS.COM

 
Picture
Josept Herbert Cobe and Elizabeth S. Cope
Nelson tonu Memorial Service

1. Memorial service bawlni. December 30, 2013. 6:00pm pan 9:00pm. Monday.

2. Amun: 2010 Lexington Ave, Calvary Baptist Church, Roseville, MN.

3. Zomi palai a pai thei teng: 1. Tuang sukte, New Jersey; 2. Pastor Thawngpi, 3. Hau Za, le 4. tanu, Fort Wayne, IN; 5. Rev. Dr Tung Za Pau, 6. Pastor Don Ngaih Lian, Columbus, OH. Zogam bup, USA aa zomi te tang le leitung bup zomi te tang in a pai thei in ki ngaih sun ung ei. Topa min Siangtho ka phatphat uhhi. Pai taak mah mah hi. Ka lung uh kim giat hi.

4. St. Paul, MN pen Columbus, OH pan in 1550 miles round trip hi aa, 13 + 13 = 26 hours ki hawl hi. Minneasota weather pen minus four F (- 4F), hi mawk in snow le ice rain lak aa, khat vei ka pai na hi aa, lung hih mawh na tampi om hi. Thu ngen kawm kawm, car hawl kawm kawm cih dan hi in, adventure khat hi. Car heater full aa ka hon pen, window pua lam ice a bel te tui zo lo mawk uhhi. Chicago Zomi Community Church ah Sunday sermon na ka nei man hi. Wheaton aa Cingno te inn ah zan nih taam thei ung. Nong thunget sak nate, lung dam hi.

5. Lois le Paul Myers te nupa, han mual pan in, service mun hong zuat uh ciang in lam bo uh a hih man in service hun nai nih sung ki sawtto hi. Tonu kha in maan hi in cia ci uh hi. Ei zomite in Zogam aa le USA aa hun ih ze kai dan peuh tawh ki hual phial kik hi. Han mual ah a pai thei teng le a ki phal teng pen Pastor pa le Nelson tonu tanu teng thum le a pasal te ciat, (Lois and Paul Myers; Karen and Barnet Cox; Phyliss and Earl Scharnick) mi gawm sagih bek hi uhhi.

6. Nelson tonu min pen Phileda O. Nelson hi in swiss minam a hihi.

7. ZCMF, USA condolence laikhak, Lois Myers ka pia hi.

8. Rev Dr Tung Pau te innkuan in Personal eulogy screen frame kopthum Lois, Karen, Phyliss te khat ta pia uhhi.

9. Zogam pan in zong it le ngaih honpi khat in email tawh dahpih na laite khak uhhi.

10. Nelson tonu thu a ki gen teng A pan Z dong, ka lai kung pan kong gel kik nuam hi. A. Tonu pen ki mawlna khat peuh peuh ah a zawh mateng in han ciam hi. B. Mite Mawhmai sak lo in om thei lo hi. C. Christmas Cards khak lo in om thei lo hi. Birthday card khak bel mahmah hi. D. Mi pen a min in theih sawm aa, min mah tawh lim tak in hopih siam hi. Nursing home aa nasem te a vek pi aa a min thei hi. E. Nelson topa khual zit hun sung in amah bek a om hun tam mah mah aa, meet bawl siam hi, hun manage siam hi. F. Nelson topa nung ah tha khauh tak in a pasal nasep te lim huh zo mah mah hi. G. Zomi te zah aa, ka lungsim bup uh tawh ka it uh minam, leitung bup ah om lo hi. H. Tu hunkhang aa, iphone, ipad, email te zat siam mah mah lai hi. I. Thunget hat mi hi aa, a min mah lo ciatciat aa thu ngen den nuam hi. J. Church bulletin aa min te en aa, a om na peuh peuh pan in thu ngen den hi. K. Thu khen sat ding hak sa pipi, baih no aa khen siam hi. Eg. Nursing home om ding bang US mite in khitui naptui tawh khen sat zel hi na pi in, tonu in baih sa lel mawk hi. L. Thu don ngiat hi. Mite phat tuam na ding thu khual hi. Pilna hil hil hi. Lai hilsiam hi. Khut siam na tuam tuam te hil sawn hi. M. Mi a muh peuh peuh tung ah Jesuh hong hot khiat na thu gen den hi. N. Topa Jesuh lung dam sak den ding pen a legacy hi. O. Mi khem peuh tawh ki lem ding han ciam aa, mi khem peuh in it mahmah uhhi. P. Liang ko ki kim aa hopih den nuam hi. Q. Hong nusiat ni in mi khempeuh kap uhhi. R. A laitah ding nai li sung sawt aa, tau nuam vet lo hi. Khuaimei mit bang in dam dam in mit hi. Lois le Karen te om uhhi. S. A sih ding hun thei khol tawh kibang hi. T. Na hoih sep na ah tha dah ngei lo hi. U. Zin do hah kat hi. V. Lai gel siam hi. W. Lung dam den hi. X. A tek dong mah lung pil vang hi. A cidam, a hate hoih lai, a mit mial lo hi. Y. Zomi 120 in Norton ah hong hawh uh aa, love gift tam pi le zo ngeina vante hong puak uhhi. Z. Zomi khat ka hi hi. Zomi ta ding ka nungta hi. Zomi ta ding thu ka nget sak hi.

11. Khat vei Norton, KS, a om na mun ah ka zi, Pastor Don Ngaih Lian tawh ka hawh uhhi. Zomi te zah aa ka it uh, ka lung sim bup ka piak theih uh minam leitung buppi ah om lo hi ci mawk hi. Khat vei leu leu, Nelson tonu in thu lam dang pi khat gen mawk hi. Bang hang hiam thei zo keng. “Van tung ka tun ciang in Lian Khen, ka zong masa pen ding hi”. Pu Lian Khen pen nguite beh hi aa, sangmang te tawh kum 12 sung ki khawl aa, an huanbuk ah, an lim mah mah ni sim aa an huan sak den pa a hi hi. Gospel pai na khawng ah zong a zui den pa a hihi. A zi le a tate te Tedim ah om uhhi. Lian Khen tute khat Lianpi pen, tu lai tak in Thailand Queen College ah Senior Professor sem hi. Lianpi pen pil mah mah ci uh hi.

12. Missionaries te in Zomi te hong it zah in ken ka mipih te ka it hiam? Lai ka hil mite ka it hiam? Sermon le crusade ka bawl pih mite ka it zo takpi hiam? Zomi te ka it zah in Zomi lote ka it zo hiam? ci in kei le kei dot na tam pi ka nei hi. Tua zah aa zomi te hong it aa, Tedim khuapi sung ah kum 12 (1939-1951) bang hong teng in, zo an ne aa, zo tui dawn aa, zopau a pau mi khat memorial service pai loh ding in ka ngaih sun ngam kei hi. Zong ka ngaihsun vet kei hi. Khua hun vot in hong len zo lo hi. Sum neih loh na in hong khaktan zo lo hi. Hun awng ngah loh na in hong zekai sak zo lo hi. A luang hawm om loh na in ka ngaihsut nate lum let zo lo hi. Hong nawng kai sak zo ding thu khat zong omlo hi. Zogam hong tun theih na ding in kha guk sung bang tuipi tung ah ki lawk suk ki lawk to phot uhhi. America pan Zogam pen tai 15500 miles gam la hi. Columbus pan St. Paul pen ciah le kuan 1550 miles bek gam la hi. O, Topa na mizat nu, a nun tak na liimcii mah si ee! Pam maih mah si ee maw, (Ps. 116:15). Ko zomite ham pha mah si ung ee. Topa Jesuh, mit aa muh mah tawh ki bang hi lo maw. Thu um masa pupa te makai siam ding sangmang te Pasian in hun lap aa hong vai hawm sak a hih na kaphawk sansan hi. Missionaries te a om loh ciang aa thu um mite a mang thang loh na ding cihna hi. Zomi te pen Muslim maw, Buddhist maw, Mormon maw, Hindu maw, Commnunist maw, atheist maw zong ki suak thei lua hi. Africa gam pawl khat bang aa tualgal a veng nai lo hi thei lua hi. Gospel in ganhing a bang Zotate mi hong suak sak aa, Pasian hong suak sak hi lo maw!

13. A pai kha thei teng Tuang, Thawngpi te innkuan tawh ko nupa bel lung kim mahmah ung. Pasian thupha lian pi mah in ka ngaih sun uhhi. Inn teek te Lois le Paul Mayers, Karen le Barnet Cox, Phyliss le Earl Scharnick te le a tute 11, tu sawn te 34 bang ang tang mah mah uhhi. Zopuan sil ka hih uh ciang aa, zomi hihna thei pah lel uh hi. A tute, tu sawn te bang in hong lim hopih uhhi. Cik ciang in Zogam nong hawh ding uh hiam ka ci uh le, hun hoih khat ciang pen ka sawm mah uhhi, ci ciat uh hi. Tun hun hoih ding ki pan ta hi. Tedim khua pi dong ki pai thei ta hi cih zong tha ka pia uhhi.

14. Lois kiang ah, ko pen chin ki ci lo, zomi ki ci ung ei, ka cih le thei mah veng aw, ka kam ah ki khel thei vat lo zel hi veh aw, ci-hi. Pupa te Zomi kam mal lim taka a na hil lo uhhi. Mawh sak na bel hi tuan sam kei. Zomi te political ideal din mun ka cih nopna hi zaw.

15. Service aa hong pai mi 100 bang hi uh aa, a vek pi phial aa, Phileda le Franklin Nelsons te sisan ki zop pih mite, nasep pih mite, missionaries, American Baptist Convention aa ministers, beh le phung te lawm hoih te a hi uhhi. Nelson topa bang Executive Secretary for the Board of World Missions for the Baptist General Conference ah le Church Pastor aa 1975 dong sem lai hi.

16. Nelson tonu bang zogam hong pai ma in, Master’s Degree in Education from National College of Education in Evanston, Illinois ah na sin masa hi. Kha thu bek hi lo in, leitung pilna sin na ah sang pi mah na ki ging khol hi. A pil te mah Topa in nasia tak a a zang cih ki mu thei hi. A siam te mah in mui bun pah hi. A ki ging khol te pen tam khial lo zaw deuh hi. Lungtang phate suang ciip bang in Gospel aa ding in citak mah mah uh hi. Ngaihsun siam leng sau vei ki khom zaw hi.

17. Nelson tonu mopuan pi tawh church ah decoration, zepna bawl aa, Lois te unau lung kim mah mah uhhi. Lois le Karen te in thu gen na nei in, Phyliss in Piano tum hi. A tute tate in thu gen hun nei, choir nei, solo nei uhhi. Khitui luang nawn lo in et lawm mah mah uhhi.

18. Service man siang khit ciang in, nitak ankuang um khopna ka nei uhhi.

Ka lung dam hi. Topa thupha maw.


Rev. Dr Tung Za Pau le Pastor Don Ngaih Lian
Columbus, OH. 614-824-5582 (Home phone); January 01, 2014.

 


Comments




Leave a Reply