WWW.TUNGZANGNEWS.COM

 
Mun tuamtuam a om u le naute teng aw, I om na ciat pan lungdambawl hun te nuam takin I zang thei tek hia. 
Kei zong lungdambawl hun pen Tedim ah na mang thei ing.

27 December 2013 ni in gullu vai a diangdiang pawlkhat le siamsin makai pawlkhat tawh Rih bual ah thathak lakna, nasepna sate et kikna, thanemna thahatnate ki sittelna, mailamkalsuanzia ding kikupna le mapanzia dinmun laknate et kikna na nei thei ung. Hih vai pen ei sung thu dan hi lel ahih manin groupmail ah khah loh ding dan in ka ngahsut hi napi media tuamtuamte in nak lunglut mahmah bilbel uh a, interview ong ki bawl ngekngek ahih manin lai ong gelh
kik ka hi hi.

Dinmun etkikna le tangkona

Hih thathaklakna ah mi 12 kipha hi. Rih bual gei ah singkung lim nuai, lopa tungah tu in thu kikupna nasia takin na nei thei ung. Tua tungtawnin Zogam leisung sumpiang kempawlte dinmun etkikna le tangkona nam 3 na nei thei ung.

Dinpih thu

I neihsa gamh ( innmun logam, mual le guam, singkunglo le leitung leinuai a om sum gilte) le khantohna ding nasepnate adingin a kisampi pen ahi thukhunpi ( upadi )te tualsuakmite nuntakzia siksan in leitung vannuai gam tuamtuamte paizia tawh kituakin ong piankhiat mengmeng nading. Tua bang thukhunpite hoihtakin a kizat theih mateng Zogam leisung sumpiang kempawlin thuman thutak lamah hih theihna bangbang
tawh kiding vinven ding hi.

Tangkona

1. I neihsa gamh ( mun le mual, mual le guam, singkunglo le leitung leinuai a om sum gilte) le gam khantohna ding nasepnate ah Zogam leisung sumpiang kempawl in thuman thutak a om theihna dingin thuman thutak adeih khempeuh tawh khut kilen in ma kipang khawm ding hi.

2 “Leisung sumpiang tawhkhiatna nasepnate ah mipi theihtang ding thute theihsakna ding mapanna” ahi EITI ( Extractive Industry Transparency Initiative ) ah pawllut dingin kawlgam in a hanciamna pen lungdam in
tha ka ngah mahmah uh hi.

3. Gam khantohna ding cih thulu tawh Zogam sungah Gullu nickel project, Kaladan project a kipan project tuamtuamte khempeuh zong leitung vannuai in a santheih thukhunpite a om khit banah mipite in
tua thukhunpite muantak suantak hi ci in a ngaihsut zawh hun ciang bekin project tuamtuamte kipan pan dingin lunggulhna kinei hi. hih bangin tangkona le dinmun pulakna na nei thei ung cih bangin tangko na na nei thei ung.

Suang kizuak vai

Thu kizom lo khat in gen to leng tu laitak Gullu mual tunga suangte a tawi in kizuak ziahziah hi. Hih vai pen 13 Oct 2013 ni laikhah sungah kim takin gelh khin I hih manin a tuamin gelh kik nawn kei ni. Suangtum tawi khat a tawm pen 2500 pan 90,000 kim in kilei ta hi. Gullu nickel project vai tawh kisi khop mahmah I hih manin tua vai
deihbangin kigamtang zo lo hi.

Tua ban ah mualbul kim a om khuamite lokuan singpuak tang hi lel a, khuahun le singkung lopate nasia takin susia zo pak ken in teh cih thu tuamtuam ban ah a mapang zo ding kipawlna tuamtuam zong om khin cih khat tawh zong kingaihmuang lel hi.

Ahi zongin tu in tua suang kizuak vai pen mualbul kim a khuamite’ gamvakna ciang hi nawn loin sak le khang pan kikuan in tangzai takin kisem ta hi. Ahi zongin hih vai ah kician takin ma a pang ki om thei pak nailo ahih manin ei pawlpawl in hih zawh zahzah tawh thuhoih pen le a kilawm ding bangin na a kisep theihna dingin lunggulhna kinei hi.

Tua hi a hih vai ah a kilawm kituak ding bangin thu le la ong pai theihna ding mapanna kalkhat suanna dingin kawlgam media tuamtuamte ah tu ni a kipan na tangko kawikawi leuleu ung. Hih vai ah I ma pan zia
ding ngaihsutna le lampi hoihnonote kihilhsawn in ma pang khawm pha leuleu dih ni.

Tu kum sung tawntung akua maciat in ma I pankhopna hangin gullu nickel
vai bek hilo, Paha mual vai, lennupa vai, thangdung vai le singgial
tangdung,…,cihte akipan Zogam sunga project tuamtuamte ah ong kihai
bawl nawn loin tu ciangciang a kinang toto zo suak ahi hi. I hih
theihna ciat tawh I hanciamnate khempeuh i biak Pa Pasian in ong
thukimpih ahih manin I lung a dam mahmah hi.

Tu kum lungdambawl le kumthak ah Zomite in pawilianpite bawl in I
gualnop mah bangin “ Etlawm mualkuam Zogam nuam” sunga mual le guam,
singkung lopa le nuntakna nei khempeuhte in zong lungdambawl le
kumthak thuphate a san kim theihna dingin hanciam ciat ni.

Liantuang
Tedim ( 09 400511757 )

 


Comments




Leave a Reply