WWW.TUNGZANGNEWS.COM

 
Tedim-bel thupi mah-hi, "thuneu" aci omlopi, tuazah liang-a uanggen gawpna-in I' tualniamna honglak leltak-hi, ahoihbek-khat kisam-hi. Tedim thupi lawmlawm-a Pu Kaam Hau nana gualhuai mahmah hileh, Dimlo, Saaizaang, Tualzaang, Gawng, Laamzaang, Laailui, Laailo, Taaklaam, Sezaang- cbt banghang-in guunpi gaalkhat hilo pi-a kituamsaat sese ahitam? Guun gaallam gen naaikeng!!!!


Khua khat bulphuh-in "khuapi neihsun" ci-in aki uanglaak luat man-in tuni ciang akibuai ahihi. Tumahmah-a Laai Siangtho-zong "Zomi" kicih kawmkawm mah-in "Tiddim Chin" kici velval-a, hihte minam sukham guu/ling ahihlam kithei lo-hi. Pa Khoi Lam Thang tepawl mah-in hong puahphat hi-a, "Tiddim Chin" mah hongtuang viuveu-hi. Tedim Chin kammal-pen Kawlte'n Tii-ting Chin, Haka Chin, Falam Chin ci-a hong bulhtawm-uh hi-a, amau' vaaibel theikhang, Zomi lampang-ah pupate' laphuah khempeuh-in tua kammal nei ngeilo-hi. "Dimtui tual-ah.,, Dimtui Vaangkhua,…" cihte akiza zeuhzeuh-pen Pu Kaam Hau' ma-a Dimpi Khua akiphuah ahihi.

Minam vaai-ah:

Zomi paukam-ah ataangpi lawhna pan-in Tedim, Tedimte cihkhat a-ommah ahihi. Laaitui, Laaituite cihzong om-hi. "-te" cihpen Khua min zom-in akilo-ciat, akisamciat bekmah hi-a, "minam" min-tawh kisai kilkello ahihna thei unla, mawk ciakciak nawnkei tapeuh-un. "Laaitui Minam" cihkhat hong gingleh "haiivaai"-in kiseh ding-a, tua-tawh akibang liinlianpen "Tedimmi" minam min-a sehna ahihi. Zumhuai mahmah ahihman-in upmawhthu-peuh uanggen sukgawp nawnlohding kisam-hi, minam phatuam sak peuhmahlo, nawngkaai sakbek-in mu-ing.

Khaudang pan-a Tedim saangkahte' gen thu-ah "ahiding mah-hi" aci om-a, "haiivaai" mahmah cihna ahihi. Laaitui-ah khuadang pan-in saang hong kahte Pasian' thupha-tawh sanggam bang-in bawl thei-ing. Simmawh, zahko atuak khaak-a, agei naai-ah ka-omleh khuadang saangnaupangte apanpih, ahonkhia, agumpa kahihi. 1990 masiah kum 5 sungbang khuadang sanggam tampi ka-nei man-hi. Tedim-ah Saangpi No 2 na-ah ka-kah ciang-in simmawhna-tawh ka' awsuah (Dim awsuah) hong kiciing vial-a, ka' zial sukpah-hi.

Lawibual-ah aphungcing sanggamte-tawh kithuahkha ahihman-in "Laaitui" cihkhat-tawh hong engbawl, simmawhbawl mite ka' baanvuak-hi. Tua-a kipan "Laaituite" kicihding kilau nawnlo tuam-hi. Tedimte naakpi-in (avekpi hilo, khuata mite aniammuh mihaii tebek) zumhuai-hi. Ui-in amah akihta mite hap-in nà-a, ama' kihtaakte' maai-ah meikhup-a apai khekhe-tawh kisuun kasa leltak-hi. Lawibual-ah kibual kha kahihman-in Leiluum gaal-zong ka' tuak-a, Khuukpi (Myoma) gaalzong ka' tuak-hi. Awlmawh neilo-in ka-phu gawp-hi. Khuata mite etniam pongmawk-pen tualniamna leh tatsiatna akihhuai penpen tua Tedimte-in nei uhhi. Zumhuai lua mahmahlel-hi.

Zomite alom-in atampen ateenna ahih ziak-in Zogam Khuapi khat ahihna ciang-tawh tua mite' social standard of living khangkhaan nading, namtom lungsim-tawh khuata mite-khawng simmawhbawl loh nading, laaisiam tamtampi pung-a, khuapi-tawh kituak "khuapi lungpuak" neihtheih nading-a tawsawnna naakpi-a malaak ding cihte longal a-uangsan gawp-a mawk ciakciakding minam hong sukham peelmawhding ahihlam theihding ahihi.

Ka' muhlehtuah (experience) khat: 1982-84 sungteng Khuukpi Veeng, Pi Maan Cin te' inn-gei, Bu Zel Man te' inn sakdeuh, Pu Son Cin Lian te' inn khangzek, Laisiam Pu En Lam Cin te' innnuai sawnte ahi Pa Zaam Pau te' inn saap-in ka' Pa Evangelist ahih ziak-in ka-om uhhi. Ka' suaklu hongki sut-a, neektheih limlim ka' vaakkhiat pihleh hong kisut-hi. Hongki vua-a, hongki cilphih-hi. Tua hun-in Seente Kiam Shi, Kiam Kun te phungteng-in ka' Pa it ahihman-in honghong/gum mahmah uhhi. Hong pahtaakna-uh ka' Pa' kiang-ah suut zeel-a, ka' mangngilh ngeikei-hi. 1990 Kum kiteelna hun-in C. Ving Ciu-in NLD-tawh kuangluui-a, ka' neu laai-a hong itbawl mahmahte' lak-ah khat nana-hi ahihman-in it-in, thupi kasa mahmah-hi.

Tedimte thupikei cihna-zong hipah saamkei, thu khatpeuhpeuh a-uanglua-a akisuut niloh ciang-in kiimlehpaam heet kha thei-a, akilawmlo "minam" min nangawn sukha toden ahihziak-in "ahoihbek khatmaw" cih kammal-ah ciahkiik photding kisam-hi. Mipil milian-a I-sehpipi te khawng-in ahilo lualiang laaigelhna-peuh nong neih-uh ciang-in gendingbang thei paklo liang-in ki-omthei ahihman-in adiak-in 2014 Census -ah Zomi vaai asukha theiding thute hong phulaamsak nawnkei tapeuh un!

Zomi Pasian' Thupha!

Zokhai


*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560 
***********************************************

 


Comments




Leave a Reply