WWW.TUNGZANGNEWS.COM

 
Leitungah mihingte ahunzui-in gamvai, minamvai, biaknavai le mimalvai cihte ah buaina omthei zelzel hi. Tua sungah Zomite' buaina le Kawlgamsung buaina, Thailand le gamtuamtuam buainate i-ettak ciangin, ngaihsutna lungtangte hong sukha thu pawlkhat hangin, hih lai hongkhak ing.

Kawlkumpi' Buaina: 


Abeisa kumtampi sungah galkap' ukcipna tawh Kawlgam kikalsuan toto himah leh, tutadih in Democracy lampi khat kisialkhin ahihna hangin, masuan anei tulaitak kumpite in 2015 election ah mipi mitsuatna lunggulh uh ahih manin, U Thein Sein le thuneite' thusiamna tawh kawlgam sung thongkiami (Prisoners) 13,274 vilvel suahtakna pia giap uhi. Tua banah thahlup dinga kimante khantawn thong, khantawn thongkia dingte le kum 40 val kia dingte kum 40 ah khiapsak in, mipite' haksatna nakpitak in hong huhna uh kimukhia thei hi. (Source: Bangkokpost)


Daw Aung San Suu Kyi Buaina:
 
Leitungbup in pakta in Doctorate Degree bekbek 35 bang hong piaksak uh Daw Suu pen 2015 election ah President ngahnuam in, Ui meikang abat laitak ahihi. Tua munah President angah theih nadingin, 2008 Constitution pawlkhat puahphat ding kisam a, tua adingin, buai mahmah hi.
Thailand gamsung Buaina:

Leitungbup in maingat a, ilunglut Thailand gamzong tulaitak in nakpitak in abuai laitak uh ahihi. Prime Minister nu in, Asanggampa suahtaksak sawm miau ahih manin, alungkimlo Thai gammite zong Ui meikang mah bangin ki pei valval uhi. Bangkok khuapi sung leh amunmun panin, gamlum mahmah uh a, sihna dongah thusia lasia kisuah ziahziah uh ahihna kimu khia hi.

Zomite' Buaina:

Mite vandawn ah lengin Khapi le aksi  tung nangawn ah akah laitak un, ei Zomite pen minamvai in ei tapkual ah ibuai mahmah hi. Hunkhat lai-in, Dr. Vum Khua Hau le Dr. Vum Son cihte pawlin Zomi a itna uh Laibu thupi nono in nabawlkhia uh a, Zomi le Zogam adingin ahih theih tawp in na sem uhi. Amau pen Siyin kici Sihzang kual sunga piang Zomi ahi uhi. Zomi sungah makai dinmun alazo mi thupite ahi uhi. Zomi a it taktak dinga kilawm pen Sihzang (Siyin) kual sunga om mipawlte ihihi. Tua ahih manin, Zomi ihihna pen Sihzang khawngtawh ilaih loh ding kisam hi.

Ngeina, khanggui, pau le ham, sisan le satak kibang gigu Pu Zo sung pan khangsawnte mihing ihihna tawh Zomi ci-a minam minpua sungah Zo cih bangin tuam dindin ding hinawnlo hi. Tuhun pen Zomi sungah tuibang iluankhop hunta hi. Khangtangthu te sut ding akisap banah tulai Kawlgamsung minamvai ah akisam mahmah ei Zosuan sunga pau le ham, ngeina kibangteng pen Zomi ah kigawm khawm in tuibang iluankhop hunta hi. Namdangte vandawn ah leng teuteu ta uh a, ei Zomite pen munmin, khuamin, behmin le namneu lungsim tawh tapkual buai ah buai in, Ui meikang ibat laitak ahihi.

2014 Census ah Zomi tawh idinkhop ding thupi a, gamsung minam nasem tenzong kumpi' tungah amanlang thei penin, thu le la kisambang na sepsuah dinguh zong iki tawsawn hi. Takkheh Zomi!
Takkheh 2014 ah Zomi!

Dal Sian Hung
Kuala Lumpur, Malaysia.
 


Comments




Leave a Reply