WWW.TUNGZANGNEWS.COM

 
Tukum 2014 sung March kha pan April kha kikal teng Kawlgam ah milip simna(Census) omding in leitung mun tuamtuam ah thang vengvungh hi. Hih hunah mi tampi tak-in a minam hih na maan uh gelhding in hanciam ciat uha, gamdang a tungsate zong hih milip simna hunsung Kawlgam ah aciahsawm mi pawlkhat om uh hi. Hihte lak ah Zomite zong khat in ki helkha hileng kilawm hi.


Thu kizak tuamtuam I sim, I ngaihciang in Kawlgam ah minam khat a zong, ni dangin I zak ngeinai loh tusawngteng bek a, I zak Rohingya te bang amau minam min mah gelh ngiatding sawm uh hi. Chin Sate sung aom Cho leh Khomi te bang zong ei Zomite dan mah a, Chin zang loin amau minam hih na Cho leh Khomi min tawh a minam min uh gelhngiat dingin ki thukim khinta uha, Kawlgamsung thu kizakna tuamtuam ah zong suahkhinta uh hi. Khumite bang maikha ah Khawmpi thupi tak in neihsawm uh hi. UN te milip simna ah mi 55000 ciangin minam khat, gamkhat in nasim uh cih thu mi tampi tak in I theihsak I zaksa ciat ahi hi. Vatican gam bang agol na 0.4sq.km hi-a, milip vekpi 800 ahi hi. Singapore gam bang a golna 616.3sq.km hilel hi. Zogam sangin neizaw tham hi. Tedim leh Tonzang gam cia zong pha zolo hi.

Hih thu te I ngaihsut teh Zogam in suahtak na hong ngah kik a, leitungin Zogam hong theihpih, hong ciapteh ding I ut takpi leh tukum Kawlgam milip simna ah Zomi kicih hong kulpah hi. Zomi ci ngamlo a, Chin peuh , Zomi Chin, Chin Zomi leh a tuamtuam peuh Zomilo min dang khat peuh I gelh khak leh Zogam in suahtakna ngah ngeikei hen, minamdangte khutsung ah Zogam leh Zomite omden hen aci I hipah hi. Mangkang te’n leitungbup hong uk laitak in Zogam zong aki helkha hi-a, amau I hong ukma in I pu I pate Zogam ah suakta tak-in kuama ukna khutnuai omlo in nuam nasa mahmah uh hi. Mangkang te’ khut sungpan in suahtakna I pu I pa te’n Kawlte tawh na ngenkhawmkha uha, Kawl te’n lah suahtakna I ngah khitteh a kamciam uh pelin tuni tan amau ukna nuai-ah Zogam le Zomite banah Kachin, Shan, Karen leh a tuamtuam hong koihcip uh hi. Tu-in Kawlgam ki ukna ah Democracy huih hong nungpian hiauhiauta ahih manin mailam ding, saupi ngaihsun in I ki ginkholh theih bangbangin I ki ginkholh akul mahmah hun laitak ahi hi. Mi namdangte khutnuai ah I omnop nawnkei leh.

Mipawlkhat te’n Zomi ki cileng I hamphatna ding bangmah omlo, Zomi State, Zogam cih zong kua mah in hong theihpihlo ci mawk uh hi. Khasiat huai hi. Hici bang lungsimnei Zomi sungah I om pen, u te nau te hih pen sila lungsim hi. Chirstian lungsim hilo hi. Duhhopna huaihamna lungsim hi. Aman lopi a ngahnopna lungsim tawh kibang hi. Ei Zomite 90% Christian I kici hi. Christian takpi I hih leh I hihna thumaan genngam sepngam ding ahi hi. I pu I pa te’n lai ana theihma, ana zatma un Chin cih kammal himhim a na zatna uh om kilkello hi. Zomi cih leuleu pen tuni dong, la a, I saksak hi-a, minamdangte theih dingin I gelhngam, I zatngamkei leh abeisa a, I la saksakte pawl sakngam huai nawnlo ding hi. Pasian muhna pan zong hong zumuai mahmah ding hi.

Tua hi-a, Zomi kici ni I cih ciangin I hihna maan leitungbup theih in agen nuam, a zangnuam I hi hi. I lawmdangte I veng I pamte I muhdan man hilo hi. CNA/CNF te I muhdah man hilo hi. Manipur leh Mizo gam aom I mipihte Zomi cih ding naki minkhin mahmahta uh hi. Na zangzangta uh hi. Mi namkhat unau khat I hih manin Chin peuh kicileng minamdang te’n unau khat in hong simtheilo ding uha, mailam ah na lianpi zong I semkhawm theikei ding hi. Leitungbup in Zomi ci-a, hong theihding leh Zogam leitang in suahtakna a ngahding pen tulai tak-a, Kawlte khutsung aom Zomite lak ah om pen hi. Kawlgam aom Zomite aw, Zogam in suahtakna angah ding na ut takpi hiam? Na ut takpi leh tukum Kawlgam milip simna ah na min Zomi naci hamtang in. Tua hi leh a banban in hong paitoto ding hi. Kakam in Zomi ci-in, thu leh la in genin sa-in, la tampipi ka phuah hang, laibu tampipi kagelh hang, mi namdangte lak-ah ka zatngam kei leh Sawltak Paul in I Cor 13 sungah itna ka neih kei leh a bilaphuai zam le daltuah kituam tawh ki bang lel hi, acih tawh I ki bang lel ding hi.

Tu-in Zomi sungah I muan I suanpi I minam makai ZCD leh GZA te’n Zomi kicih ding hong khensat khinta uh ahih manin bangci bangin Zomi bup tungah aki zelh nading, maa-lakhawm, panlakhawm ding I hi hiam cih lamsang ki kumkumta leng ka ut hi. Bang hang hiam cih leh hih pen Party vai, biaknavai bek hilo in mi nambup vai ahi hi. Kei mimal ngaihsutna ah pan I lak danding:-

1.Census ma-in I biakna tek-ah Pastor Conference or Khawmpi neizo in Pastorte leh thugen peuhmah in biak-inn sung leh mipi kikaih khopna ah Zomi min gelhding hanthawn tek ni.

2. Hausa leh Khuasung makai te’n zong I veng I pamtek zawhsawm ni.

3. ZYA leh Khuakim a khangno ki pawlna, numei ki pawlnate leh ki pawlna khempeuh ah makai te’n ki thu minin hile hang I sepdan zong hong nuam ding hi.

4. A khuakhua ah I paiding hong baihlo ding ahih manin mi muanhuai palai nei-in tuate in February kha a kipan na hong sem ngiatngiat le uh I mazang ding hi.

5. Thuki zakna khem peuh ah zong a gelhding dan uh suaksak denni.

6. Lai kisuan theihna mun khempeuh ah zong suangciat ni.

Zogam Leitang ngahding a ut peuhmah in tutung Kawlgam milip simna ah Zomi cih ding hanciam in agen thei te’n genin a sathei te’n sa-in, sum leh pai neite’n piakhia ni. I Zogam leitang ngahkik na dingin I tha, I ngal, I neihsa sum le paite itsit kei ni.

Khaibawi

 


Comments




Leave a Reply