WWW.TUNGZANGNEWS.COM

 
Scientist minthang Einstein te khawng bang ama gamah om ngamlo hilai hi ven maw, i za ngei hia. Aih hang tuni dong thupi kisa mahmah lai sam ai ve. Kawlgam a omte thupi hileng leitungah a zawngpen gam hisamlo ding hang a ci zel hi. Tua teh gamvai minam vai ngaihsut-a neilo in, mi in a kaang khat vom ci leh vom ci, a san khat kaang ci leh kaang ci pawl zong ki om thei tham hi ei. Gamvai minam vai hanga mat leh hen thahlup kaplup ding liangsang, ama nuntakna hutna dinga gamdang tung Kawlgam Zomi sungpan khat leh nih om veve sam hi ei. Tuate mipi in i theihloh hang galkap kumpi thukante, palik thukante pawlin tel lai mahmah dinguh hi ei. Hite pawl tam genleng hong hoih ken teh.

Theihhuai kasak khat ah, tulai nitumna lam Europe gama gamkhangto minthangte bang enleng, a pianna gam pan gamvai minam vai tawh galtai-in nuntak haksatna tuamtuam hangtawh gamdang a tun uh teh, a tunna gampan a ngahuh pilna siamna teng tawh a gamuh a puah kik dan vive hi aa, tu dong maha gamdanga omsuak zong tam mahmah lai hi. A gam uh tawh ki nakzop mahmah tek uh hi ei. College-a ka sangsia seppih pawlkhatte bang ommuan-a amau tangthu uh hong ki gen teh tuadan na tam mahmah lai hi ven. 

Gamsung i om leh zong Pu Cin Sian Thang cihte pawl dan-a gamvai minam vai tawh galkap kumpite in thumaanlo taka gam a ukna, gam leh mipi a ding a hoihlohna te pulaak khia genkhia ngam-a nasem tangtang khawng hi leng bel thupi veve mah ei. Kawlgam galkap kumpi nuai-a kumpi nasem thumang mahmah pongmawkte pawl ciang khawng ihih leh bel thupi masa tangtang tuanlo ding a ci hi ingh. 

Bangbang hi leh vok pen vok hi. Ui pen ui hi-a, ak pen ak mah hi. Ui khat vok lakah om in vok tawh sun leh zan lumkhawm in an a nekhawm tui a dawnkhawm hangun Ui-Vok suak ngeilo ding hi. Hite pen hihna taktak i cihte hi. Pasal khat numei tawh a omkhawm hangin numei hilo aa, numei khat pasal tawh a kikhawlh hangin pasal hilo hi. Tua mah bangin numei-pa/pasal nu suak theilo hi. Mi-in tuabangin a cih hangin, ama hihna ama numei van/pasal van kikhel lo hi. Amah leh amah ahihlohna hong ki gen leh, thumaan gen mi kici lo dinga, mi banglo kici lel ding hi. Zomi khat pen Zomi hi aa, Kawlte khat pen Kawl hi. Chin khat zong Chin hi lel aa, Zomi khat Zomi hi lel hi. Zomi khat Chinte lakah omin amau tawh kikhawl-in a teenkhop hangun Zomi-Chin/Chin-Zomi hilo hi. Numei leh pasal kiteengin ta aneih leh bel a tate kahbia kici Zomi-Chin/Chin-Zomi omthei kha mah ding hi. Kibang i ci zongin hihna taktak tawh i gen/i ki pulaak nop leh kibang theilo hi. 

Tulaitak pen ihihna bangtak kipulaak theih ding hun, ihihna bangtaka i kiciapteh i kipholaak theih hun hi ci-a, kumtampi i ki ip teitaina teng a kisuahkhia tek hi. Kop leh kai thuah pen ei leh ei zong kitel hak a kici hi. Zomi kici sitset tek ni ei nguai. Thu kawikaihkaih lo-in Zosuan Zotate in tutung ihihna Zomi tawh kipulaak ciat leng gam leh minam a ding i sepkhop theihna i pankhop theihna i Zomite taangthu hong suak ding hi ei. Gampua a om Zomi ten zong nakpi takin thungetna tawh hong panpih ung ei.


Pasian Gam leh minam a ding thungetna tawh,

Sia Thawn
Norway  

 


Comments




Leave a Reply