WWW.TUNGZANGNEWS.COM

 
Picture
Pasian  in tuni ciangciang Zomite  i omna ciat ah hong kepna hangin i lungdam mahmah hi. Ih pil isiam man hilo, i neih i laam man hilo Topa hong makaihna leh hong itna bekbek tawh, tuciang anung ta leh  mun tuamtuam ah aki omthei ahih manin Topa min i phat masa hi. Minam dang tampi takte hamsa mahmah ta leh eite bangin Pasian lam honsakna angah lo mi tampi tak a omlam i thei hi. Ahi zongin ei Zomite pen abeisa in akamsia leh alawhsam i bat hun omphial ta leh tu ciangin Pasian in apalhkhia dingin hong suanna khat himawk veh e ci-in i phawk thak thak ta hi. Topan ei adingin a geelnate damdam in hong tang tung tung ta ahi hi.

1. KIKHELNA A OM DING CIANGIN KITELKHIALHNA OM THEI ZEL

Lo i khawh ciangin i hal masa a, meikuangin  lauhuai mahmah na pin, aden ciang, a zingciang in i khaici tuh ding tawh lo lam manawh in khaici hoih i deih bangbang ituh thei a, ahun acinciangin  agah inekbangin tulaitak ZOMI te adingin lohal kuan leh lohal tungtawh kibangin meikhu leh meikuang ging hong tam mahmah kha dinga, ahi zong denciangin  thupha in hong nung zuih pah lel ding hi. Pasian in mailam ah Zomite thupha hong pia nuamlua ahih manin  khat leh khat a ki-it mahmah ding teng kitelkhial dekdek in  i om a, ahi zongin i kitelkhial tuan kei hi. Biakna thu hita leh leitung thu hital eh leitung tangthu i et ciangin thulianpi ahoih athak apian ding ciangin, buai dekdekna leh kitelkhial phialphialnate na om masa thei zel hi. Ahi zongin a nungsang ciangin thupha leh thuhoih in  hong zom den hi. Tulaitak Zomite dinmun zong tuadan hi dingin ka um hi.

2. BIAKNA TAWH A KIKHENSA ZOMITE I KIGAWM KIK THEI TA HI.

Nidangin ipu ipa ten biakna aneihma un  Zomi hihna tawh nakigawm diamdiam uh a, biakna ineih ciangin updan,sandan leh zuihna akipan atuamtek in hong om ciangin ut leh utloh hilo in kikhenloh hong pha mawh ta hi. Sunghta putu akipan tanu tapa dongin kikhenthangna hong om ngei hi. Ih zakdan leh  i muhdan hongkibang lo ahihmanin ei ngaihsutna tek amanpen leh ahoih pendingin ngaihsun ihih manin kikhen ding hong baihmahmah a kigawm ding honghaksa tawh kibangin abeisa in Zomi te i om khin hi, ahi zongin hun hongpai toto in ngeina leh pau leh ham akitel sinsen eite pen bangbangin i kituamkoih koihnop hangin  kikhenna sangin kigawmna mah Topa inhongdeih sak zaw ahih manin ZOMI  khempeuh biakna  kim kigawm na GZA bang hongpiang a tun koi mun munah biakna  khat lehkhat kigawmkhopna hongom mahmah ta hi. Gentehna in Kalaymyo ah Zomi pawlpi 84 om in a vekin kipumkhat pha mahmah hi. Biakna in Minam khen zo nawnlo hi.

3. AWKAIH IN  MINAM KHENZO NAWNLO HI.

Zogam sunga ateng Zomite pen  khua 200 valbang ah kiteng in, behleh phung kilamdangin  ikhuamun leh omnazui in i aw kaih hong suak tawm lel hi. Tulaitak bang pen Zomi te  leitung bup phial ah omta ihihmanin i gam pen leitung bup hongsuak phial hita hi. Nidang sangin kizop kipehna hong nuam mahmah zawlai ahihmanin om khawm bangin thu kizathei ta hi hang. Gentehna in kei Pau Khan Khai pen kapukapa te Tuithang panin apiang hi in, Losau awkaih azang ZOMI te kahi uhhi. Ahi zongin katate Kalaymyo ah kum 14 bang om pih ka hihmanin Kawlte awkaih tawh khat veivei hong pau uh a, awkaih minam ding hi leh Kawl Zomi cih kul ding hong suak hi. Adiakin US leh UK akipan gamtuamtuam atung Zomite taten ZOPAU atheilo ka mukha ngei a, tuate pen Mangkang Zomi cih kul ding tawh hong kibang a, ahi zongin amau khempeuh a vekin ZOMI bek mah tawh i lo ciat hi. AW kaih akibatloh hangin kitel mahmah i hih manin i minam hihna akibang pha mahmah ahi hi. Tua ahihmanin Awkaih in Minam khen zolo ding hi.

4. ZOMI I HIHNA I KIPSAKNA IN  KIPAWLNA TUAMTUAM  I NEIHNA PAWLKHAT:

1. Global Zomi Alliance.
2. Leitungbup Zomi Innkuan.
3. Zomi Innkuan  USA  akipan  leitung gam 15 ah nei.
4. Zomi Council-India.
5. Zomi Congress for Democracy
6. Zomi Reunification Organization.
7. Zomi  Youth Association- Myanmar.
8. Zomi  Youth Association- India.
9. Zomi Football Association- Myanmar.
10. Zomi Siamsin  kipawlna-Myanmar.
11.United Zo Organization.
12. Zomi Music  Uplift Society.
13. Zomi  Literature Uplift Society.
14. Zomi Cultural  Uplift Society.
15. Zomi Council-Myanmar
16. Zomi Christian Literature Society- Myanmar.
17. ZOLL- India.

..Tampi omlai ding hi..

5. ZOMI  SUNGAH AWKAIH TUAMTUAM  PAWLKHAT:

1. Saizang awkaih azang Zomi te.
2. Dim awkaih  azang Zomi .
3. Tedim awkaih azang Zomi
4. Zo awkaih azang Zomi.
5. Sihzang awkaih  azang Zomi
6. Losau awkaih azang Zomi
7. Phaileng  awkaih azang Zomi
8. Paihte awkaih azang Zomi
9. Khuano awkaih azang Zomi
10. Vangteh awkaih azang Zomi
11. Teizang awkaih azang Zomi
12. Vaiphei awkaih azang Zomi


Atuamtuam omlai ding hi...

6. ZOMI APALHKHIATNA DING IN KAWLKUMPI TEN  VAI HAWM:

Zomite Pasian in hongpalhkhia sak nuamta ahih manin ahun ahunlo cilo in Kawl kumpite tungah mikisimna bek hilo in ei minam hihna pulaakkhuan leh gelhtheihna dingin hunpha hong piak uh pen a lamdang leh a lungdam huai mahmah hongsuak ta hi.I kumpite adingin i thungetnget pen Topan hong dawng hita hi. Zomi te minam neu mahmah dinmun panin minam gina leh minam thupi khat i suahna dingin  Topa lam hong honsakna ahi hi.

Level tuamtuam te:  Local level pan Township level pan District level pan State level pan National Level dongah i palhkhiatna dingin Topa hong geelsakna ahi hi. Awkaih in local level leh Township level ciang hong tutleh asang mahmah hiding a, Zomi min in National Level dongah hongtun zo ding hi.


7. LUNGSIM PICING TAKTAWH MAINAWT  NI:

1. Mimal hamphatna ding te  koihkhia phot ni.
2. Innkuan hamphatna dingte   koihkhia phot ni.
3. Khuakhat hamphatna dingte koihkhia photni.
4. Vengkhat hamphatna dingte koih khia phot ni.
5. Kuamkhat hamphatna dingte koih khia phot ni.
6. Nikhat hamphatna dingte koih khia phot ni.
7. Kumkhat hamphatna dingte koih khia phot ni.
8. Khangkhat hamphatna ding te koihkhia phot ni.

Khang tawn tung ading in ngaihsun ciat ni. Itna mit tawh ki-en ni. Hehpihna lungsim tawh kihuh ni. Lungsim kihualna tawh mainawt ni. Kuama mangngilhloh ding kaamsia leh kamhoihlo te kidawm ciat ni. Minam pi khat  hongki theihna ding leh hong kiciapteh nadingin Zomi ah kigawm photphot ni. Ei a ciat pen hong thupi semsem lel ding hi. Sing khuahkhat tawh sa kimin zolo dinga khuahtampi i gawm leh sa lim in, nuamtakin kine thei dinga , alungdam ding  sing khuah neite mah hong suak lel ding hi. Kikhenna in hong gentheisak dinga, kigawmna in hong lawhcingsak ding  hi. Pasian in Kum  2014 pen leitungbup Zomi te adingin  ipalhkhiat kum hong suak sak tahen.

Lungsim tawng tawh thungetna anei,

Rev. Pau Khan Khai
Southern Baptist Theological Seminary
Louisville,Kentucky
USA.

Home phone: 502-290-1084
Cell    phone : 443-757-7816




 


Comments




Leave a Reply