WWW.TUNGZANGNEWS.COM

 
Picture
KA KHAWKHAI MAI TANG EE:

Ka khaw khai mai tang ee gualsa no bang ka khaw khai mai tang ee. Ka gial mang lo lai ee gualsano bang, ka khaw khai mai tang ee.

Kammal khiatna:

Ka khaw khai mai tang ee:  Zo pau in Khaw cih ciangin Khe cihna hi a, Ka khe khai ing cihna ahi hi.

Gualsa no bang: Khisa no/ Sakhi no a ci zong om hi. A taktak in Gualsa a cihna hi ci-in khanghamte in ciamteh uh hi. Gualsa cih ciangin lakam hi a,
sagual cihna hi-in, a khiatna taktak ngalno cihna ahi hi.

Ka gial mang lo lai ee: Ngalno suaktungte a dung zui in gial uh hi. A upat deuhdeuh ciangin a gial uh mang semsem a, a tualtei ciangin
mangsiang hi. Gial mang nai lo ngal note a neu mahmah laite ahi hi.

La khiatna bulpi:  Gamlak ah ngalte a honhon-in kikhawl diamdiam uh hi. Ngal hon a tamte 100 kimkim pha thei hi. Ngal pite a suah ciangin vok mah bang uh a, 6 pan 12 ciang bang pha thei haamtang hi. Ngal hon lakah ngal pi 3 le 4 om hen la a no suak leh ngal no 30 bang 40 bang pha thei hi. Tam uh
ahih manin a tatna uh kithei baih mahmah hi. Lo khawng na ne kha leh hun tom no khat sungin lo ciing khat ne mang zo uh hi. Hih ngal honte in gal le lauhuai ahi sabengte ahi zong, sahang le humpi ahi zong tuak kha thei uh hi.

Tua ahih manin ngal honte a cing dingin ngal khaat-te in a kimkot, a vei le tak ah panla in gamta uh hi. Ngal khaatte in ngal hon kalsuan zia ding makaih uh hi. Lauhuaina gal a om leh galphawnna aw gingsak uh hi. Tua bang ciangin ngal honte in thakhat thu-in a bil uh tungsak uh hi. Ngalkhaatte' aw a ngai lo cih bang omlo uh hi. Ngai loin a tuampek leh sihna le siatna in a dawn tuah hipah lian hi. Ngalkhaatte in galphawnna aw a zak phetun a mailam khe khat khaisa lian uh hi. A tai ding lianin a mansa in om uh hi. A tai uh ciangin a kibangin tai uh hi. Suk le suk khawm, to le to khawm, diamdiam liailiai a cih ciangin galsia le lauhuai, liamna le sihna panin suakta uh hi. Hih ganhingte tatzia a tel mahmah khangluite in mihingte' tatzia dingin kilawm sa lua uh ahih manin "KA KHAW KHAI MAITANG EE" cih la phuakin, a sa, a lam uh ahi hi.


Pu le pate in hih la phuakin, lam la in na zang uh a, ni thupi hun thupi, vaipi a hawm ciang, zinpi a dawn ciang le zin mang a muak ciangin sa thei uh hi.  2014 Union Day le Zo minam-ni (Zomi National Day) hong tung ding hi ta. KHAW KHAI la le lam sin hun lam hun hong tungkik ta hi. Tua manin tukum i Zomi Nam Ni 2014 ciangin KA KHAW KHAI MAI TANG EE ci-in lamsai khawm ziahziah ni.

(Tua bek hi lo, adang zong om lai)

By: Rev. Khoi Lam Thang 

General Secretary


Bible Society of Myanmar

 


Comments




Leave a Reply