WWW.TUNGZANGNEWS.COM

 
Dear All,

Kalaymyo lam thupiang pawlkhat a theinuamte' a ding deihsakna tawh i phawktawm pak teng a kihawmsawn i hi ding hi.

1. Motor Cycle Lidense kibawl sak thei ta:

A beisa kum dang lamin bawltheihna kipia a, sum tampi pi mah bei-in kibalw ziahziah a, tuabang kawmkal ah a bawl zo lo, a bawl nuam khol lo cih tampi mah om a, license nei lo tam zaw lai thei ding khat ahi hi.

Tu'n zani, Feb.17, 2014 (mon) a kipan Kalaymyo, Kah Nyiah Hnah zumpi mai ah tangkona lai suang uh a, license bawl ding mi kigual deudau keei ta uh hi. Sumbei pen a cycle namnam leh a model dan tawh zong kisaisak uh hi. China bawl 110 pen Ks.65775/- leh 125 pen Ks.69875/- cihbangin laisuang uh hi. Japan, India leh cycle gol te hi-in, a tamman diak cihte ahih leh sumbei tamzaw lai ahi hi.

License bawl theih hun ding ciangtan pah uh a, Feb.17, 2014 panin July 4, 2014 sungbek hi dingin tangko uh hi. Motor pen a kibawlsak tam, hong bangcih tam cih a kilunglut laitak ahi hi.


(2) Motor License nei lo te kilimmat mahmah lai:

Nipyidaw pan a thupiak ombangin Motor laicense neilo a muhkhak te uh pen thukhualna om het lotakin man pahpah uh hi. A motor matsak bek zong hi lo-in kha thum sung thong tangsak lai uh hi. Tua manin eimi awlkhat in zong tuak uh .


3. Seihkaihtha Leipi kibawlpha ding:

Nungkum tuikhang hangin a kisia cip hih lei pen tuma lamin sangnaupangte leh motor cycle ciang a paitheih nadingin kibawl pak a, hun sawtsim mah kizang man hi. Tu'n tuate phekkhia khin uh a, Concrete leipi hoih mahmah dingin bullam panin lam phat ding kipan ta uh hi.


4. Kalaymyo Lamzilkpi dung & Lamka bom pawlkhat ah Mei naipak kikoih:

Lamkan mite leh engine a zang a hathawl luate' phattuamsak theihna dingin Lamka bom pawlkhat ah mei mihzel, tangzel cih a pheleplep koih uh a, kha nih bang sawt khin hi. Mipi kilungdam tuam mahmah a, tu a sangin tawmkhat kinawh thei lai deuh leh hoih ding hi, ci-in bullam ah agen zong ki-om dan hih tuak hi.

(Lansong, Kalaymyo lamkapi ah bel sakol lim kihel khia a, Traffic mei kikoih zawh bel sawt khin zo a, mei en kawm in lam a kikan diamdiam ahi hi. Pawlkhat in bel ngeina seh thei nai lo uh a, pai hun ding pipi a ngak dedu tawh ngaklah lua a a na kawi ziauziau tawh hikeei simlai ahi hi.


5. Zomi Nam Ni a munmun ah kibawl sawm:-

Kalaymyo ah Chin National Day cih min tawh pawlkhat in Tongphila ah neihsawm a, Zomi National Day cih min tawh Munlai Tuiphum Biakinn ah zong neihsawm cih kiza hi. Zomibup min tawh ahih leh bel Tuithang khua ah khua sawm li val sawmin limtakin bawl sawm uh, cih kiza hi.

6. Suangphei khua ah Zato Innpi honpawi bawl ding:

zing ciang, Feb.19, 2014 (Wed) AM.10:00 hunin Pastor Zam Tawi Sing (a) Singtawng (Suangphei-Korea) makaihna tawh Korea te' huhna Zatopi (pucca buiding) kha li sung a kilam pen man ta uh a, honpawi nei ding
uh hi. A khua mite leh i minam i gam i hamphatna leh vaang khat zong ahih manin i lungdampih mahmah hi.

7. ZRDP in JCV tawh nasep kipan thei ta:

H.Vum Nang President of ZRDP makaihna tawh Motor lam tawh theihna leh phalna tunglam pan ngah khia ta ahih manin tu-in a pianna khua leh a motor koihna ahi, Saipimual khuasung leh a gamsungteng nawt ziahziah ta a, maban zop dingin geelna tampi nei hi. Thungetna, thapiakna leh panpih theihna tuamtuam tawh panpih ciat ni.

8. ZCD makaite zong census a ding mipi tungah pulakna nei-in a sun a zan ci lo-in khua tuamtuam ah kuan khia ziahziah uh, cih thu kiza hi.

9. Pumkhat suahna pawibawl ding:

Pa Theu Khan Dal (a) Theukuh te' tapa upen Tg.Suumpi* (Norway) leh Dr.Thang Leng Nuam (Pa Vung Go Lian (a) Chin Soe) tate in Zomi Nam ni ciangin Halleluijah Building, amau omna inn, Kalaymyo ah pumkhatsuahna
nei ding uh hi. Lungdampihna thu i puak hi.

10. R tungtawn a gam tuamtuam ah om, Zomi pawlkhat i gam a lungmuangtakin hong ciah (or) hong hawh seuhseuh thei ta uh hi. Nungkum in sanggam Tungzangte tangval li suakttakin hong ciah a, idawn ziahziah hi. Tunung diakin zong Tulsa a om kanau, Paupi zong ka nu vehin suaktatakin hong ciah thei ahi hi. Tua lo mi tamsim om ta ding hihang.

Hihte i et ciangin i gampen Pasian in thupha hong piakna khat leh kumpi hoih hong piakna hi a, lungdamhuai kasa mahmah hi. Mailam hong ciah lai dingte in zong na Visa uh a nam tuamtuam om ahih manin limtak teel in hong ciah, hong pha kawmkawm ciat ta un. A thubek a i kigal zakzak sangin kimu-in holim khawm leng ki-it kingaihnate zong om zaw tham hi, cih a lampi neite' adingin i kizasak hi. Tua bel gammi Stizen suahkihit ciang ahi, cih tel kim ciat ni. 

11. Biakna lam Pawi tuamtuam ding kisa ngeinai:

Kumcin khawmpi a munmun ah om ta a, a kiging ging loai zong pawlkhat om hi. March kha sungin ZCLS khawmpi leh panmun thak kiteelna zong Pyidawtha BC ah nei ding uh hi. GZA te in Kimuhkhopna khawmpi pen Tedim ah nei ding uh hi.

Kalay No.2 Section (A.G) khawmpi leh kum thum term kiteelpina pen Munlai A.G ah Feb.21-23, 2014 sungteng nei ding uh hi. Nitak sim biakpiakna hun ah Revd Dr Kam Cin Hau (Senior Pastor, Paradise A.G, Madalay) in hanthotna pia ding ahih manin thungai nuamte in kingai thei hi, cih zong i kizasak hi. Nipi ni-in Munlai A.G biakinn thak honna leh Topa' tung apna hun thupi khatin zong kinei ding ahi hi.

12. Tedim Section A.G (E.P) Kiteel khin:-

Kum 2 Term a kinei den ahi, Section makai kiteelna pen nungin nei khin uh a, Gamngai A.G Pastor a sem leh Section ah Lai-at kum tamsim a sem, Revd Lian Za Tuang in Section Superindentend hong ngah khia demdam ta
hi. Mi kician leh a kilawm khat ahih manin lungdampihna thu zong i puak hi.

13. Kalaymyo huam sunga han/khan/san/than/kul teng kituahsakna tawh kimeizomin Tahan lamteng in tuah khia khin dedek ta uh a, pawlkhat bel a sawm vet lo zong om tuak cih kiza hi. Nung deuh nikhat bang pen innkuan khat sung bebek panin misi Luang 6 leh a tanaute luang khat tawh kigawm (Luang 7) tuah khatin kituah zen a, khitui luanna tamsim hi. Tuate pen nidangin Saipimual ah hausapi asem ngei Pu Gin Za Cin (Tawmging beh) innkuan ahi hi.

Tulaitak Santa Han a kituah nai lo teng leh Taungphi la han a ki-um tuam den honpi khat pen bit lai a, tungsiah a tawpna dong ah lai a teen tuak uh cih uh cih kiza hi. Tuate hong kipsuak zo tam, ahih kei leh a kituah kituah a kul veve tam, cih mipi in a etlaitak uh ahi hi.

Hih vai tawh kisai Zomi sung, biakna sungah nam nih a kipha cih pen i theihsa ahi hi. Kituah leh a khasia ding tam, kituah kei leh zong a khasia ding om ahih manin ka pan nading ka thei tuan kei hi. A hoih pen a Topa'n hong seppih dingin thungetna tawh panpih ciat ding hi hang.


14. Dahna lam tawh kisia-in, Nu Cing Sian Man (Kum 65), (Pa Vung Lian Nang)' zi in zani, Feb.17, 2014 AM.9:00 hunin hong nusia hi. Amah pen zunkhum natna panin natna tuamtuam in bawl a, a na na khat ahi hi. A
khualui uh pen Phaiza hi a, tu-in Kalaymyo, Sanmyo veeng, Lamzikpi tungah inn nei uh a, Agape pawlpi (AMC) pawlpi mi ahi hi. . A pasal, Pa Lian Nang pen hunkhat lai Swe Thazin Bus manlongpi a nei masa pawl zong ahi hi. Zingciang Feb.19, PM.2:00 hunin vuina hunbawl ding uh hi.

15. Tuzan mahin Tedim a teeng, Thangnuai khua mi, Nu Luan Mang (Kum 60*) in a omna inn panin hong nusia cih kiza hi. Amah zong a zawngkhal thei zel khat ahi hi. A tate pen Pa Pau Cin USA leh anau Tungpi, Cing Nuam cihte a tuamtuam ah om uh hi. Dr.Chin Khua Khaite' sanggamte zong ahi uh hi.

16. Nung nipi sungin Aungthitsa Kawlte motor cycle hawl khat in Zomi numei khat khat taih lum mawk hi. Amah pen kum 60 pawl khih tuak a, Pinlong Baptist a Church Pastor sem, Revd Lang Suan Mung' unu ci hi. Kham lampan khual hong zinsuk hi a, a zintungna ahi, Agape pawlpi mi Pa Kham Suan Haute innpanin kivui hi. Sia Mung leh dah-le-kap teng dahpihna thu zong i gen hi.

17. Nung nipi sung manin Saipimual A.G ah Upapi a sem, Pa Thang Sian Pau' tapa upen, Pa Kap Za Lian (kum 35*) in a gan zonna gamsung pan cinat vat aa, inn panin hong nusiat vat cih kiza hi. A zi pen Malaysia ah om a, a taneu teng nusia ahi hi.

Dah le-kap a omte tungah Topa'n Ama nopna tawh hong na tuamsak hen

NB: Ommun pan a kiciantak a thu zakkhak pak teng a kihawmsawn pah i hi hi. A theih ding a kilawm pawlkhat in a hunlap deuh a theihtheih nading cih kideihsakna ahi hi.

Deihsak Thupuak,
Peter Khampu

 


Comments




Leave a Reply