WWW.TUNGZANGNEWS.COM

 
Innkuan level, Khua level, Pawlpi level, Minam level, Gamkhat level leh mimal level cih bangin adawldawl, aciangciang ah makai dinmun vive ihi-a, adiakin mi tampite amakaih zodingin lungtang puakzia neih ding akisam pawlkhat anuai ah kikumkhawm suk dihni.
 Agamla leh midanglua gentehlo-in Kawlgam tulaitak dinmun enlehang, U Thein Sein pen President hi-a, maitang kituah liangin, a gensia ngiatngiat mi honpikhat om hi. Bangmah theilo lamgei mi pawlkhat naleng inzong hawmthawhna kam pulak in kongam lai uhi. Tua zah dongin, kiko in ki gensia phial lezong heh ngaihsut selo in, advice hoih khat in ngaihsun ahih manin, Kawlgam tangthu ah U Thein Sein pen kumpi gina khat hongsuak mawk hi. Pil sinna ah Degree kician neilo in, English naleng agennop atun zolo mikhat ahihi. Ahi zongin, advisor bekbek Secular pilna tawh Ph.D ngahsa sinsen mi 12 koih a, tuate' thumuhna tawh kalsuan ngiatngiat ahih manin, Leitungbup in apahtak Daw ASSK naleng adeihdeih in peizo mawk hi. Ama' deihna sangin Advisor te' thumuhna ultung sak zaw hi. Makai khat pen bangzah in pil ikisa zongin, mittang 4 anei ki-om samlo ahih manin, advisor gina honkhat neih ding kisam hi. Tua banah lungduai ngeungau kisam in, ahoih lam tawh muhtheih ding zong kisam hi. Mittaw kineih in, bengngong kineih hunzong om dinghi. Mipi makaih thei dingin mikim in ciimna neilo a, pil mahmah taleh mipi ahuai theingiatlo pawlkhat om leuleu hi. Ataktak in makai khat cihpen, lungduai ding, thuakzawh hat ding, kosiat gensiat pawlhat aomleh heh ngiat lo ding, mipilte thu dong tangtang ding cihte kisam hi. Lungtom phangphang leteh mihai in hong kiciamteh lel dinga, lungduai ngeungau leteh micim in hong kimu dinghi. Thukhual leteh mihoih in hong kimu dinga, angsung bek na ultunsak leh namneu lungtang nei-in hong kiciamteh dinghi. Makaite' tungah Pasian in thupha hongpia hen!  Dal Sian HungKuala Lumpur, Malaysia. Mob: 011-1521-5972Email: dalsianhung@gmail.comFacebook: Dal Sian Hung
 


Comments




Leave a Reply