WWW.TUNGZANGNEWS.COM

 
Na hoih sep cimtak kei ni (Gal. 6:9)

Galati 6:9 sung i sim ciang thu lianpi 5 – na hoih, na hoih sep, cimtak lo, lungkia lo, leh thaman cih bangin kikhen thei hi. Zomite in na hoih tam sem kisa baih lua, cimtak baih lua mahmah i hih manin, Zomite adingin kisam mahmah thu hi dingin ka ngaihsun hi. Tua ahih manin hih a tunga thute pansanin – na hoih i cih bang, tua na hoih i sep in bang phattuamna hong pia ding, na hoih sem kei leng, ahih kei leh na hoih lo sem leng bang supna/thuakna om ding cih leh, na hoih sep nadingah bang haksatna om ding cih pen i gennop thu ahi hi.


Na hoih i cih bang hi hiam?

Lai Siangtho in hun hoih i ngah simin midangte tungah a hoihin gamta ding leh, a diakdiakin thu-upna sunga i innkuanpihte khempeuh tungah hoih gamtat dingin hong hilh hi (Gal. 6:10). Bang hang hiam cih leh, na hoih sepna in mihing adingin phattuamna piangsak a, Pasian lungdamsak hi. Tua ahih manin tua na hoihte leh, na hoih semte nuntakzia pawlkhat i gen masa nuam hi :

1. Lai Siangtho in khat leh khat ki-itna cih simloh kuama lei ba lo dingin hong hilh a (Rom 13:8; Heb. 13:1, Joh. 15:16), Thukham lianpen leh a zom zong itna thu mah (Mat. 22:37-39; Mark. 12:29-31) ahih manin itna neite in Pasian lungdamsak hi. Tua in na hoih tampi sem zo dingin thahatna guan hi.


2. Mi khatpeuh a gamta khial leh, thu haksa tuak a om ciangin, Kha Siangtho deihna bangin tua bang mite a maanin a gamtatkik theih nadingin thunem zangin huh ding (Gal. 6:1,2,6; Heb. 13:16; Luk 17:3).


3. Zindo siamna pen Pasian lungdamna ahi hi. Mi pawlkhat in a theihloh kal un vantungmite na zindo uh a (Heb. 13:2) thupha ngah uh hi.


4. Thongkia mite pen amau tawh thong a kia khawm bangin phawk ding (Heb. 13:3).


5. Nupa thu thupingaihsut ding. Zi pen a pasal tungah citakin, pasal pen a zi tungah citak ding (Heb. 13:4a; Kol. 3:18,19). Tate in nu leh pa zahtak ding (Pai. 20:12; Efe. 6:1-3; Kol. 3:20), Nu leh pate in zong tate heh theih nadingin bawl loin, Khristian ngeina tawh kituakin taii-in pantah ding (Efe. 6:4; Kol. 3:21).


6. Pasian in ama mite nusia loin huh ding a, a kisapna bangbangin panpih ding hi (Thkna. 31:6,8; Joshua 1:5) cih phawk kawmin, sumdeih luatna tawh kipelh nadingin nuntakna kikemin, neihzah tawh lungkim ding (Heb. 13:5).


7. Nidang a nungzuite up leh tu huna Jesu pen kibang, kilamdang nai lo ahih manin makai masate phawkin, amaute sihnaziate ngaihsunin, amate upna bang neih ding hanciam ding (Heb. 13:7, 8).


8. Thuhilhna lamdang tuamtuamte hangin lam maan panin pial lo ding. Ann nek, tui dawn tawh kisai phattuamna a piangsak thei lo thute hangin buai lo ding (Heb. 13:9). Kip takin ding a, nuntakzia kician tak nei ding.


9. Jesu pen khua pua lamah a sih mah bangin, leitung nuntakzia pua lamah, Jesu tawh maizumna thuak khawm ding (Heb. 13:10-13), tua hangin lungkia lo ding. Jesu hanga maizumna leh bawlsiatna thuakna in Pasian lungdamsak hi.


10. Leitungah a kip khua om lo a, a hong piang lai ding khuapi a zong mite in, i kam tawh Jesu min pulakin, amah phat tawntung ding (Heb. 13:15; Late 96:1-13, 103:1,2; 105:1,2).


11. Makaite thu mang ding. Tua hi hi leh amaute lungdamin thanuam takin na sem ding uh ahih manin, a nasepna uh phatuam ding hi (Heb. 13:17). Makaite pen Pasian seh hi (I Thes. 5:12).


12. Hehpihna neiin, migi-in, kiniamkhiatin, dikin, khat leh khat lungkimlohna a om ciangin mawhna kimaisak ding (Rom. 3:13). Mawhna maisak kei leng Satan in nuamtak sa ding a, mite mawhna maisak kei leng ei mawhna zong hong kimaisak lo ding hi (Mat. 18:21-35; Mark. 11:25-26; Luk. 17:3; 2 Kor. 2:11; Efe. 4:32)


13. Pasian tungah lungdamkohna in Thuciam Lui late, la thakte leh biakna late sa ding (Rom 3:16b)


14. Thu kingetsakin, nakpi takin thu ngen ding (Heb. 13:18; Fil. 1:19; Sawl. 10:31; I Tim. 2:1; James 5:16). Pasian mizat thupi leh lawhcingte pen thunget a hat mite ahi uh hi. Tua mite lakah, Yonggi Cho, Yoida Full Gospel Church, Seol, S. Korea phuankhiapa in “Pawlpi khantoh nading leh khanlawh nading thupha kong honna tawhtang (key) pen thungetna ahi hi” ci a, John Wesley in, “Thungetna pen Pawlpi sumgum/gamh manpha pen ahi hi,” ci-in, Andrew Murray in, “Thungetna pen eima sunga om Kha Siangtho tehna hi” ci hi.


15. Pasian in Ama tunga biakpiakna a pia tangtangte thupha pia hi. Abraham in a paikhiatna lampi-ah biakna tau lam zel hi (Pian. 12:7; 12:8). Jakob in a sanggampa lau-a a taina-ah zong biakna tau bawl a (Pian. 35:7), Pasian in a min a kheksakna ah suangkhuam khat phutin biakna pia hi (Pian. 35:9-15). Daniel in Jerusalem lam nga-in nikhat in thumveita khukdinin thungen a (Dan. 6:10), Pasian a zahtakna hangin kumpi Darius in Pasian zahtak lawhin (6:26), amah a lehdo mite in sihlawh hi (6:24).

Bang hangin na hoih sem ding?

Kisam i sakna hang leh i nget zawhna hang tawh, mawhnei leitung mihingte tan dingin Tapa Jesu Khris hong pai hi zenzen lo a, Pasian in tawntung sihna thuak ding hong phalloh man, hong hehpihna hangin mawhnei mihingte tan dingin hong sawl ahi hi (Mat. 18:11, 20:28; Luk 19:10; I Jah. 3:16-18; Pet. 1:3; I Thes. 5:9; Efe. 2:8-10; I Joh. 4:10). Tua hong sawlna thu thei a, um a, a muang mite tungah Pasian in na hoih, a manpha, a kimang tawntung ding gah a gah dingin hong lamenin, hong seh (ordained) hi (Joh. 15:16). Tua ahih manin na hoih sep pen ei pat masak zong ahi lo, lungdamkohna leh Pasian hong sehna ahih manin seploh phamawh, sep pelmawh ding thu ahi hi.


Tua banah na hoih sem a, lungdamna thu leitung bupi-ah kizelhsak pen Amah a um Khristiante tunga Jesu sawlna/thupiakna lianpen ahi hi (Mat. 28:19; Mark 16:15-18; Sawl. 1:8). Eden huan pana Mission nasep a pan Pasian hi a (Pian. 3:9), tua maban zom ding leh a sem ding sawlna a ngahte i hih lam i phawk ding thupi hi. C. H. Spurgeon in, “Satan nasepna lakah a lawhcingpen in piangthakte’n kha mangthang vei lo a, vai dang a buaipih uh ahi hi,” a cih leh, Oswald J. Smith in, “Pawlpi cidam lote damsak theih nading zatui hoihpen mission nasep ahi hi”, a cih pen Khristiante adinga zuihpah ding kammal ahi hi.


Sepzia ding tawh kisaiin, eima pumpi ci le sa hoihna, hatna, leh pilna-siamna tawh semzo dingin hong lamen lo hi. Tua ahih manin, Jesu in Amah (Jesu) min suangin Pa (Pasian) kiangah ngen dingin hong hilh a, tua banga ngetnate piak ahih ding zong gen hi (Mat. 7:7-12; Luk. 11:9-13, Joh. 15:16). Tua ahih manin Amah a um, hotkhiatna (pianthakna) a ngahte pen Kha Siangtho tawh hong omkhawmsak hi (Efe. 1:13; I Joh. 2:20). Ei’ hoihna, hatna, leh pilna-siamna hang hi loin, Kha Siangtho kithuahpihna tawh i sep nop leh i zo ding hi.

Na hoih sep thaman

Na khat peuhpeuh i sep ciangin thaman a om ding thupi hi. Nasep thupina leh thupilohna pen thaman-ah kinga hi. Thaman a om kei leh nasep pen nuam loin, thalawp taka sep haksa hi. Pasian a lungdamsak, na hoih a sem mite thaman ngah pawlkhat en ni :


1. Jordan nisuahna lam Kherith lui geia a bukna panin Elijah hong paikhia a, Sidon mite khua Zarefath-ah a pai ciangin, tua munah meigongnu in ann neel khut dim khat leh sathau tawmno khat bek a neih panin Pasian mipa Elijah nek ding pia a, tua a piakna hangin leitungah guah a zuk mateng, ni tampi sung, a ann neel bei ngei lo a, a sathau um sunga sathau zong kiam ngei lo hi. Tua banah a tapa sisa zong Elijah tungtawnin Pasian in damsak kik hi (I Kum. 17)


2. A pa in thah a sawm David pen, Jonathan in a huhna hangin amah a sih khit ciangin zong a tapa khezaw Mefiboseth pen David in kumpi sabuaiah ann nekpihin, amah a thah sawm Saul tupa ahih hangin nuamsa takin nungtasak hi (2 Sam. 9)


3. Izipt gam panin Israelte paikhia-in, Jordan gal kahin Jeriko kulhpi a lak sawm uh ciangin, numei paktat Rahab in Joshua kamtaite hoih takin na zindo ahih manin amah leh a inn sunga omte in suahtakna ngah hi (Joshua 2; James 2:25).


4. Abraham in Mamre tawsaw gei-ah vantungmite lim takin na zindo ahih manin tua munah tapa a neih nadingin vantumgmite in hilh hi (Pian. 18).


5. Sodom khua-ah Lotte innkuan in vantungmite limtakin na zindo uh ahih manin Sodom khua-a mite’ sihna panin suakta uh hi (Pian. 19).


6. Filippi khua-a a thongkiatna uah Paul leh Silas in nakpi takin thungen uh a, nakpi takin zin liingin thonginn a bulpi dongin kilok gawp a, thonginn kongkhakte a kihon ciangin thong cingpa amah leh amah kithah a sawmna panin, Paul leh Silas tungtawnin Pasian muh lawh hi. Tua thong cingpa in Paul leh Silas suahtak nading ngetsak a, suakta uh hi (Sawl. 16).


7. Daniel in Pasian zahtakin, citakin, a pumpi thanghuaisak lo ahih manin pahtawina nam tuamtuam ngah a, a galte in zong susia zo lo hi.


8. Josef pen kiniamkhiatna tawh a pa maipha ngahin, a cihtakna hangin Pasian in sila dinmun panin kumpi tutphah tungah tusak hi.


9. Kumpi Saul sungah kha gi lo a lut ciangin, David’ laiza tumna leh lasakna hangin Saul cidamin, thaksuak a, a sung panin tua kha gi lote kihemkhia hi (I Sam. 16:14-23)

Nuntak tawntungna thaman

Na hoih sepna hangin leitung thupha a ngah tampi om hi. Tua zong leitungah i om sung a kisam mahmah thu ahi hi. Na hoih sep i cih pen khaici vawh tawh zong kigenteh a (I Kor. 9:11; Gal. 6:7-8; Luk 8; Marka 4), khaici hoih lo a vawhte in gah hoih lo la ding uh a, khaici hoih a vawhte in gah hoih la ding uh hi.


Tua bangin khaici hoih, na hoih sepna tawh Kha Siangtho makaihna banga a gamtate in nuntak tawntungna ngah ding a, a hoih lote in sihna ngah ding hi; bang hang hiam cih leh mawhna thaman pen sihna hi a, Topa Jesu tawh i kipawlna hangin Pasian hong piakkhong pen nuntak tawntungna ahi hi (Rom 6:23). Tua thu a tel taktakte in leitung sum le pai, neih le lam, thupina leh vangliatna sangin Pasian teelzaw uh a, mite muhna-ah genthei bang ahih laitakun, a neih khomkhom uh tawh lungkim uh ahih manin mihau ahi uh hi (I Tim. 6:6-8). Tua bang mite in gialkialna leh gilvahna, natna leh damna, gentheihna leh nopsakna a thuak uh zongin nuamsa uh hi. A nuntakna buppi uh Pasian tungah ap ngamin, Khris hanga thuaknate pen Pasian piak ding minthanna tawh a ngaihsut uh ciangin gentham sa lo uh hi (Fil. 4:10-13; Rom 8:18, 14:8).

Na hoih lo sep thaman!

Na hoih sep leh na hoih lo sepin thaman nei tuak a, ahi zongin a deihhuai leh a deihhuai lo om hi. Na hoih sep thaman i gen tawmcik lang lamah, na hoih lo sepna hangin thaman a ngah pawlkhat i gen kik ding hi.


1. Saul in Pasian thupiakna tawh Amalek mite doin, zo gawp a, ahi zongin Pasian in Amalekte neih khempeuh susia mang khin ding leh, numei-pasal, naupang leh nawine laite, bawngtal leh tuu, kalaoh leh late that khin dingin hilh hi. Ahi zongin Saul leh amite in – Agag leh a hoihpen tuute, bawngtalte, gannote, tuunote leh a hoih khempeuh hawi uh ahih manin ama tungah Pasian heh a, Israel kumpi panin nawlkhin hi. Biakpiakna a piak hangin Pasian in saang lo hi (I Sam. 15).


2. Siampi Eli tate in amau sep ding ahi lo siampi vanzat tuamtuam a zatna uh banah, kikhopna buk lutna-ah na a sem numeite tawh lumkhawm uh ahih manin Topa’ muhna-ah a khialhna uh lian mahmah hi. Pasian thu hong tungin, Siampi Eli innkuan sung leh a beh sunga tangval hat khempeuh beiin, a innkuan sungah puteek a om nawnloh hun a om ding thu hilh hi. Israelte tungah a piak daupaina khempeuh lungkham hunin enna mit tawh a et ding thu leh nakpi taka a samsiatna thu kimu a (I Sam. 2:12-26), tangtung pah takpi hi (I Sam. 4:11-22)


3. Samson pen a mipihte kiangah omin, a nu leh pa leh Pasian deih bangin a om hunin na lianpi sem a, vangliatna thupi tawh nungta hi. Ahi zongin a galte ahi Filistia nungak tawh nuamsain a om ciangin a vangliatna bei a, sihna ciang dong thuak hi.


4. Kumpi Ahab in thuman lo takin a zi Jezebel sawlna mangin Naboth in a it mahmah a leenggui lo suhsakin, Naboth that a, tua hangin Pasian in samsiain, a zi tawh mulkimhuai takin sihna thuak hi (I Kum. 21, 22:34-40; 2 Kum. 9:30-37).


5. Daniel a haza mahmah kumpi uliante pen a zi a tate uh tawh humpinelkai kikhumna sungah kipai a, si uh hi (Dan. 6:24).


6. Belshazzar in Jerusalem a biakbuk pana kila hai leh kuangte zu dawn nadingin zang ahih manin a kumpi hihna Pasian in beisak hi (Dan. 5:23ff).

Na hoih sepna leh lungkiatna

Na hoih semin, a thaman ngah pah lo hi a kitheihna hangin lungkiat hun om thei a, lawhsam hi a kitheihna hangin maban zop noplohna zong om thei hi. Gensiatna, muhdahna, langbawlna hangin zong na hoih sep thadah hun leh sem dinga thahatna nei lo zah donga lungkiat hun om thei hi. Bangbang ahi zongin na hoih sep pen lungkia lo ding leh cimtak lo dingin Pasian in hong deih hi.
Leitung a mi thupi leh Pasian mizat thupite pen lungkia lo a na hoih a semte ahi uh hi. Gensiatna, pampaihna, langbawlna leh haksatna tampi thuak uh a, tuate hanga lungkia lo a, mai a nawt tantante ahi uh hi. Leitung pen ei sanga pilzaw, siamzaw leh na sem theizawte a kihatzatna leh a kigensiatna munpi khat ahih manin tuate hangin buai luat ding hi lo hi.
Pasian hang a sepna khat peuhpeuhah thaman om khin hi (Mat. 10:40-42). Thaman ngah pah na hoih sep ding om a, ngah pahloh zong om hi; a kingah pah lo thaman pen deihhuaizaw kan hi! Pasian hangin – gentheihna, zawnna, bawlsiatna, gensiatna, pampaihna, maizumna leh haksatna tuamtuam i thuak kha hiam? Tuate thaman in hong ngak gige hi (I Tim. 4:8; Rom 8:31-39, Luk. 6:21-26; Mark 9:41; Pau. 14:14).

Thukhupna

Leitungah mihingte, i nuntak sung tengin i mai-ah sep ding tampi om a, a hoih bekbek i sem zongin sepkhit zawhloh ding a om laitakin, a hoih lo zong sep khit zawhloh ding mah om hi. I nuntak sungin sem lo, bawl lo, ngaihsun lo ding, cih bang hi thei lo ahih manin, i sep i bawl, i ngaihsutna pen hoih maw, hoih lo cih i khentel, i lungngaihngaih ding thupi hi.


Na hoih sem dingin hunpha kinei hi. Sep zawh nadingin Kha Siangtho kithuahpihna tawh i tha hat hi. Nidang ciangin, na hoih i sem nuam mahmah zongin sep zawhloh hun leh sep theihloh hun om kha ding hi. Tua ahih manin Pasian in hunpha, hun hoih hong piak laiin, Ama deihna leh Ama adingin na hoih sem lo ding i hiam? A kikhem zo lo Pasian maiah, thukhen ni ciangin i tuh khaici hangin i lungdam diam? Tawntung sihna maw i teel ding nuntak tawntungna? Na hoih sep nading hun om lai hi!

T. Sawm Lian

 


Comments




Leave a Reply