WWW.TUNGZANGNEWS.COM

 
Sisanpih Laaizomteng,

Kum 66-cinna Zomi Nam Ni-pen Laaitui Khua-ah nasiatak-in kibawl ding-a, tu nitaak-pen Zomi Nam Ni Eve kipan dinghi. Tutung Laaitui Khua-a Zomi Nam Ni bawlzia geelna-pen Guun Gaal Zomi Khua 180 kiim-ah "Guun Gaal Thelnah Leeng (Census Thupuak)" akibaanhawm kawm-in khuaciat-a hausa upa ahihkeileh amau' taángmi nih leh thum ciangbeek hongpai nading sapna/khohna/zotna kibawl-hi.


Hunsehkholh:

Tuni February 19 Nitaak Zomi Nam Ni Muakna-pen Laaitui Khua laaizang-a Emmanuel Biakinn Tual-ah nasiatak-in minam ngaihna, nulehpa, pilehpu ngaihna late kizaii ziahziah dinghi. Tuni suun-a kipan-in lotpeng (volleyball) kidemna kipan zo-a, ziingciang-in final kidemna omdinghi. Kimawlna-ah khatna ngahte pahtawina citpiakte nasia tak-in kivaaihawm-hi.

February 20 ziinglam pan-in Social Activities (Kilawmtaatna kimawlna tuamtuam) kinei zomto dinghi. Suunkim ciang-in khua upa zawdeuhteng leh khuaveeng khuapaam pan-a Nam Ni hongsiim palaaite-tawh aiicing hun khat kinei ding-a, tua laai-ah, Zomi leh Guun Gaal thu-tawh kisai thusuutna tuamtuam omdinghi. Hih hun sung-ah,

  • Laaitui Khuasaatpipa Pu Pau Suang (Gualnam) pahtawina Laaiphahpi kipia ding-a, sumtang-tawh kizuuisak dinghi.
  • Laaitui leh Guun Gaal Ngalliam pahtawina Laaiphahpi-pen Pu Suang Khua Kaam kipia ding-a, sumtang-tawh kizuuisak dinghi (Banghanghiam cihleh Hausa Siahpiakna khanghun-tawh kituaklo, Laaitui leh Mualnuam leh akiimteng-in siahpiakloh nading-in Magwey-a Thuneite' kiang-ah luangkham-a apaisuk, anuntaakna Magwey mah-ah abei takpi Pu Suang Khua Kaam-pen Ngalliam (Hero) taktak-hi ci-in akipia ahihi).
  • Laaitui Khua pan-a suak-a akhangkhia mite' lak-ah tumging (music) upaziltak-a sin-a lawhcinna Laaiphahpi angah Pa Suang Go Kaap-zong pahtawina Laaiphahpi kipia ding-a, daat githa (electric guitar) athakset khat-tawh kizuuisak dinghi. Hihte mimal vaaihawmna hilo-in Laaitui Siamsin Kipawlna, Laaitui Hausa Upate leh Guun Gaal Zomi Federation te-in thukim khawm-a akipia ahihi.
Nitaak Hunpi:

Hunpi-ah Zinmaang ding-in Global Zomi Alliance Thuzeekpipa Rev Dr Do Suan Mung kisam-a, amah-zong lawptak-in thugenna manpha mahmah hongnei dinghi.

Lasa ding-in Zomi sung-ah minzaak-a a-om Lasiam Pa Kam Seen (Kaamseen) leh Hip Hop & Rap Lasiam Pa Tèng Khai te-nih kisam-hi. Amau-zong lawptak-in hongsaang uh-a, ziing nitaak ciang-in Laaitui Khangno lasiam khiinkhiante-tawh suakta tak-in zaii ziahziahding uhhi.

Tumtheih (musical instruments) teng-pen Kawlpi pan-in nitaak khat- tuulza leh alang; nitaak nih manhding kisaap-a, tuziing-in kithuah zihziah khinta-hi.

Gualbaan tumging (modern music) baan-ah, Sawngsiik laam, daaklaam leh Zolapite-tawh Zomi Nam Ni kiluunsak ding-hi.

Guun Gaal Zomi Khuate pan-a hongpai ding-in akician khinsa Kaapteel, Mualnuam, Mualluum, Tuidiil-a kipan honkhat om khin-a, khuadang pan-inzong hongpai kimciatding kilamen-hi, banghanghiam cihleh upazil paizia kitelkim naailo-in "kongpai ding uhhi" ci-a kizasak lianlian khollozaw I-hihman-hi. Feb 20 Nitaak ciang-in Zomi Nam Ni cialpi asiim teng-in ankuang umkhopna neiding uhhi.

Seplehbawl khempeuh Laaitui Siamsinte-in maa hongpang uh-a, hausa upa, biakna upa makaaite-leh mipi-tawh kalsuankhawm-uh ahihman-in Zomi sung-ah alamdang leh limhoih mahmah khat mitmuh-a akimuh khiatna ahihi.

Zomi Pasian' Thupha!

Zokhai

Tomkaal Thupuak-a akizanghpak

*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560 
***********************************************

 


Comments




Leave a Reply