WWW.TUNGZANGNEWS.COM

 
     Zomi Makaai te leh Dr Chin Do Kham Nuntaakna

Zomi te sung ah Mipil leh Makaai tampi tak ineikhin a ong nusia khinsa tawh ongdampih laaitawh cihbang in makaai tampi tak ineihte lak ah kei mimal in kathalaakna leh Zomi makaai kheempeuh in etteh a asuul azuihhuai kasaphadiak te lak ah khat ahi ong nusia khinsa Dr Chin Do Kham kalsuanzia tawmkhat kongpulaak nuam hi.

Dr Do Kham peen Zomi sung ah apilpeen leh ahau peen zong hituanlo a, Leitung mipil Ulian kheempeuh tawh zong sangkahkhawm akithei , akilawmta zong hipeuh mahlo napi in Makaai khat ahihnatawh nakhat peuhpeuh asepciang naakpi tak in kipiakhia in ama atutdong nawksuak ciatciat hi. Anasepna tampi te lak ah izaaksaciat ahi “ Dr Do Kham leh Kawlgam Yangon khuapi a om US Palaai zum Visa thuneipa kilawmta mahmah ahihkeh US Palaai zum Visa thunei alian peen pa in Dr Chin Do Kham it mahmah” cihtawh kisai thupi kasa mahmah hi.

Dr Chin Do Kham leh US Palaai zum a Visa thunei pa ki tanau kilkello uhhi. Sangzong kahkhawm ngeilo ban ah Inn veeng zong hipeuh mah lo uhhi. Ahizong in Dr Chin Do Kham in Zomi te makaai khat ahihna tawh kamite ading hih Visa thuneipa tungpan hamphatna tampi kingahtheiding cih mukhol ahihman in tua US Visa thuneipa itmahmah muan mahmah , ngaih mahmah pa asuah nading naakpitak in hanciam in bangteng suplawh a, bangteng maaizumna thuaklawh cih ithei kei hi. A inn alo azi ata asanggam a U anau, ama mimal aituam phattuamna te nusia in amite ongkhual man in kipia khia hi. Ahizong in Dr Kham in Makaai kahi cih leh Kamite ading phattuam na vaaihawmsak kuul cih tel ahihman in kipumpiak in ama ahongkhia ahihi.

Tun imuan mahmah I Makaaipi Dr Kham omnawnlo himah leh I damlaai Zomi makaai te in Imakaai pipa ongnusiat ahi go leh gamp khat ahi “ Ama kipiak khiatna leh mainawtna” khaici bang in ilungtang sung ah tuh a zatpahding in amanpha mahmah hi ci in itelding kisam leh izuihpahding iminam in kisam mahmah hi. Zomi te peen a ukding  ikisam kei a, Makaai, maaitaai akisam ihihi. Tua ahihman in imite kawlgam gaalkaap kumpi te bang in uk isawmleh kipumkhatna saang in kikhenna khat leh kimuanlohna lam ah kipaizawding a, makaih in amaai ah haangsan tak leh thukhual tak in itaai leh iminam sung ah khantohna, kipum khatna gualzawh na kingahding hi.

Makaai ci in mipite gaal et, mipi tung thusia apianding ngaak, mipite thu ngaimasa, gaal uk, mipi te gen ngaak  cihkhawngtawh iminam khangtoloding a imazangkei dinghi. Kum ongbei in kiteel zeekpong kumsim bang makaaipi ngahdenpong omnakhat ah omcip cihte tawh iminam sung khangto loding hi. Makaaipi in kum 10 ongkiteel in, leitung Degree thuap 10 ingah phialzong in ei innkuan sungvaai ciang, inasepciang, izi itaciang, I u inau ciangtawh buai in Sakol khekhaap sung a Ukeng haambang in I otot hang iminam khangtozolo ding ban ah Ganhing tawh ikilamdanna omlohi. Banghang hiamcih leh ganhing kheempeuh amau neekkhop ciat mulel uhhi. Minam vaai, gamvaai, Pasian thu vaai ah nasepna ilawhcin theihnading in eipumpi deihna , Innkuan sung vaai nusia a kalkhat suanzek akisam ahihi. Tua ahihman in Zomi makaai kheempeuh in ongnusia sa Dr Kham suulzui in kaminam ading kalbang zah suankuul, koimunteng phulkuul masa , bangsep kuul cihte ihmulo a lungngaingai a aseemsuakding in ikihanthawn nuam hi.

Thukhupna

Thukhupna ding in Zomi khangno sung ah Makaai tampi telak pan ka kithuahpih leh kanaseppih ngei Makaai Pu Zo Khai kaalsuanzia tawh thu kongkhup nuam hi. Pu Zo Khai Secretary sepna ZAM ah 2007-08 sung sawltaak khat in na kaseem ngei a, ZAM kiphut tung ahih sitawh nasepna ding, kalsuan ziading vaai kihawm cil zong ahihi. ZAM zumpi sung ah Kapmung, Muno,Papau,Kei,Pu Zo Khai, Pu Hau Kim nisim zum ongkah Full time nasem ka om uhhi. Nasep kakipat ma un Pu Zo Khai ko palaai teng in bang Skill nei cih nakantinten paha, Zomi Refugee te kisap theiding thu le la leh amun, ami cihte gualsuk pah zangzang hi.

Pu Papau bang Khalkha pau siam mahmah ahihman in Khalkha te sung ah Spy in zangziau, Keibang khuasung vaak haat mahmah kahihman in postman ing ongzang a, Kapmung leh Muno bang sum citheipian uh ahihman in neek leh dawn vaaihawmsak ., amah laaigelh kician leh mikaang laai siam ahihman in laaiteng gelh ciatciat in President Pu Hau Kim thu dong tangtang hi. 2007 kum UNHCR te in gamsung those thovaai lak a om te Minsanna piakkul hi cihthu ong omciang Pu Zo Khai in Staff teng emergency meeting ongsampah a, kua in bangseem thei , kua in kua meeltheih nei, cihteng kan semsem pah in panmun onghawm ziahziah ciang gualzawhna tampi kingah hi. Tua ban ah Pasian ummahmah ahihban ah Makaai hing cih pomtinten ahihman in Numei ah Sum le paai ah naak cihtakkhia mahmah a, Golhguuk sum akicite bang zakha leh ciangtawn tawh vau pah ciatciat ahihman in ZAM adau paiphadiak hi.

Zomi makaai kheempeuh zong mipi te imakaihna ah cihtakna, thuman na akisap ban ah Innphualzang ah tutu, gaal otot lo in kuankhiatzek, ei angsung vaai nusia zek a Mipi phattuamna kanzekding Zomi minam in kisam mahmah thukin hita cihtawh hialbawl ni. Akilawmlolua kammal leh khialhna aomleh Minam veiluatna hi ciin ongsaangsiam un.


Thang Khawm Pau Zomi 


-- 
Thang Khawm Pau ZOMi
1009 Bryant Way Apt B
Bowling Green , KY, 42103
USA
Cell- 270 -217 9593
joseptpau@gmail.comThang.pau@perdue.com
www.perdue.com , www.zomipau.wordpress.com

Itna icih bangcihtheih ding ihihiam cih leh Khris in eite ading in anuntakna hongpia hi. Eite zong i khristian imipihte ading in inuntaakna ipiakngamding ahihi. (John masa 3:16)
 


Comments




Leave a Reply