WWW.TUNGZANGNEWS.COM

 
Laaizom Ngaihteng,

Census vaai-tawh kibuai kheukho-in Tedim-a CNF te' upaphual-a bomb puakkham vaai-pen kikoih khiapak laaitak-hi.

Hih bomb avaaihawm-pen Zomite' gaalkaap neihte hiding-a asehzong om-a, mi khutthak maimai khat-peuh hithei aci-zong ki-om tek-hi. Ahizong-in, Theoretical taktak-tawh lungngai lehang;

Zomi gaalkaapte-in tuabang niangnuang-tawh naseem peuhmah loding-hi. "Khutthak khatpeuh' khutmaa" cihding inzong bomb tangkhat tawmsan man hilo-in, apiang theilo thu ahihi. Tua ahihleh;

Kei' theory-ah (maanthei, khialthei): 

  • Hih bomb apuakkham sakte-in census-tawh ei' manlah kheukho laaitak-in bang statement teng-tawh Naypitaw luh-a, angsung ahihkeileh anti-Zomism sepsuah sawm-hiam cihnop-huai mahmah-hi.
  • Bomb puakkham-in bangmah sialo, kuamah liamlo cih-pen tua apuakkhapna inn-ah sungtum pusuak, sungthu thei mahmah khat' puakkhapsak hithei-hi.
  • Zomi' khutmaa hilo dinghi, banghanghiam cihleh Zomi' khutmaa hileh CNF te' response-pen hihzah hi niikniak lodinghi.
Tua ahihman-in ahithei thu-ah, CNF te mahmah ahihkeileh amau mizat uital khatpeuh-in azat mi khat hithei-hi, bang meetna lamen-a hithei/bawlthei dinghiam cihleh;

Hih "Zomi" akicite ahiamgamh, khualaai nangawn-ah bomb apuakkhamsak mite, union lungsim neilo-a atuamtat, ….. ci-in gamuk thuneite' kiang-ah Zomi lehpanna thusunna-ah zatding evidence abawl-uh hithei-hi. 

Bangteng lawhthei dinghiam cihleh "Census enumeration" -ah Zomi vaai hong sukha thei-a, 2014 Kiteelkholhna leh 2015 Kiteelna-a Zomi' mapanna-zong hong sukha thei-hi.

Tua ahihman-in, Zomi Kipawlna khempeuh pilvaangtak leh kigingkhol tak-a kalsuan nading warning sign khat-in ka' mu-hi. Pupate' paunaak zuui-in, "buiipi leikeii inzong khua ngaisung" acihtak-a, I' maainawt kawmkawm-in lamkiim lampaam scan zalhzalh zeelding hihang!

"Tedim Khuanu Khuapa te' Laaihawm(TKKL)" acihna ahzong enlehang Zomi upapi-a I'seh, I' muante, tutadih makaai upa seemte' laaihawm angiimna-pen "Zomi" kicihloh nading hi tangial ahihman-in naakpi-a pilvaang kisam mahmah, kamkaih letsiam kisam mahmah dinghi. Hih TKKL leh bomb puakkham vaai-zong akinahvawh hithei-hi. "Chin" nuai-a code zatloh khaakding alau mite' geelna bang-a TKKL te alaam (အစီအစဥ် အတိုင်း ကၿပ)-zong hithei-hi. Ahitheithu (possibility/probability) om zeuhzeuh-mawk ahihman-in pupate' thuciin, "deeklam tuktum-zong gaal suakthei" acih mangngilh lo-a, mitvaal, bengvaal tak-a kalsuanding I-ki haanthawn-hi.

Zomi Pasian' Thupha!

Tuipi gaalkhat pan-in,

Zokhai 

 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 
 


Comments




Leave a Reply