WWW.TUNGZANGNEWS.COM

 
Khua khat ah nungak melhoih simtham khat leh tangval melhoih phalo khat kisih ngaih dihdih laizang hi. Nungaknu min pen Neino hi-in, tangvalpa min pen Lianpu ahihi. Neino pen mihau, mi nuamsa, mi cithei innkuan sung pan khangkhia ahih manin, anu in Lianpu tawh a kiten ding phal vetlo in, sih muhdah laizang hi. "Lianpu peuhmah tawh nakingaih leh gui awk dinghing" ci-in Neino' nu kiciam a, Neino inlah Lianpu ngailua mahmah ahih manin, khasia lua in kap ngeungeu hi.


Neino leh Lianpu te lawmta itna lah kuama' khen zawh ding hilo mawk ahih manin, alawmta un khual gamlapi ah vazin sim uh a, omna kitheilo in tawl khat kimanthan bawl uhhi. Neino' nu zong, a tanu mangthangta mawk ahih manin, dah lua mahmah a, News tuamtuam ah hibangin hong tangko hi. "Ka tanu (Neino) mangthang ahih manin, ka inn hong tunzo peuhpeuh, a deih penpen kapia dinghi," ci-in hong tangko khia hi.

Tua thu pen Neino leh Lianpu te lawmta in hongzak tak uh ciangin, hong kikum litlit uh a, hibangin hong vaihawm uhhi. Lianpu in Neino ciahpih vingveng a, anu' kiang vatun hi. Tua ciangin, Lianpu in a deihpen Neino ahih manin, Neino hong ngen a, Neino' nu inzong a kamciam omsa mah bangin, "Hizah lianga kingai nahih uh leh kiteng maivua leh" ci-in, phalna tawh Neino leh Lianpu hong kiteng hi.

Lianpu pen amel hoih luatloh hangin, tungsiah-nuaisiah, lawm le gual tawh kiho thei, mitei khat ahih manin, kim le pam te' panpihna tawh Sum khuambul khat hong kipan a, tulaitak in sung le pu adingin mak gina khat hongsuak hi. Neino' nu inzong pakta mahmah ta a, lungkim mahmah ta hi. Hunkhat lai-a agui-awk sawmna a ngawng ah Kham (Shwe) khi lian mahmah khat ok beubau a, tua khamkhi pen mak tangzangpa' leisak hi sawnsawn hi.


Thangho & Liando - Itna in Guabang hinna: Part 2

Lianpu pen ngimna kician nei, mi citak mahmah khat hi-a, a innkuan sung khual in, beh le phung, minam a it mahmah khat ahih manin, asepna-abawlna khempeuh mailam saupi khual in gamtang hi. Amau pen unau nih bek pha a, amah a uzaw hi-in, anau min pen Cinpi ahihi. Amau unau pen anu le apa in aneulai uh pek pan sihsah ahih manin, tagah dinmun tawh apute' bangkua sung pan hong khangkhia hi a, Cinpi pen laipil ahih manin, M.B.B.S (Bachelor of Medicine and Bachelor of Surgery) hong ngah khia hi.

Cinpi in M.B.B.S hongngah khiat hunin, Lianpu pen sumbawl in nuamsa pianta a, anau Cinpi deihsak lua ahih manin, USA gam M.I.T University (Massachusetts Institute of Technology) panin, MD-Ph.D (The Doctorate of Medicine and of Philosophy) hong ngahkhia hi. Lianpu in anau Cinpi ahanciam pihna tawh Cinpi zong MD-Ph.D hong ngahta ahih manin, Zi hong guatsawm ta hi. Cinpi pen Lianpu tawh tehna in amel zong hoih in, mipil mahmah khat hong hita ahih manin, nungak tampi in ngai tek uh a, kituh ngeingai uhhi.

Tua kawmkal ah Lianpu in Cinpi kiangah hibangin thu hong kikup pih hi. "Cinpi aw, lawmngaih tawh kisai pen, khantawn tulpih ding hi a, Lo gam telkhial lehang, kumkhat kisik in Zi telkhial lehang khangkhat kisik, ci-in khanglui ten paunak nanei uhhi. I nuntak haksat luatna tawh keibang na-u Neino in ka Sang kahlai in, hong huh den a, itna kineituak kahih manun akiteng hi-ung. I pute' hong pattah sa tawh hih ciang atung hihanga, khanglui te paunak ah Pute' tanu mah naci uh ahih manin, I pu' tanu neupen Niangno tawh kiteng thei lecin hong deihsak ing," ci-in anau Cinpi hong kamkup pih hi.

"Thangho leh Liando inzong mimtang-tangtang phalhawm in haksat-nopna thuak khawm sam uh ahih ciangin, nong deihsak pen hong mang ning, U aw." ci-in Cinpi in Lianpu hong kamciam pah giap hi. Lianpu inzong Cinpi leh Niangno kiten theih nading lampi hongvan in sawtlo ciangin hong kiteng uhhi.


Note: Part 3 na asawtlo in hong pailai dinghi. Video tawh et theih dingin zong kivai hawm hi.

Dal Sian Hung

 


Comments




Leave a Reply