WWW.TUNGZANGNEWS.COM

 


Minam pen nun tak pih ding hi a, code number tawh kumpi ciam teh ding thupi masa lo zaw hi
 
Dear Zomi te,
 
Census vai ah ngaih sut na tawm tawm om in, e at sawm dan zong a tawm tawm a hi hi. En bang code zang ding ci pen ei mah ai sut na tek hi ding a, a hi zong in ken ngaih sun ding ki lawm ka sak pawl khat hong khiat kia nuam in.
 
Code Number a thupi masa hi lo
 
Pawl khat te in code pen thupi sa lua mah mah in, a ki pia sa code zang kei leng mi nam a mang thang ding zah phial in ngaih sun in, a lang khat ah 914 Zomi ki ci kei leng Zomi a bei ding in a ngaih sun zong pawl khat zong om hi. Minam cih pen e num tak pih ding hi a, code number taw kumpi hong ciam teh ding a thupi masa hi lo hi. Zomi cih kumpi tu dong hong ciam nai kei ta se mah leh tu dong Zomi ci mang thang tuam lo a, nang leh kei e nun tak lai teng Zomi bei ngei lo ding hi.
 
Code e deih leh bel e beh min e khua min te tawh zong Code ki la thei ding hi. Guite in zong beh min tawh code nei khin a, Tedim in zong khua min tawh Code nei khin ei. E deih leh kumpi cil lo tak in e deih zah zah hong pia lel ding hi. Naulak leh Gualnam bang mitam mawh lo te uh a hih teh Code khat bang la le uh ngah zo thei ding hi. Tuithang, Laitui code zong ki ngah thei ding. Code thupi lo lua a ci nuam hing.
 
Tua a hih leh 914 Zomi zong bang ding a hia?
 
Zomi ten code neih ding a thupi masa hi lo a, a hi zong in Zomi min tawh sep nop leh Zomi min nuai ah sep zawh ding sep theih ding zogam a teng mipi leh minam khang to na ding maban om a hi mah in, 914 Zomi ki cih ding a thupi hi. Chin min nuai a e ngah lo, e ngah zawh loh ham phat na tampi mipi a ding musak e  hih man in 914 Zomi ki ci ding a ki vei mah mah a hi hi. Tu leh tu a e ngah ding ham phah na gen bak leng
     1. Zomi vai bek lian hong van ding Chin State level mangtal (minister) khat Chin State ah ngah ding      2. Zomi vai bek lian hong van ding Sagaing Region level mangtal (minister) khat Sagaing Region ah ngah ding.
Mailam dam dam a hanciam to to theih ding ham phah na pawl khat      1. MRTV ah Zomi Radio leh TV      2. Zomi Self-Administered Autonomous Zone/ Zomi State              Tua hi leh Zomi min tawh Nyipidaw ah direct a ki zom thei ding              Zomi/Zogam puah na ding Fund a tawm a ngah ding              Gullu mual vai Zomi te in vai hawm ding
 
Code leh kumpi ciam teh na pen minam mangthang loh na ding a thupi masa hi lo in, tua code tawh sep nop e neih leh bek a thupi a hi hi.
 
Chin te tawh e gim(lungtup) na ki bang lo
A sawt lo in Chin state in University bang hong ngah leh Hakha mah a ki koih kha ding a, Zomi ci tawh e ding zawh kei leh Zomi te Kawlpi ah University khah kha lo ding a Hakha a khah hong kul kha thei ding hi. Tua pen Chin te a ding met na hi na pi, Zomi te a ding sup na suak mawk hi.
Chin ten puah nop Gangaw->Hakha->Lunglei lampi, Zomi te puah nop Kalay-Tedim-Rih-Champai.
Gim(Lungtup) ki bang lo te pen kipawl na khat sung a e om sang, a tawm tek in om in ei mai lam ciat kal suan leng, ma ki zang zaw. Sometimes, Divorce is better than bad marriage.
 
"Chin and Zomi will never come together under one roof anymore" CNF, 2013 (Sanggai Express News). Hi pen kei gen hi lo a, Chin (CNF) ten a policy uh Manipur a om new agent khat a gen uh a hi hi.
 
Chin nuai ah hamphat na te hawm diam diam leng kei bang "Chin" ci ding zong haksa sa lua lo lel hing ei. Genten na in ah ko Laimi te in 2 District, 1 Capital leh 1 Radio len MRTV nei khin ka hih uh ciang no Zomi te a ding a lang - 1 District + Capital OR 1 District + 1 Radio len MRTV no la un hong ci bang hi leh bel "Chin" ki cih lel ding hi a ci mi tawm lo ding hi. A hi zong a mau tua hong ci ngei lo ding a, Zomi nusia un la, Chin hong suak un. Nautang ding in hong deih a, a hi hang Zomi leh Zo ngei na hong it pih lo ding uh hi.
 
4 tawh ki pan Code dang dang te pen Chin nuai hi a, 4 tawh ki pan bang code bang code e zang zong in Chin mah hi ve ve hi.
 
A hai vai mah mah thu khat
Pawl khat in a maw code mah zat sawn in, tua ciang bek tawh lung kim lo in, minam dang ten zong 914 Zomi ki ci kei hen la, a mau code tek mah zang leh ut pong. Hi pen hai vai leh lungsim siat na ki lang sa ing. Hi bang mi te lai at pen, Zomi te a ding deih sak na om het lo a Zomi te a ding a hoih hong at het lo ding hi ci pen Zomi ten tel sa in nei hi.
 
Thu tawp na:
 
1. Kumpi hong piak sa code e zat ma ing, tua code tawh bang sep sawm hi hiam ci ngaih sun ma sa ni. Bang a zat sawm e hiam cih ngaih sun ma sa ni. A ki sam takpi hiam?
2. Sya Tawng Kim la, ZBC la te mah sa a, e pawl pi sung ah Zolai/Tedim laisiangtho, Zomi group(Zonet), Zomi Nam group mah a zang zang te e hih leh code a tawm tawm ki sam lo hang a, Chin nuai pan suah tak na code 914 Zomi mah a hoih pen hi ding in um ing.
3. ZCD, GZA, ZYA leh makai khat peuh sang zawh lo man leh sungta pu-tu meltheih ki zop na khat peuh aana man peuh tawh minam vai khen tat zaw lo in thuman (fact) kan tel in ei a ding hoih pen in teh ki sik ding om kei e cih dong mah ngaih sun ma sa leng. Thuman lo zuau thu leh lau na tawh thu khen sat kei ni.
 
E minam a ding hoih e sak pen tek khen sat ni in. Khat leh khat e khen sat na tek ki zah tak in ki telsiam ni.
 
Lai at,
 
Mungsen
 


Comments




Leave a Reply