WWW.TUNGZANGNEWS.COM

 
PicturePu. Hang Thawn Tuang
“MIZOGAM ZOMITE DINMUN LEH KHANTOHNA DING” ( Late 33:12; Esther 10:3 )

A masa in Zomi Nam Ni thupha deihsakna tawh itna khut kong len hi, Minam a hong bawl Pasian leh i Minam makaite thusiamna tawh Mizogam Zomite dinmun leh khantoh nading cih thu bulphuh a thugenna hunpha deihsakna ka ngah manin ka lungdam mahmah hi. Tuni-in Zomite leitungah khang tampi i om khit hangin i Zomi Nam Ni pen kum 66 cinna hipan hi. Hih i Minam Ni thupi ah, ka Zomipihte mai a gen ding thu makaite hong geel sak ‘Mizogam Zomite Dinmun leh Khantoh Nading’cih thu tawh kisai hi bangin kikum leng;

Mizoram Zomite' Dinmun:

Hih tawh kisai-in gendan tampi om thei dinga, bangbang ahi zongin kei muh danin, tulaitaka Mizogam Zomite i dinmun kibangkim lo hi, khenkhat i pianna, i lamh kiatna gam hi in, beh leh phung, u leh nau, nu leh pa, inn leh Lo tawh bukim taka khuasa i hih lai takin, khenkhat haksatna hanga inn leh Lo, beh leh phung, nu leh pa, u leh nau nusia a, i nuntak nading sum leh pai zongin mi nasem leh mi inn sap/luah a om kitam zaw hi, ci leng tam kikhial lua lo dingin ngaihsun ing. Tua mah bangin i Zomipihte tunga i lungsim puak zia, i kampau leh i nuntakpih zia zong namnih Mizogam tualsuak leh Mundang/Myanmar pan a pemlut cih bangin kipai pianin ngaihsun ing, hih pen keima muhdan ahih manin na ngaihsut dan leh na muhdan uh a hih kei phial leh nong maisakding uh hong ngen masa ing, tua te hibangin gen leng.

Mizogam tualsuak Zomi khenkhatte lungsim puakzia;

Innteek lungsim nei, mi namdangte hong neu muh ding launa tawh, i lungsim tawngah i sanggamte itna leh lainatna nei napi, veng leh pam lawm leh gualte muhna ah, a diakin Myanmerpan hong pemte mikhual muh, kikholhpih nuam pha lo, ei tawh kikimin ngaihsun zo pha lo, ka sanggamte hi cih ding haksa sa pian, i pau tawh hopih ding maizum, hi gam pau a siamlohnate ciamnuih bawlna a zang zaw lai, midangte zakin hopih nuam pha lo, i Zo ngeinate sangin veng leh pam’ ngeinate thupi bawl in zang nuam zaw, i Zo ngeinate Pasian um lo, dawi biate ngeina bang phial in ngaihsutna nei bangzah hiam ki om in ngaihsun ing. I vekpi bel hikhin sam khang e.

Mundang pan alut Zomi khenkhatte lungsim puakzia;

Mikhual lungsim nei, veng leh pam khua leh tui ading dahna nopna munte ah kipiakna, a diakin khangnote kitam zat man phalo banah i om na gam pau deih bangin siam lo i hih manin, dah ni leh nop ni, misi inn a lenkhopna cihte ah maizum, zakta milak a kihel ding nuamsa pha lo, vengsung mipi hoih nading a vaihawm YMA, MHIP, VC leh LC makaite maingap lo, hong henpah, hong manpah ding banga kihta zawsawp, lawmbawl ngam lo, i kisap leh i haksatna a tun ngamlo bangzah hiam om hi hang ciin ngaihsun ing.

Mizogam Zomite i vekpi a ci hi sam khang e, a tamzaw in hibang lungsim nei ihih manin, kim le pam a pha zo nai lo hi hang cih i san siam ding hoihsa ing, Tg.Cinpu Willsol (Zosuan tuailai makai) in; Khangluite’n Buipi lei kei in zong khuangai a cih bangin,i Minam khantoh nading ma suan khatpeuhah kidop huai leh hangsan huai om ding hi, Tua banah Zomite i khantoh nading hong khak thei ngaihsutna pawlkhat pen; Ei muh leh ei sep, i theihkhak, i phutkhak loh peuhpeuh leitungah thu leh la, vai khat peuhpeuh a om lo ding peuh kisa kha thei, Ei kihel loh na peuh pen ei' ading hoih hiphial ta leh langpan pahna, Ei thu neih lohna a hi kipawlna khat peuhpeuh pen ei' langpang peuh sak khak pahpahna, Mi nih leh thum makai-in mi pawlkhatin Amen hong kipiak pian leh pawlcing kisak pahpahna, Ei biakinn leh ei kipawlna bek Zomibup a huam zo kipawlna peuh sak khak pahpahna, Huhna leh hamphatna lametna bek tawh i hihna laih kawikawi, Ei khe tawh ding lo-a, mi namdangte huhna i ngah teh thupha ngah kisakna, tua huhna hong kipiate i pilna leh i teina tawh a ngah kisakkhakna leh tuate bekmah lamettoh zel nate hi, hih bang ngaihsutnate tawm sak semsem leng a, eimau tha tawh din ding thupi ngaihsutin hanciam zaw leng.

Rev.Pau Khan Khai' Thugenna:


Tuhun leitung khantoh zia i et ciangin, i gam leh Minam khantohna dingin i nuntak zia pan i ngaihsut lai ding thu hoih tampi hong phawksak hi, ci hi. A diakin ei khangthakte adingin hun hoih(Golden Chance)pen bangin ka ngaihsut a, mai lamah i khua i tui, i minam, i gam khantohna nading i vaihawmna, i kalsuanna-ah, ngimna hoih leh kipumkhat nading i lim ngaihsut mahmah ding thupi sa ing, i ngaihsutna a kibat kim kei phial leh zong, ei mimal hamphatnading bek hilo Pasian thukimpih Thu Hoih Zomibup meet nading i ngaihsut siam ding thupi ding hi. A masa penin; I Innkuansungah, u le nau, beh le phung sungah, Biakna ah, khuasung kimakaihna ah, lokhawh, gankhoina, pilna, siamna leh sum zon na-ah i khantoh theih nadingin hih Thu hoihte i nuntakpih theih nadingin lungsim thak i neih kul hi;

Vai khat peuhpeuhah a masa penin Pasian bulphuh den hamtang leng, I Minam min kidawkna peuhpeuhah a hoih lo nate nusia ngam, khawlsan ngam leng a, a hoih lam a hih nak leh tha pia in, pahtawi in, gum ngam hamtang leng, Gamsung leh gampua a om Pasian leh Minam min pua a kipawlna a vaihawm makaite’ thuluan zia kibang zo leh, Biakna nasem Upate leh Siampite simmawh loin, Thunget sakin, itna tawh huh in, tha pia zaw leng a, Minam vai leh biakna nasem makaite tukhawm in mailam Minam khantoh nading leh kalsuan zia ding thungen in geelkhawm thei leng, Kumpi sunga ulian i neih sunsunte leh sumbawl mihau i neih sunsunte a khasiat theih nading thu hoih lo kampau kidawm in, amau mah Minam vaihawmna leh kumpi zum lamah zang siam leng. Kam bek/ thu bek tawh nasep tawm sakin, thatang tawh sepna taktak tam sak leng, Nidang pek a i khasiatnate sutsut nawn loin kimai sakin, Minam khantohna dingin beh leh phung biakna thu ah kipawldan siam leng.

Neih le lam a neite pahtawi siamin, amau zong hong kiphal thei hen la, Pilna sang a neite pahtawi siamin amau zong hong kizang thei leh, I muante makai in koih in, i koih makaite thu zui zo hamtang leng, Kum tam khanghamte zahtakin khangnote pantah siam leng, Thu kituahlohna a om teh a mi kimudah loin, a thu leptuah sawm leng, Midangte thanemna leh cinlohnate a sia lamin gengen loin hehnemin huh zaw leng, Makai khat i telkhialh manin ama makaih kipawlna telkhial cihbangin om kei leng, Ei kihel lohna peuh a thupi loin ngaihsunpah kei leng, Lawhsapna a om leh a puakdan siamin, Lawhcinna a om teh lungdam siam leng, Israel kumpi masa ahi David Ben Gurion leh Albert Eisteinte bangin gam leh minam adingin a gimding, a tawldingin kituh leng, i ngaihsutna a vek in kibang khin cih om ngei lo ding hi, a hi zongin a kibang sunsun teng gawmin Pasian leh Zomite adingin lungsim kipumkhatin itna tawh khut kilenin hanciam ciat leng Pasian thupha piak Zomite adingin Minam khantohna Zingsol hong suak hun om veve ding hi. Sanggam Mizogam Zomite dinmun-ah nang leh kei i dinmun i kitheih ding um ing, tua ahih manin hih i dinmun pan i Minam khantoh nadingin bangci vaihawm a, bangci sepkhop ding cih pen i lungsim hong luah pen thu ahih ding thupi in deihhuai sa ing.

Rev.Dr. S. Pau Khan En (President GZA)in Leitungbup Zomi Khempeuh Tungah Khristmas Thupha Paihna:

Abeisa 2013 kuma hong khak bangin, Tuni-in Zomi khempeuh khantoh nading deih taka i ngaihsut ding thupi sa ing, Tu hun Science leh Technology pilna khangto mahmah a, a nam tuamtuam tawh an i huan sam hangin Zomite’ taangtawng anhuanna in tap tunga kiphut suangthu thum tungah a hihi. Tua suangthu in Zomite’ adingin I nuntakna bulpi hi, cilehang kikhial lo ding hi. Zomite’ nuntakpih ding Suangthu thum lungngai kawmin Zomite khantoh nading Thu thum tawh panmun la leng;

Amasa pen Suangthu in Pasian Hi: 


Zomite in Pasian i theihna pen (gospel) Lungdamna Thu hong tun 1899 ma pek in, I Zomi tangthute sungah Pasian i theihna hong kilang kiaukiau zel hi. An ne lehang, zu dawn lehang, “Pasian aw, lungzai aw” ci-in a phuisam masate i hihi. Pasian’ Lungdamna Thu (Gospel) hong tun ciangin, tua taangtawn a i up Pasian pen a tak-in hong kihil, hong kipholaakkhia hibek hi. Tua ahih manin Zomite in i teen i giahna mun khempeuh leh i sep i bawlna khempeuh-ah Pasian i mangngilh ding hi lo hi. Pasian lo-in khuasuak zo lo ding hihang! Pasian a masa sak mite pen Pasian’ thupha saang Minamte hi ding hi (Late 33:12). I khantoh nading thupha i ngah nadingin Pasian deihna leh a thu lo-in vaihawmin gamta kha kei ni!

Anihna Suangthu in i Zomi Nam Hi: 


Zomi a i pianna pen eite’ deih teel hi masa lo-in, hong bawl Pasian in Zomi a hong bawl a hi hi. Tua ahih manin Pasian in Zomi dinga hong bawl pen Pasian kiang pana i ngah i saan thupha a hi hi. Tua ahih manin i Zominam hihna i angtanpih ding thupi hi. I Zongeina hoihte kemcing ni, i Zomipihte it in khual ni. i Zo aan, i Zopau, i Zongeinate leh i Zoniik, i Zopuante thupisak-in zahpih kei ni, it in, puah in, zuun ni. I Zolate it-in phungvuh in zaknop sa ni. Zominamte’ phattuam nading leh khantoh nading nasepna khempeuh-ah a langpan pawl hikha lo-in tha pia-in a semkhawm nuamte hi zaw ni. Zomite hong khenkham leh hong kitelkhial sak thei thu leh la peuhmah do in peel ni, banghang hiam cih leh Zomi hi napi-a, Zominam a thupi sim lote in Zomi a hong bawl Pasian’ thupha i saan dingzah i saankim theih ding lamet huai hiam? cih pen nisim a i kidotna hisak ni! thupha ngah tak dingin i Minam it ni.

Athumna Suangthu in Thumanna le Cihtakna Hi:


Taangtawng peka kipanin Zomite pen a thuman leh a cihtak mi i hi hi, tua ahih manin i kiciamteh nadingin Vaphual a zang i hi hi...midangte in zong tua bangmah a, hong muh leh hong ciamteh Minamte i hi hi. Ahi zongin tu lamlam ciangin tua thumanna le cihtakna i khahsuah kha dekdek uh hi. Pasian I up kawmkawm leh, Pasian’ thu i gen kawmkawm-in thumanna leh cihtakna in hong taisan dekdek tawh kibang hi. Zomite in i up, i biak Pasian pen thumanna leh cihtakna hong kal Pasian a hihi (Isaiah 59:14-15; Amos 5:24). Thumanna leh cihtakna i khahsuah kei ni, Koimun koigam ah om talehang, Zomibup nuntakna dingin i pu i pate’n an huan nadingin Suangthu Thum a zat mah bangin i khantoh nadingin a tunga thu thum kiplet ni. Khat peuhpeuh a siat khak leh a dang nih tungah nuntakna aan kihuan thei lo-in i nuntakna in siat lawh kha ding hi. Tua ahih manin hih a manpha Zomi Nam Ni hun-ah i mimal leh i Zominam bup khantoh nadingin ki-enpha-in hih Suangthu Thumte kiptakin phut pha ni!

Thukhupna:

Dr. Chin Do Kham (Late) in; 2013 Zomi Nam Ni a hong thukhak, Zomite a hong piangsak leh hong teeltuam ngiat i Pasian in, a teeltuam Israel mite a ompih bangin Zomite hong ompih nading leh Zogam Zolei mahmah hong cidamsak a "Etlawm mual kuam Zogam nuam" i suah semsem nading leh, Leitungbup a om Zomite ki pumkhat a, a bucing khantohna i neih takpi nadingin thungen ciat ding hi hang. I biak Pasian in hong ompih peuh leh a sawt loin i Zogam kil bang khangin, Ni bang hong tangding a, "thupha ngah minam" i suak takpi ding hi. Hih Zomi Namni pawi bawlna hunsung mahmah ah Zogam leh Zomite ading hibangin thungen ciat ni, hong cihmahbangin tuni-in i Minam ading thungen ni;

"Topa aw, na teltuam Zomite mawhna hong maisak inla, na maipha hong ngahsak in. A nungta Pasian thei in, it in, nangma thu a mang, a kipumkhat leh a bucing khantohna a nei minam leh gam hongsuak sak in" Zeisu Khazih min in kong ngen uh hi. A men!  Thungetna hong dawng a nungta Pasian i Minam Pasian in nei-in, Mordekai bangin i Minam hamphat nading leh khantoh nading itna tawh hanciamin, I Minam bupin Thupha hong pia thei Pasian kiangah thungen ciat ni! I biak Pasian in Zomite thupha hong pia kimciat tahen! ka lungdam.

By: Hang Thawn Tuang @ N. Tuangpu 

 


Comments




Leave a Reply