WWW.TUNGZANGNEWS.COM

 
Leitung ah mihingte i theih loh kikal in goal khat manawh a taitai te ihihi. I theih loh kikal mah in midangte tawh tai kidem tawntung ihi-a, goal tundong atai suakte mi gualzo leh mi lawhcing hongsuak khia uhhi. Tua goal khup zawh nadingin, Bawhlung sui bangin genteh lehang, amau muntek panin ma pang ciat uh a, khut khat tawi khekhat khai bangin aki thutuak Team pen hong gualzo zaw hamtang hi. Khat bek thahatna tawh kipawlna lawhcing ngeilo dinga, amau muntek pan tavuan azawh ciat uh ciangin, thakhat thu in agualzo khawm hongsuak uh ahihi.


Tuate sungah gualzawhna hong khak tan thei thu tampite sungah apoi pen in, "Phatmawh sak lohna" ahihi. "Phamawh kei-e" cih kammal khat bekbek in, goal tunzawh nading lampi khak tanlian mawk hi. Kumkhat sung tawntung hun pia in, Sang kah sangnaupang khat in, lai kasim loh hangin "Phamawh kei-e" ci den mawk leh laivuan ciangin kia tawntung dinga, kumkhat tawntung mi nungah apai hongkul hi. Nasepna khat peuh ah Company rule bangin zuilo in, "Phamawh kei-e" i cih leh Company panin hong kihawl khia dinga, hun tampi bei-in nasep zonkik kul hi.

Leitungah alawhcing mite i et ciangin, ama sepna maban khat bullet tinten a, kuhkal tak a asemsuak mite ahihi. Theology pilna asin mi khat pen, B.Th honglak khit ciangin, Law khawng hong sin dihdih leh ama' goal tung zolo dinghi. B.Th pan M.Th., Ph.D cihte abanban aciangciang ah hong zawh tohtoh tak ciangin, goal akhumzo hongsuak a, midangte' muantak ciangtak Theologian hongsuak zo pan ahihi. Tua mah bangin, Siavuan, Science, Technology, Engineering leh pilna siamna khat peuhpeuh ah izuih lampi khat atawp dong zui tinten tepen hong mualsuak uhhi.

Agamla saupi etkul lo-in, Kawlgam ah Guitar tumsiam Ko Chit San Maung bek enlehang, ama hihna khat citak tak leh lunglut takin hong hanciam toto a, ama Guitar siamna pen annkuang kician khat in hong neizo hi. Thudangte sangin ama' dinpih nasep khat ultung sak in hong hanciamna gah hi-a, a cihtak manin hiciang atungzo hongsuak hi. Zomite' tangthu ah amang ngeilo ding Bishop Felix Lian Khen Thang envat lehang, leitung ci le sa deihna tampi nusia in, RC thukhun tawh kituak in, pilna leh nuntakzia ah hong hanciam toto in, Zomi sung Bishop amah bek hipah lianhi.

Sumkuang & Bilpi:

Nidanglai in tai khat gamla goal atung masa kidem in Sumkuang le Bilpi tai hong kidem uhhi. Sumkuang pen itheihsa tek mah bangin, hat hetlo in pai ngiatngiat lel a, atawp dong khawl vetlo in hong paisuak hi. Bilpi pen tai hat mahmah ahih manin, tai tingteng in atawl ciangin, munkhat ah hong khawl in hong ihmu phot hi. "Sumkuang bel olpai mahmah lel ahih teh ka ihmu phot zongin, "Phamawh kei-e" ci-in hong ihmu hithiat a, akhanlawh ciangin, goal zuanin hong tai tingteng leuleu a, alawm Sumkuang pen ama' maideuh pi khat hal ah goal nalut suk lian citciat hi.

Ahat hetlo Sumkuang in Bilpi hongzo hi. Amau pen kumkhat in khat veita tai kidem ahih manin, amai kum ciangin tai 3 gamla tai hong kidem leuleu uh a, Bilpi pen pilvangta ahih manin, lamlai ah ihmu ngam nawnlo in, goal dong hong taisuak a, hong gualzo pahlian hi. Amai kum ciangin, tai 7 gamla tai hong kidem leuleu uh a, Bilpi pen tai vingveng in goal atung ding hita hi. Goal tun madeuh tai lang khawng in asapna munah gunpi khat kantanna lei na kisa citciat ahih manin, khuamial dong tuaci in Bilpi paithei nawnlo in hong om ngiungeu a, hong cimawh ta hi.

Sumkuang pen khuamial (Sanggam melmak) hunin tua gunpi hongtung suk a, Bilpi cimawh taka aom amuh ciangin, "Banghang in paisuak lo-a hong ngak nahiam?" ci-in adot leh Bilpi in, "Hih gunpi kantanna lei kicim ahih manin paithei nawnkeng" ci-in hongdawng hi. Sumkuang ahih leh gun sungah hong lutsuk in gungal hong kantan a, goal hongtung phei hi. Tua ciangin Sumkuang in gualzawhna hong ngah citciat hi. "Sumkuang kileh kik nawnlo in, tua goal omna panin kileh kik nawnlo in khua hongsat a, tudong in nuam satak in tengsuak hi, cih tangthu om hi.

Dal Sian Hung

 


Comments




Leave a Reply