WWW.TUNGZANGNEWS.COM

 
S. Dal Sian Pau, ZOLLS, Secretary

 

THUMASA: A 2veina Global Zomi Alliance, Tedim khuapi-ah kizang ding cih pen November, 2014 dinga, ahun kibikhiat hi. Ahizongin, March 13—17/ 3 / 2014 zat ding in kisotsuk hi. Ahangbel, Myanmar kisimpina tawh kisai thu tuamtuam a om hang hi. Hih bang thu akizak ciangin, lunghihmawhna zong hong piang, bang cih bang thu leh la kigen ding a, bang cih bangin vaihawmna nei uh hiam cih theihnopna lungsim hong guan, ban-ah, Kisimpina thu bek kigenlo ding a, Leitungbup Zomite a dingin thuthak bang kigen ding a, maban-ah Biakna lam makaite in minam adingin bang ci bangin panlaksawm uh hiam cih bang theihnopna kinei hi. Itenna kibanglo, imin ipuam kibang, ibeh iphung kibanga, ingeina kilamdanglo hi cih thupi in kingaihsun ciat ahihmanin, simbeng citciat tangzang kineih cih bangin, hih anuai ateng India Zomite tangin ka vakihelthei uh hi. 1.Dr Luaichinthang Chairman ZOLLS 2. Rev Dr Sut Khan Thang GS CBA. 3. Sia Kap Khan Muan President,ZSF, 4. Siapi,Lienkhothang,Vaiphei 5.Tang, Paulianmung, 6. Tang B.Muan Zomi Singer leh 7. Sia, S. Dal Sian Pau, Secretary, ZOLLS.

Apaite in min leh puam khat zat kul ahihmanin ZOLLS min kizang hi.Paitheina ding a sumtha tawh hong huhte 1. Pu Langkhanpau Guite ADCC, Chairman 2. Pu Kamsuanlun EM/ADC, 3. Pu Gouzamang Guite EM/ADC Lamka East A/C 4. Pu Mangchinkhup EM/ADC Lamka, West A/C 5. Pu Suanchinpau Guite ADC Lungthul A/C, 6.Pu Sianzadong ADC Singngat A/C, 7. Pu Zamkhanpau ADC Thanlon A/C leh 8. Pi Grace Zamnu ADC Muallum A/C, 8. Pu Piangkhanmang nominee, Lamka A/C amaute kiphalna hang tawh GLOBAL ZOMI ALLIANCE 2014, Tedim khuapi-ah India Zomite in kizangthei hi. Asepna uh leh a innkuan tungah Pasian in thupha namkim hong piaksakta hen, kilungdam mahmah hi. Sumtha a om hangin khe-a tunzohna ding hilo hi. Kiphaltak a, mawtaw (vihicles) atuibek kithu a, asap hong lalou a, hong zangsakte 1. CBA Pawlpi leh 2. Sia Kap Khan Muan President, ZSF-te tungah, ibiak Pasian in akipiakzohna thaman-uh sanga tamzo thupha hong piasakta hen, lungdam hi.

INN PAN KIP ATKHIATNA:Date 13/3/2014 nai 6.00 Am in Lamka panin, CBA ofis –ah thungetna nei-in, tuazoh ciangin, Tedim khuapi zuan-in Imphal—Pallel- Moreh- Sawbaw—Kalemyotawn- in kipai hi. Pallel-ah Zing-An kinei hi. Annekzoh ciangin, kipankik in, Tengnoupal Checkpostah mawtaw tamlua ahihmanin nai 2.00 sung kingah a, tuazoh ciangin kipainawn in, adang Checkpostte –ah sawt kikhawllo in, Moreh damtakin ka tung uhi. Moreh-ah, Nangphalong ZYA Unitte thusiamna hangin, hong na dawn uhi. Vanteng apua dingin mi hong sawl-uh a, ko apaiteng tangguak in gamgi kansuk in Nangphalong ZYA President-te inn-ah hong kingakkhawmsak uh hi. Tuatak-ah, ZBCM Pastol ahi, Sia Tuang Tamu, in mawtaw tawh hong ngak-a, niangtui dawnzoh ciangin Kawlpi lam zuan-in ka pai uhi. Lamkim acihna uh Sawbawah nitak –an nei in, nekzoh ciang ka pai uhleh, Kawlpi ka tung uh ciangin nitak nai 8.00 Pm hita ahihamanin, Tedim kahtolo in/ paisuaklo in “Zomi Times” Editha ahi Sia Lang Khan Khaite inn-ah kinga in, ka ngiak uhi. Editha pute innkuan nopcitak in nuam uhi. Lungsim nuamsak mahmah uh a, lungneuna khempeuh hong zangkhaisak hi.

KAWLPI PAN TEDIM: (Kalemyo to Tedim) Date 14/3/2014 zingsang nai 4.30 Am in Kawlpi pan kipankhia, Tedim GZA Kikhopna 8.00 Am lapteitei ding cih hanciamna kinei hi. Nai 8.00 Am hungelna laplemalak in, Sagaing Division leh Chin State gamgi ka khup uh ciangin amual sangto hiaihiai ahihmanin, Kawlzang Zomite tenna ki-ennuam pahmalam in Zingtho a, ka kinoh uh hong bangnawntalo, khamtung lam manohto deuhdeuh, khuadakna ding hoih deuhdeuh ta, Thangmual (White Fort) tungto, dakna ding hoih semsem ahihmanin,Zogam mual leh tangte eltlawm in etlawmlua a, dakdak nop huai hi. Thangmual (White Fort) ka tungto uh ciangin, Khuasak lampika kitung a, agallam mual-ah Kaptel khua leh khuatuamtuam kimuzihziah hi. Bangtan hiam mawtaw tawh taito in, Thuklai khua lampika ka phaktak un, mawtaw khawlsak in dakkikzel, manlakna ding hoihlua ahihziak a, foto kilakna nei in nuamsa mahmah ka program delh uh bang kimangngilh phial hi. Tua ciang bang tanhiam ka taito (mawtaw) uh ciangin, Pasta Pa Tuang in, hih mun pen Sanggam Gangte-te’n meilumzapna mun ahi acih leh Kimunuamlua zel a,ciamnuihna akigenzel lel hi inteh cih leh ataktak mah na himawk e ‘Ka kiciciat uhi. Ka laisa tampi mah si ding uh aive ka kici ciat uhi. Zogam-ah, alamdang ka sakciat uh khat om a, tua pen sing tam napi Guanam ,gua, mau cihte apo khat zong kimulo hi. Ngeisok kungbekbek thengmual-ah pohi cileng kikhiallo ding hi. Pakkhianailo a, mumzihziah hi. April kha bang in kipai leh Ngeisokpak ziazua dinga etlawm phadiak ding hi. Thangmual (White Fort) panin ka paikik uh a, amual akikhup ciangin, agal tangdung-ah Tedim khuapi nakiphalzihziah hi. Tun ding kal kingaklak taleuleu hi. Zingsang nai 8.00 Am a tung ding ka cih uh, 11.30 Am in ka tungzo pan uhi.

GZA HUNZEKZIA: A 2veina GZA khawmpi hun sungin hunzatzia pen zekailua cih omlo a, ze-ollua cih omlo in, hun ngahte in hunmanzat siam uh a, presentation ze-ol a, omleh dak kikhek khum ding ci-in hunkem inpulakzel ahihmanin, hunmantak in kizang sensen hi.

Dated 14/3/2014 7.00---7.45 Am—Kiallap (Breakfast)

7.45--- 8.00 Am Phatna La

8.00—9.30 Am Input(i), Zomi le Khuasiam nasep Rev Dr Do Suan Mung.

9.30--- 11.00 Am Input( ii). Zosuan Tuallai pan muhkhiat thute pulakna Zomi innkuan Singapore pan

11.00-12.00 (Sunnung) Annekna

2.00-1.30 Pm Input (iii) Zomi le Pilna lam Prof C Thang Za Tuan

1.30—3.30 Pm Discussion, Focus on Census.

Date 15/ 3/ 2014. Input iv. Zomi le imaban Evan, Lang Do Khup leh Rev Pau Khan Khai

Input v. Zomi le mailam khantohna Dr Cing Pum Neam Nitak hun simin, Music Concert leh Thugenna in kizang hi.

 

VAIHAWM NA PAN THUKHENSATZIA: Hih Input piate thugenna panin Central komitite in “Zomite adingin thupi (points) asakte uh lato in ciamteh uhi. Tua athu ciamtehte uh Centre Komiti in ahoihsakte uh mipite zuih dingin simkhiapahlo uh a, amau (CC)te in mipite thukhensakzawsop uhi. Mipite hoihsaklote pointte pen sepsuah dingin ngaihsunlo uh a, mipite hoihsakte pen sepsuah ding in thukhensatna hoih pen in thukimna bawl uhi. Vaihawmzia pen Democracy mahmah uhi. Makaite(leaders) leh mipi paikhawmte (Delegates) thukilaktuahzia siam in siam mahmah uhi. Kizuihlo leh kinial a langpan ding zia zong omlo hi.

KILANGPAN NAPI ATHEIHTEL UH CIANG: Kawlgam Zomite pen thulamdang pi hive uh aw, Bang hang hiam cih leh, kisimpina(Census) pen kipiak bawl uhi. Kum 2015 kitelpi hun ciang ding kisakkhawlna bangin ngaihsutna aneipawl ana om uhi. Minam minsalo uh a, Palti (party) vai nasa uhi. Muntuam leh gamtuam pan a GZA Khawmpi uapte in kiciantak a, agen uh ciang, Census pen Palti vai hikei ci a, atelsiamte in mipi maiah, dingto in, kei leh ka paltite (party) in tuni akipanin CENSUS Form –ah “Other” kicihna 914 –ah “Zomi” ka gelh ding uh ci-in mipi theihpih in genkhiaziahziah uhi. Thulamdangpi hi uh---, Khawmpi hun sungin, Sanggam Siyingte in Rangoon panin fon tungtawn in “Zomi” ka gelh ding uh ci in thukiza hi. Ngawnte in zong ko zong “Zomi” ka gelh nuam uh cih thu akizak ciangin, Census komitite Ngawnte area a pai ding in Kawlpi ( keleymo) komitite kisehpah hi. A lungsim uh siangtho in na atheihtelzoh uh ciangin langpanpanlo uhi. Ettehtak uh a, Ettawn huai uhi.

GZA THUKHENSATTE: Tedim GZA Thukhensatte atomkim in anuai ah kong taklang hi. 
1. Kum 2014 kisimpi March 29, zang akipan in Pu Zo suan leh khakte in “Other— Code No 914-ah “ZOMI” gelhciat ding ci-in khutlapna tawh kikipsak hi. 
2. Kum 2020 ma-a, Tedim Khuapi-ah inn 500 behlap ding. 
3. Laipilna anei sangnaupang, siammahmah nu leh pate in neizolo (support) te pen GZA Education Dept in pattah ding in thu khensatna kinei hi. 
4. Kum 2015 GZA Khawmpi pen Zogam khuapi ahi Lamka-ah zat ding kikipsak hi.

ZCD ZUM-AH KAMKUPNA: ZCD ofis –ah, Zingsangin, kiallap (Breakfast) kine a, amau (ZCD) makaite tawh holimna kineitheih hi. Athupen, holimna-ah kisimpina tawh kisai hi a, iminamte in Palti (party) in hong en uh ahihmanin, kidawmtak in vaisai na siam un aw cih thu kigen hi.Tualo-in, amun mun-ah khangno kizangte mah zatdan na siam un zong kici hi.

ZOMI SIAMSIN MYANMAR TAWH KAMKUPNA: Tedim panin Date 17/3/2014 Zingsang nai 5.00 Am kong ciah uhi. Kawlpi (Kalemyo) a, Zomi Siamsinte tawh holimna kineithei hi.Zomi Times Editha Lang khan Khai in hun uk in, ZSF President ahi Pu Kap Khan Muan in thugenna hun hong zangin tuakhit ciangin S.Dal Sian Pau Secretary ZOLLS in tuhun thupiangte leh Mailam hun-ah kimuhtotto apoimawhzia tomkimtak in genna hun zang hi. SIANGSAWN (Pau Cin Hau) Tedim khuapi pan 2km a gamla mun khat kawlgam kumpite in Pau Cin Hau Pawlpi siangsawn akicite a dingin gamkhat piakhia hi. Tua mun pen mawkluttheih hilo hi. Phalna nget masak kul hi. Zomite adingin mun poimawh leh gam dang mite in Zomite in biakna tuam leh lai tuamvilvel na ihihna hong theihpihna khat ahihman in “Siangsawnte” in Zo ngeina, Zo inn, Zomite go leh ngamte tuamtuam ban-ah Pau Cin Hau in British Kumpi tung pan Award asante khawn muhtheih in om hi. Ettak in, lungsim thak hong guanzo kisaciat hi.Etcimtheihlo hun kingah hileh sunthapai a et thei ding Zomite khanglui thu leh hun paisa a, thupiangte kantheih ding tampi om hi.

CIIMNUAI PHAKNA: Date 16/3/2014 (Sunday) Zingsangin, Biak inn tuamtuamah biakpiak kikhopna kizang hi. Rev Dr Luaichinthang, Rev Dr Sut Khan Thang, Siapi Lienkhothang Vaiphei leh keimah S. Dal Sian Pau Leilum EBC Biakinn ah kikhawm in nuam ka sa mahmah uhi. ZSF President, Tg Paulianmung leh Tg B. Muante EBC Centre Church, Memyo-ah kikhawm uh a, kikhoptawp ciangin, holimna hong neihpihtuak uhi. Nitaklam nai 2.00 Pm in Ciimnuai en ding a pai ding kisawm a, mawtaw lemtanglo ahihman in, kipaikimtheihlo hi. Apaite in muhnop asakthu uhleh athupizia, Zomite adingin kep a,zunto dingin hoih a sakthu uh gencimtheilo uhi.

ETTEHTAK LEH SEMKHOPTHEIH DING: 
1. Haksakna bangteng a om zongin, Kawl kumpi in agakcip zongin, iminam min ahi ZOMI mah citinten uh a, Pau awkaih tuamtuamte thupisimlo uhi.
2.Zu leh Sa tawh kibual nam makai ngaisang hetlo uhi. 
3. Beh leh Phung pailo in minam pai uhi. 
4.Zingdo siamna talent tuamnei uhi. 
5. Khuapi sunga nekthei tuamna, palasitik cih bang kimawkpaihlo.

Sepkhopthei ding pawlkhat
1. Ciimnuai Project Rev Kai CinMang mi a-awlmawh bangzah hiam in pankhia uh a, eilamte in zong mabunpih hi. 
2. Tualsuakmi sukkiptheihna om sun Pau Cin Hau Script , Zotuallai zatkhoptheina ding panlakpihthei hi.

THUTHAK KIZA : Pau leh ham thu tawh kisai in Zopau leh Zolai bangtan tung hiam cih Zomite in itheihnop ding zong kilam en hi. Pasian in Zopau amanthat ding hong phalpilo ci leng kikhiallo ding hi. Topa hong deihsakna kitangin
1. Australia gam sungah Sangpi (University) Victorian School of Languages (VSL) ah Zolai leh Zopau sintheihna ding phalna hong pia in Zomi ahilo gam dang mite in Zopau leh Zolai sin uh hi. Hih Sangpi-ah Pautuam 40 val sinna sangpi hi a, Zomite Pau zong kisinta hi. Sangnaupang 13,000 om a, hih sangpi pen kum 1935 akiphuan ahihi.
2. Zomi Association USA Education Dept mabung na hangin Nov 7-2012 in USA Sanginn (High School) United State gamke ahi Oregon State, Portland High Schoolah Zolai Second Language khatin hong sansak uh a, tu in, Zolai, Zopau Ei Zomite kia hilo mikangte leh mivomte ban-ah high school sanginn ah subject khat in sin uhi. Pasian min thangta hen.

Thukhupna: Zomi leh Zogam a dingin, i omna ciat panin mabungin, thu leh la khatpeuh semkhawm in khangsawnte ki-itna ding leh kingaihnatna ding sep leh bawl atamzaw sem-ah kizopna nei leng, gamgi pen apoimawhlua hong hilo dinga, “Mabang pangkhawm in mabung khawm ni” Phamsa Dr Chin Do Kham, gen pen tuhun, biakna leh leitung vaisate lungsim ding ahizia Tung Sianmangin, mimal kim tungah hong sungta hen.Heina kidan in, gam leitan in hong khen hangin, I ngeina in hong khenlo a, ibeh leh phung in hong kinaisak in, ipau leh lakamte kilamdang nailo hi. Zomite Pasian thupha hong pia ta hen.

Lungliaplo aw Zogam lei------,Sian in lum bang hong sun ding a ni hong tang ding--------- LUNGDAM, KIPAK

- See more at: http://www.zogamonline.com/world/general/item/1151-the-2nd-global-zomi-alliance-2014-%7Cdelegate-team-report.html#sthash.O8bAc3Oj.dpuf
 


Comments




Leave a Reply