WWW.TUNGZANGNEWS.COM

 
PicturePu. Zo Khai
Zogam leitang-ah mipum-in gamtaang theilo-in internet bekmah vaaikuanna-in nei kahihman-in sepding mangngilh liang-in hong suutzeel-ing. Pu Zokhup' cihdaanleh "Soklek piak" siamlo-in, cidam nading Quinine piak siambek kahih man-in, kha mahmah taleh nana-ne teeiteei un ci-in hongthuum-ing. Athu pan-in, tu sungteng Zogam-ah milipsimna vaai' ading akuankhia phangphang-tawh, mipi kimuhkhopna abawlbawl-tawh, internet pan-a lungdeih asuutsuut-tawh I' vekpi-in minam naseem-in kimanlah kimtek ahihlam internet laaimaai pan-in kilangh-a, alungdamhuai mahmah ahihi.

Tua sung-ah pawlkhatte-in "Zomi kicih nading" thusunna tung-ah veenglehpaam adiak-in Laimite gaalbawlna bang-in angaihsun om-a, thukhual tak-in thusunna nei-hi. Pawlkhatte-in "Zomi-pen kumpi'n theikei, Chin-mah theizaw, Chin State sung-ah om I-hihteh,…." aci-zong ki-omhi. Hihte-pen kei' muhna-ah minam gui paizia ciantak-a I' tel naailoh manbek hi-a, kuamah gaalbawlna hilo, mi' theihna bihtheih hilo hizaw-hi.

Eite' Hihna Maan (Our True Identity)

Milipsimna-ah "I' hihna maan gelhding" thu-pen kuamah demna, langbawlna leh tuamtatna hilo-hi. State minlehpuam-tawh kisai kilkel lo-hi. Australia hong genteh pakleng: Victoria State-ah Zomi a-omna kiciamteh-in Zomi Minam Kipawlna-zong Victorian Government-in minsaanna (registration) hongpia-a, Zomi-tawh kisai ngeina, paulehhaam-a kipan minam vaaite suakta tak-in kihah kizuun thei-hi, banghanghiam cihleh democracy kiukna ahihman-in minamte amau' hihna ciatciat kizahtaak sak-in, kiphungvuh ahihman ahihi. Victoria State-pen Zomite' taangteenna hilo, khua I' saatpih-zong hibeek lo-hi.

Tua ahihman-in Kawlgam sung-ah koikoi State-ah I' teen ziak-in I' hihna akikheel theidaan hilo-hi. Minam cihpen sisan hi-a, ngeina huampi khat azanghkhawm mipawlte cihna ahihi. Chin State Leilulam diakdiakbang Zomite' khuasaatna, ataangteenna, leitang-mahmah-tawh anuntaakna ahihman-in banghang-in eima' Pupa' Gamlei-ah I' hihna maan pulaakding lunghiang theimawkding I-hihiam? I' hihna maan pulaakna leh namneu dangte elna leh langpanna koici kipaaikaan laaizangding ahihiam?

Kisimna malsim 914-ah "Zomi" ci-a I' gelh man-in, ahihkeileh "Zomi khempeuh-in 914-ah 'Zomi' gelhni-ei" ci-a sisanpihte' kiang-ah thusunna leh zotnate I' bawl man-in ki-elna, tuamtatna leh adiak-in I' it mahmah Laimi, Cho, Matu, Mara……. cihte langpanna hi peuhmahlo, akisai khalo ahihi. Laimite-in Khalkha, Thantlang-ah "Laimi kici ni-ei" acih uhleh ei adangte-in "tuamtat, hong langpanghi,.." kici thei mawkding ahihiam? Kawlgam thuneite' kiang khawng-ah, "Hih ……te-in Laimi kici ding-in Hakha leh Thanthlang huamsung-a mite zawn-hi,…" ci-in khiat theihdaan hilo-hi. Amau sung-ah Zahau te nangawn-in a-ut keileh amau gelh loding hilel-a, hihna maan zongkiik-a ahaanciamte thumaan naseem ahihman-in akiim apaam-a kual/khawk/boung te' phunsan theihzong hilo-hi, banghanghiam cihleh thagum-tawh kilauthawn-a zawhthawh thupiakna hilo-in, sisanpihte-tawh khut kiletkhopding zotna hi-a, thuhoih ahihi.

Zomite-in I' hihna maan apulaak ding-in I-kizot-pen Pasian' deih-tawh kituak-hi. Asisanpih itthei, abeh aphung, a-u anau, akhua atui itthei mite' tung-ah Pasian heh loding-a, asisanpih khempeuh-tawh luankhop nading adeih mi-pen Pasian-in khialsak ngeilo ding-in um-ing, banghanghiam cihleh Pasian-in aki-it liailiai ding-a hongdeih Pasian ahihi. "Zomi" I' gelh man-in Zomi akicilo minamte elbawl, langbawl, gaalbawl nading thu a-omloh mahbang-in tuabang thugen leh laaigelh-zong omlo-hi. Tua ahihman-in "Zomi cihpen midang langpan nading" peuh-a a-ummawh sanggamte-in lunghianglo tak-in "aw, Zomi I' kicih man-in mihelsia, mituamtat, milangbawl kihi peuhmah keive-e" cihding hita-hi.

Eima' minam hihna maan pulaak nading-pen mihing khat' ading-a hihloh phamawh thu ahihi. Pawlkhat leuleu-in "Zomi I' hihna abei theiding hikei, kumpite' theihna omsa mah-tawh gelhding hilel" aci ki-om zeel-a, hihpen akhial muhna ahihi. Minam hitaleh mimal hitaleh "min (name)" vaai-ah mi' sapna, mite' hong lawhna-tawh alungkim a-omleh mibanglo cihna ahihi. Keibangpen ka' min mal-khat akihel "Khai-a" hong kici bek nangawn hilhcian ciatciat kahihman-in amihai phitphit zawdeuhte longal-in "Khai-a" hongci lo-hi. Min kisapna-pen ataangpi asam mite-in amau' theihdaan dungzuui-in sam zaw-a, sap athuakte-in amaan apulaak keileh tua asamte' sapna kizom toto hilel-hi. Asamte khial lo-in, sap athuakmi akhial ahihi. Tua ahihman-in "Chin" hong kicihna pan-in "Zomi" hong kicih nading-in a-Zomi ahi nang leh kei' tungbek-ah aki-nga ahihi. "Zomi hihna bei kenteh" ci-in hongsam mite' tung-ah amaan pulaak ngeikei lehang nidang ciang-in Zomi beilo cihthadah "Zomi" cih kammal/laaimal mahmah beimang lelding leiung paizia ahihi.

2014 Milipsimna (Census) leh Mipi' Lametna:

Milipsimna-ah adiak-in 914-ah "Zomi" I-cih man-in Zomi State/Zogam State apiang pahding, kiukna ahihkeileh eile-ei thuneihna (self determination) ngahpah phauphauding, topenna (independence) ngahpahding cihbang hi deknaailo-a, "Hihna Maan-tawh Din" nading "tawphah (foundation) khat hipan ahihlam phawkding hihang. Minam sung-ah thuneihna leh hihtheihnate (authority and rights) a-om loh-in democracy kici theilo-a, thuneihna leh hihtheihnate I' ngah nading-in mipi luankhopna akisam ahihi. Mipi luankhop nading-in I' minam min tu-a ateel phiingphiingding hi-phial lehangzong "Zomi" bekmah honghi mawk-hi. "Awsuah" bih-a kilawhnate ki-tawphah theilo-hi, banghanghiam cihleh gtn. Dim awsuah-in Dim awsuah azangh tengbek huam ahihman ahihi. Sihzaang-in Zo ahuamloh mahbang-in Zo -inzong Sihzaang huamlo-hi, banghanghiam cihleh "awsuah" zil-a kilawhna ahihziak ahihi. Tua ahihman-in "Zomi" longaal I' luankhop nading mindang omlo-hi. Tua hi-in, "Zomi" kicihna-tawh mitmuh-in taksa hamphatna hong kilangh zaizai pahding ahihlohna, "Zomi" longaal teelding a-omlohna, minam' thuneihna akhan nading-in luankhop akuulna cihte nosuah sak-in, thudangdang I' lamet sang-in "Sisan Khatteng Kigawmna" bekmah lametpi-a neihding thupipen-hi.

Zopau or Zomi Paukam leh Tedimpau or Tiddim Chinpau: (Zomish or Zomi Language & Tiddim Chin)

Gaalkaap paizia thagum kiukna leh thuneihna letcipna (dictatorship)-tawh 1948 kum (U Nu-in democracy daan-tawh kum 10 hong uk hang-in azuaupi-uh hi-a, thuneihna letcipna-pen Kawlgam Suahtaakna hun pan-a akipan hilel-hi)-a kipan aki kalsuan ciang-in Tii-Ting Chin, Hakha Chin, Falam Chin ci-in Chin State sung-a minamte nampi thum-in hongkhen uhhi. Hih-pen Chin State sung-a mihingte-in cikmah hun-a azat ngeiloh-uh hinapi-in angsung zonna-tawh Kawlmaangte maaivilna-tawh Zomi ulian neihsunsunte-in hong kipsak pha-mahmah uh-a, Kawlmaangte'n nampi thum-a hong khenna gawmtuah kiikding cihthadah, Thantlang Chin, Matu Chin, Mara Chin, Zo Chin, Khumi Chin….. cihbang-in kidembawl liangtak dinmun kitung-a, hong khenthaang nuam-a hong zilzil Kawlmaangte-bel nuamlua kisa-in maaipuam hiuhiau liang-hi. Tua hunsung-in amau' thuzawh, khasum-tawh acial-uh Zomi penglam pawlkhatte mahmah-inzong siamsinna lam-ah Zolaai sin nading-in naupang poem aphuahna uh-ah,"T - Tedimpau, eima' pau" ci sawnsawn-hi. Pu St. Hau Go-in minam hihna maan paammaih sa-in ama' mapanna biaknalam ahihna-tawh kizuui-in ZBC hong phuang-a, khangthakte'n ahihleh Kawlte' ngiankawi-mah lel-in ZBC hong kicimh laailaai-hi.

Kawlgam thuneihna nuai-ah Zomi buppi akiat hun 1948 ma-in Tedimpau cihbang om ngeilo-a, Tedimmi cihzong om ngeilo-hi. Hihpen Kawlmaangte' lamzawikaih (???? ?????)hi-a, adiak-in thuneihna leencipmi (dictator) te' idea ahihi. Dictator te' idea-pen leitung buppi-in adiak-in democracy-in anial ngiat ahihi. Zogam-ah ahihkeileh Kawlgam-ah democracy cihcih kawm-in "Tedimpau, Tedimmi, Tiddim Chin" I-cihcihleh Kawl gaalkaap kumpite' idea a-tawisaang denkeei cihna ahihi, banghanghiam cihleh minam saatkhap nading-a akhun-uh lampi tawn/zuui beklo-a thapia, tawsawn, mapang cihna ahihman-in anti-democratic believer cihna ahihi. Hih "Tiddim Chin" cihkiau bekbek-in Chin State enkei-ni, Tedim leh Tonzaang huampi sung-a sisan khat, laaiguizom khat ahi eiteng nangawn hong sukham, hong tenneen mahmah zo mawk-hi. Falam, Khalkha gennaai peuhmah kei-ni, Zomi akici behlehphung khat, sunghlehpu, tulehmaak huamsung khat nangawn hong toksia-zo mahmah ahihlam kilangh biubeu-hi. Mimal muhlehtuah khat-ah; ka' neulaai-a akigen ka' ciaptehna-ah "Tedimpau akici-pen Laamzaangpau hi, tualo, Tonzaangpau, Vaangtehpau, cihte awsuah zuui-in om diimdiam" ci-in Pu Son Cin Lian te' innmaai-ah amah leh Pu Gin Za Cin (puteek khat omlaai, amin theikeng) akiho za-ngei-in ka' bilkha-ah mang ngeilo-hi.

Zomite hongki tenkhapna "ling (???)"-pen eimah-in zanghzangh nawnlo-in, I' hihna maan ahi ei' pau-in "Zopau", Kawlpau-in "Zomi Sa-Gaa", Mikaangpau-in "Zomi Language or Zomish" naakpi-in khangthak sung-ah I' tuh, I' vawh siamding ahihi. Kawl leh Vaaite' pau anuamtuam I-hihleh cihna hikeileh namdang khempeuh-in ei' pau-pen "Zopau" ci-a hong theihpihding adeihhuai penpen ahihi, banghanghiam cihleh English amihing hi-a, apau alaai-zong English hilel-hi. Zomi, Zopau, Zolaai, Zogam amaanpen ahihi.

Sahkhua lumlehna Kipawlnate (Revolution Organisations)' Ngiim Leitang:

Zomi minpua-in gaalhiamtawi kipawlna pawl nih kinei-hi. ZRO leh ZIA hi-a, ka' telkhial keileh amau' tuplehngiim leitang-pen tu-a Chin State buppi leh Sagaing Division sung-a Guunkhawm leh Kawlpi, Tamu Kuampi sukteng genloh, Mizoram State, Manipur State adiak-in Zomite' teenna huam ciangciang, Assam leh Chittagong Hill Tract nangawn angiim-uh ahihi. Hihpen kumsawt zawizuihna (longterm policy) ahih mahbang-in contemporary or present issue akici tu tadih-a aki phukha nawngkaainate-ah hong kigolhding lemtaang khollo ahihman-in mipi-in lamdang sakding hilo-hi. Khatveivei Saaipi angiim mi khat-in sakuh khat amaai-ah apai ciang-in akaap loh-pen I' va paupih kankanding kilawm khollo maiding ahihlam mipi'n theihhuai-hi. Amau-tawh kiholimna I' neih nopleh lampi omden lelding-a, kipawlna khat zahpihna-hiam, ngaapgawpna-hiam peuh-tawh anaupangvaai-a mawkpaupau tepawl kidopna-in minam piicing sakzaw dinghi.

Adiak-in hiamtawina-pen luangkhamna hi-a, luangkham mite' thu atheinuamte-in kizoppih zongding, hopihding, phone-tawh honggen nopkei lehzong amau' policy hilelding ahihteh mimal kimuh nading geelpah, tualo-a, namdangte' nuihsan nading-a ei' minam minsel luangkhamte-khawng pheenggen lohding ahihi. Adiak-in, namdangte' kihelna groups diakdiakte khawng pan-in zahkona, nuhnauna I' bawl khaakzeel ciang-in, hong piimuh ding-a I' lamet tua namdangte-in hong piimuh peuhmahlo thamlo-in, "hihpa-in amau' minam gaalkaapte nangawn hici ko-ngam ahihteh,.." ci-in ciamteh ding-a, amau' lak-ahzong hongdeih peuhmah loding ahihlam telkim lehang cidamhuai penpen dinghi.

Minam Kipawlnate:

Minam kipawlna-pen leitung gam khatna atung khinsate' lak-ah khauhpai penpen-a, LZI, Zomi Innkuan tuamtuamte, ZAM, ZAA, ZAUS, WZC, ZYA,.. cihte bekbek kinei lingleng-hi. Amau' munciat-ah lianthei mahmah uh-a, ahuampi-in neuthei mahmah uhhi. Kiukna (politics) lamsang kipawlna ZCD longaal minam minpua kinei lo-a, biakna abulphuh zawdeuh GZA cihtengbek kinei-hi. Awsuah bih-a kipawlna-zong omkiukiu-hi. Hih kipawlna-ah akihel Zomite ataangpi-in amau' kihelna/mapanna pawlpi kihum ciat bek-a, kipawlna tuamtuamte kihelkhawm-a kamkum khopna aneihlam-uh kiza ngeilo-hi. Thu-hoih khat omleh, "ko' kipawlna-in ……." ci-in a-innteek kituh thei bilbel, asia khat omleh kilepsiam bilbel cihbangciang dinmun-ah ki-om laai-hi. Khut kiletkhop ding athu-in gengen, "ko' cihcih, ko hihdaan khensat khin-ung,……" cih-a kipan kihuallohna naakpi-in kilangh mahmah laai-hi. Hihbang dinmun-tawh kikalsuan totoleh Kawl Gamukte-in (gentehna mawkmawk-in) gamlei leh thuneihna hongpia lehbel kuateng-in gawi atuak-tam? Kuateng-in pulpit hongtuh ziau-tam? Kuateng-in paampaih athuaktam? I' kampau, gamtatte khempeuh-in "bangthu piangthei" cih ahiauhau honglak-hi. Zozum Pu Khup Mung te' video khat-ah, "Vaantung Gam no' hawm hileh atung tamkei si'nteh" acihdaan kiau-khat ngaihsuttaak mahmah khat ahihi.

Kipawlna lamsang Zomi ataangpi-in, "kipawlna tamlua" kisa ciat-hi. Ataktak-in minam' ading alunggulh takpi ciat I-hihleh 'hiang' tam seemseemleh phungcing seemseem cihna hi-a, I' phung vuklo I' hihman bek-a kipawlna tamlua akisa ahihi. I' phung vukciat lehang hih kipawlnate tawmlua mahmah laai-hi. Singkung lianpi khat-in hiang tampi aneih keileh liim neilo-in kibeel lo-hi. Media lambang ka' theihkhial keileh Kawlgam sungbang-ah minam-vaai thusuah tangtang laaihawm kician khat mahmah-zong akinei naailo-in ka-thei-hi. Online Media nangawn Zomidaily, Tongsaan, Zominam cihteng khawngbek (a-omlaaileh kizasak ni-in) himawk -a, Zogam, Kawlgam sung-ah palaai kician nei meello ahihman-in thuthak-zong gamsung leh minamsung thupiang kizaakna kiziakaai mahmah-hi. Siamsinna lam-ah hitaleh cidamna lam-ah hitaleh kiukna (politics) lam-ah hitaleh business lam-ah hitaleh area tamtampitak-ah kithuzaakna kician kinei lo-hi.

Tua hi-a, minam kipawlna tam sa-a phunphun taakding kipawlna nei naailo hihang. Kipawlna leh mapanna naakpi-in kisamlaai hang-a, tua kipawlna khempeuh-in aphung-uh atheihding, avuhding akisam ahihi. Mihing sahkhua' kum 100 tanzil-in kalsuanna ahihleh tualniam laai mahmah-a, kipawlna khat leh khat ki-elding ciangbek I' theihpen hilaai ahihman-in kipawlna tam akisa ahihman-in, kipawlna akhiatna thei-in I' phung theihtelding hong sawt nawnlo saamding ahihman-in akician ngiimna-tawh kipawlna tampitak Zomite-in I' kisam laai-hi.

Mimal:

Mihing maantak I' mite' tung-ah, mite' cihna, mite' upmawh, mite' deihdaan tung-ah ding lo-in, eima' hihna maan tung-ah dinkip hamtangding thumasa-pen ahihi. Pasian' thu-a kipan leitung thu khempeuh-ah I' hihna maan leh I' theihna amaan nading-in I' zaakna, I' muhna leh I' theihna khangkhaan kuul-hi. Akigen akigelh, akisa thu leh late khingkhai-a, amaanpen ahihkeileh akinaaipen laaksiamna kisam mahmah-hi, banghanghiam cihleh a-omsa leh apiangsa thu leh late simloh, theihloh-in thumaanpen leh I' hihna maantak nangawn theihziau ding-daan hilo-hi. Khanggui nangawn aki kancian ciang-a akithei-pan, behlehphung nangawn suutcian ciang-a akithei-pan, biakna nangawn Laai Siangtho simsim-a, akigelh khempeuh saaituah/gawmtuah theih ciang-a upna kician-pan cihbang ahihman-in akisung, akisuut thu leh late paampaih lo-a, thuksuk guap dingbekbek ngaihsun masa lo-in lungsim takpi-tawh zia-om leh uptaak (reasonable & trust worthy)-hiam cih khiangkhai masa phot-a, uptaak ahihleh umpah, zuihtaak ahih zuuipah lehang khangtoh gimnam mahmah dinghi. Reasonable mahmah, trust worthy mahmah khat um theilo teeltaal, saang nuamlo tentan cihpen khantohna-tawh kilehbulh hi-a, kohkang (stubborn) akici, ngawngkhauh, azual theilo, akizol theilo sakolbengtung (donkey)-tawh kisuun kici liang-hi. Tuabang I-hihloh nading eileh-ei kibawltheih, kipuahtheih ahihi.

Thukhupna:

Minam leh biakna lam-ah makaai upa khempeuh tung-ah bangmahlo keibanglel-in kahong thuum ngaungau thu-in; bangbang ahizong-in, lawhcing lawhsam talehang awsuah zuui-a kideidanna-tawh kizom gamtat kampau naakpi-in hong kikeem tapeuh un. Hong langpan phiallehzong na' sungh na' pute, na' tu, na' maakte, na' beh na' phungte-mah, na' sisanpih-mah ahi uhhi. Kigawmkhopna, kithuhualna leh khut kiletkhopna-pen itna lo-tawh apiangthei hilo-hi. Itna-in deidanna neilo-hi. Zuauthu omlo-in, kiliansak lo-hi. Ahibangbang-in zahtaak siam-in, thupibawl siam-hi. Kom nuam-in, huai nuam-hi. Khangto saknuam-in, phungcing saknuam-hi. Sahkhua thutanna (social justice) thupipen mun-ah koih thei-in, sahkhua gawmtuahna (social inclusion) thahaat sak-hi. Namdeina (racism) langdo-in, sahkhualamsang paampaihna (social exclusion) naakpi-in do-hi. Hite lo-tawh tuma kum 100 pan-a mihing bang-a anne tuidawn-phiing Zomite cihthadah Christian kum 6000 laaipek-a Hebrews akici Israel minamte-zong kihual theilo-hi. Zomite' ading tua' zahnih-a haanciam-a kisinding ahihi. Uino nih zualsak masa lo-in saguh na' piakleh amau te-nih saguh kituh-in kipetgawp dinghi. Mipite piicin nading kisam mahmah-hi, mipi amakaih makaai upate azah nih-in piicin nading thupi leh kisam zawtham-hi.

Atawpna-ah, makaaite upate-in mipite' naseem ahihlam-uh hong kitelcian leh-a, "mipi-in amau' cihcih akawi amaam-a zuihding" hong lunggulh masa keipeuhleh mipi' zuihna hong limci zawkaan dinghi. Makaai upate-in I' phung thei-in, kipawlna khat leh khat khut kiletkhopding masuan-in hongneih naakleh bangmahtheilo mipite ki-el, ki-gaal, kilangpanna cihte hongbei-in, Zomite' Suunni Mual-ah hongsuak dinghi.

Zomi Pasian' Thupha!

By: T. Zokhai

Melbourne, Australia



 


Comments




Leave a Reply