WWW.TUNGZANGNEWS.COM

 
Lamka Sung Tedim Road Maban Ding

I theih ciat bagin Lamka Khawpi sung Tedim Road puahphatna (Police Station – Lanva Lei, about 1 Km) 90% zawh hi ta. Amasa penin hici bang hong piantheihna dinga pan ana la khempeuh lungdampihna leh zahtakna ka pia hi. Lamka khangthu a dingin a hoih pen a kibawl hi. A mite genloh i mawtawte pau thei le uh: “Pite aw, Pute aw, ka laisai nuammah si e! Lungdam lua ing. Tu’n ka tunga tuang ka pi leh pu in zong ka hoih leh nopdan hong cian ta ding uh hi. Tu ma teng bel lampi kuak buannawii leh vuikhu tawh kei zong gim mahmah ing,” ci dingin ka um hi.

Kumpi lam a kipan hih theih tawp hi dingin i um hi. Tu’n ei Lamka mipite’n (Zomite’n) bangci bangin puahin zuun ding ihi uh hiam? No leh ko kici tuam om lo a, hoih, kilawm leh nautang ading a zong safe thei pen ding ngaihsutna sungkhawm a, i sepkhop ding uh kisam hi. I lamlian uh nalla leh nalla kikal pucca in hong kibawl hial leh lian huntawk mahmah hi. Tuletu ading in keklet sangin kephoih poimawh zaw ding bang hi . Tua ahih manin mi tampitak in i kisaktheihpih (adiakin Zomite’n) uh Lamka Khawpi leh a laizang a paisuak main road ahi Tedim Road pen Light House/Sielmat Lei pan Lanva Lei kal anuai-a bangin ciamtehna leh kephoihna nei leng hoih mahmah ding hi:

 

1. Lamlian khenna dingin a laizangah rong kang (white) tawh line khat ( hi thei hi leh line thum a lai yellow leh a nawl tuak a white) a vangkima ciateh ding. Hih in left leh right lane hong theiciansak ding a, accident a om zenzen leh kua dik zaw cih hong theisak ding hi.

 

2. Khuapi sung ahih mah bangin Speed Limit 20/Km cih mun lemtangna bangzah hiamah tak ding leh mipi in zong zui teitei dinga ‘press release’ bawl ding.

 

3. Lamlian kisuktuahna (crossing road) poimawh zaw diak tengah Speed Breaker leh lamlian kantan utte ading tawh ciamtehna bawl ding, eg. Tipaimukh Junction, Nehrumarg Junction, Red Cross Road Junction, Don Bosco Road Junction, Lailamveng Road Junction, Thangho Street Junction, GS Road bul – Damkam’ Bazar, Dorcas Road Junction, etc.

 

4. Town Bus or Diesel Auto te Stoppage mun bawlsak a, tua munte bek ah khawlsak gige ding.

 

5. School kuan leh tawp zing lam nai 8:00 – 10:00 leh nitak lam nai 2:00 – 3:30 kikal sung teng Truck leh Rickshaw sik/sing/gua pua peuhmah lutsak/puaksak loh ding. Zing lam nai 8:00 a pat nitak lam dak 4:00 tan truck leingawi/stone/ bricks/ cement/ iron lamlian gei a loading or unloading bawlsak loh ding.

 

6. Two wheeler hi in four wheeler hi leh driver peuhmah in break light leh side light ahi ding bangtaka zat ding. Khuamial ah beam light zat pilvansak ding. Accident khak ding lauhuai lua hi.

 

7. Lamlian gei a teng leh dawr bawl khempeuhin inn kong ciat zing leh nitaka sianthosak gige ding.

 

8. Mipi khe a paite in footpath kia zuih ding banah footpath laka meh leh dawr vanzuaksak nawnloh ding.

 

9. Lamlian gei-a inn nei khempeuh in kum khata khatvei ta a rong nuhthak a kilawmtak a omsak gige ding ngeina banga neih in i khawpi uh kilawmsak tuam mahmah ding hi.

 

Awlmawhna tawh muhtawm leh ngaihsut tawm thuah a kong gelh hi a, kilawmlo leh genval khak a om leh hong maisak un.

 

Lamka itna leh khualna tawh,
Dr. Neng Ngaih Lian

Lamka

 


Comments




Leave a Reply