WWW.TUNGZANGNEWS.COM

 
Souvenir: "MUVANLAI" (Lamka ah Baptist Youth Fellowship 50 Cin Phawkna)

Tedim ka zin in Lamka pan hong kipuak Lamka ah kibawl souvenir MUVANLAI ka ngah ciangin nakpi takin ka lungdam hi. Editor Dr. Neng Ngaih Lian in hong khak ding thu hong gen khit ahih hangin tua mun ah ka ngah ding ka lamen ngam kei hi. Hong puak Sia Dal Sian Pau pen Zomi sungah Zolai leh Zopau a buaipih leh a kin, a kan, a sem hi a, Lamka pan Tedim ah Global Zomi Alliance (GZA) Khawmpi a 2veina sim dinga hong pai ahi hi. Kei zong a tua ding maha Singapore pan ni khat a Tedim a tungto ka hi hi. Ka kituntuah uh ciangin lamdangsa in ka lung a dam mahmah hi.

Tuiphum Khangno Kipawlna (CBYF) kum 50 cin phawkna laibu MUVANLAI pen a lim leh a mel ka muhsa hi a, internet ah a lim leh a mel a kipholaksa hi. Ahi zongin a laibu lawngkha nailo in, a sungah bang thu teng kigelh hiam cih ka theih nailoh ahi hi.

 

Ka ngah ciangin ka lem pah a, "A Sunga Thu Omte (Contents)" cih teng ka ensuk dandan pah hi. Ka simnop pawlkhat ka mu pah hi. Ahi zongin ka sim pah man kei hi. Singapore ka tun kik ciangin sim dingin ka koih hi. Ka sim ciangin a sungah thu tampi ki at a, Pu Thangpum in THUKHUAL cih thului a gelh bang limci mahmah a Zomi te gamtat luhekzia kicingtak, kilawm takin hong lak hi. Zomi te a lungdam thei, a kiphawk, gamtat ciangin 'Sakhi in a tatna ding kuam kua khual' cih bangin a kidawm, a kilawm in a gamtate I hihna limtak in hong lak a, zuih tohtoh ding ahihna hong lak sitset hi. Thukhual takin gamtang khalo, thukhual khalo hileng maizum huai ahih dan hong lak ahi hi. Zomi te ngeina kiciantak nei, kilawm taka gamta, zahtakhuai taka gamtang minam hi in a pheng gamtat gawp minam hilo hi hang cih hong lak hi.

 

Khangnote laibu ahih mah bangin khangnote mailam ding thu tampi ki-at a, pilna zon zia ding, zi leh pasal zon dan ding, nekcing ding nasep gina zon zia ding nangawn limtak in kigelh sitset hi. Khangno hih laitak nasep ding - pilna hahkat ding, khangno kik nawnlo ding na hih manin na khangno hun am taka manpha taka zang dinga kihanthotna leh a limci mailam na neihna dinga kalsuan zia ding cihte kitam gelh mahmah a, Zomi khangnote hih bang thu manpha na khangno laiun sim kha, za kha, thei kha na hih manun 'hampha' kong sa hi. Lengtong Pauno laphuah bangin, 'Khangno kik thei leng maw' ka ci nuam mai hi. Khangnote aw, hih laibu lei in sim unla, nuntakpih un, thuhoih tampi kigelhna hibang laibu Zomi te in kibawl mengmeng zolo phot a, mailam ah kihanciam saan ding hi cih bel ka ummawh hi.

 

A sungah maan lui tampi kiguang a, deih bang hileh tua sanga tamzaw kiguang lailai leh a hoih tam cih ka ngaihsutna hi. Kei bel na huaiham kha pahpah. Zomi te thupiang, thuciamteh huaite, banghang in tampipi laibu khawngah guang ziahziahlo i hi hiam a ci nuam pawl ka hikha pahpah hi. A kik ding cih i ngak ciang a kik ding pen gamla nuam kha pahpah ahih manin. Bawlvet pen bawl ekek mai ding ahi ka ci nuam hi. Hih zah a kikhum zong hoih khom veve, laimai zong tam mawh kei, ahi zongin laidal sawm khat behlap lai leng tampi kiguang zo lai ding cih ka ngaihsut ciang pammaih a sa, a amlua kha hi ing.

 

Thugenpi Rev. Dr. JM Ngul Khan Pau in a thugen ding Sermon Outlines khempeuh guang ahih manin hih huna thu kigen khempeuh a toma muh pak theihna om ahih manin laibu bawlte ngaihsun siam uh kasa hi. Mailam ah Zomi laibu bawlte peuhmah in hih dan zui thei leng bel thugente thugen a tomlak kisim den thei ding cihna hi. A kigen bangteng cih kisansat thei ding hi. Tua ahih manin mailam zatzia ding hoih khat hong lak hih MUVANLAI laibu pen thupi kasa mahmah hi.

 

Khangno te mailam ah makai sem ding ahih manun makaih zia nam tuamtuam omte kigelh a, a hoih teng teel siam a zangsiam dinga kisinna dingin LIMLANG bangin a kikoih ahi hi. Makai hoihlo leh Makai hoih kigamlatna khawng kikoih dimdiam ahih manin manpha mahmah hi. Zomi khangno tampi in makai hoih a sem dingin lungsim bawl, puah, kilamto, kibawlpha ding cih ka um hi. Gam leh nam itna hang bek a makai sem ut hilo in makai sep siam limlim zong tampi i om a kulzia hong kilangsak hi.

 

Na huaiham kha lua ka hitam, Thului picing tampi kiguang lai leh aw! hoihzaw sem ding hiven maw ciin ka ngaihsun kawmkawm hi. Zolai ciik taka gelh siam kitawm hiaihiai ahi tam cih zong hong ngaihsun sak hi. Zokam leh Zola zong kizunlo in kipuah zolo ahi tam ka ci nuam hi. Laigelh leh thuluanzia ciik mahmah zolo sak hun om dekdek hi. Laigelh kidemna ah zong a dangte laigelh bangciang hi hiam cih khawng hong ngaihsunsak phial hi. Laigelh kilunglut nawnlo maw, laigelh kihanciam dingin kihanthawnlo maw, Zolai, Zokam, Zopau, Zola te limtak kizun, kipuah, kikhangtosak, kilamto zolo ahi tam cih khawng hong ngaihsun sak hi. Pau dang i siamte manpha sa ing, ahi zongin eima pau leh lai mangngilh lianga tuate i siam leh bel a sum ding eimah i hi kha ding hi.

 

MUVANLAI sim nuam mahmah in, ka lungdam mahmah hi. A sem a bawlte Topa in a tamzaw sem semkhia thei dingin tha leh ngal, pilna siamna, ciimna a kicingin hong piaksakta hen.



Hau Za Cin
Phuitong Liim
http://www.hauzacin.blogspot.com/

 


Comments




Leave a Reply