WWW.TUNGZANGNEWS.COM

 
Meh ka huan leh ci sawh khalo in ka om kei hi. A limna behlap ahih manin a kizang thei bilbel khat suak hi. Singgah thuk sitset khawng tawh meh leng zong a thuk ciil sak ahih manin limtuam hi. Ci omkei leh nek leh dawn a dau mahmah ding suak thei hi. Sa nangawn a lim mahmah pen ci tawh meh leng a limna khang hi. Zomi te bangin sa meh den ahih manin nidang in ci tawh na meh ngeilo uh hi. Ci a zat zawh uh sa tawh a meh uh ciangin limsa lua ahih manun "C - Ci omlo, sa limlo" ciin Zomi Paunak bang na piangsak uh hi. Naupangte, khangsawnte na kihilhsawn uh hi. Tuhun ciangin ci omlo in sa kine nawn mello hi. Ci zong nidang bangin a haksa lua in zon kul nawnlo ahih man leh ci man zong tawm deuhta, mi khempeuh nek ahih manin a man a kiam man zong hikha ding hi.



Nek leh dawn ading bek hilo in nektheih tuamtuam - ann, singgah, singteh, theipuam, theimin, sa, cihte a siatlohna dingin zong ci a kizang ahi hi. Ci sawh in koih leng sa bang uihlo pah hi. Ci sawh in upcip leng sialo in limci takin kine kik thei hi. Ci sawh in kem leng ni tampi kine thei a, ni tampi hoih hi. Singgah theipuam nangawn ci tawh mek in ci tawh diah in kem leng a kha a kum bang kikem thei in kine kikkik thei hi. Ci tawh singgah kem a sum suah kik mi tampi om hi. Sumbuk ah nektheih kizuak tampi singgah, theipuam, sa leh khaici khawng tawh kibawlte ci tawh kikem a tamzaw ahi hi.

Meima silna ding nangawn in ci kizang hi. Ganhing, lungno leh hik tuamtuamte ci tawh sawp leng thuakzolo in si uh hi. Meima liam leh natna khawng a kisawpna in a kizat ciang ci al hangin lungno in thuaklo a, dampah hi. Ci in natna i ngahna ding tampi pan hong kem, hong hon in hong suakta sak hi.

Ci bel a bawlna baihlo leuleu hi. Zomi te bangin cikhuk na nei in tua cikhuk pan cituite na dim uh a, mei tungah huan in a tuiteng suangkang uh hi. Tua a tui teng a kan khit ciang a ci tengbek a keu in cilom, cilum suak a, tua pen kikem hi. A lompi mah in kikoih in i deihzah kieukik hi. Tuhun ciang bel tuipi gei a kibawl, tuipi tui al kihuan pan kibawl ci te man tawmcikcik in kingahta ahih manin Zomi te in kibawl nawnlo suak phot hi. Zomi te bawltawm sangin sumbuk ah kizuak pen lei leng 'meetzaw' hi. Ahang pen sumbuk a lei ziau nading sum zong zaw in hileng ni leh tha tampi beia eiman i huantawm sangin meetzaw cihna hi.

Ci pen a lim mah hiding hi. Ci al a ne kim zo dingin Zomi te in nakpi in na hanciam ngei uh hi. A ne zolo tampi a om manin pumpi golna zong kikimlo cihzah dongin na kimu thei hi. Ahi zongin tuhun ciang mi kimin ci kine zota suak hi. Ci nek ding pua in ni sagih bang khe tawh pai in lu tawh pua in khualzin in kipai tangtang mawk hi. Tuhun ciang i inntual ah hong kipuakta, hong kizuak in hong kipia suak hi. Adang vante tawh a kizatna a tam tawh teh in a man tawm kik bilbel hi. Mi khempeuh zat, kisap ahih manin kumpi in a man a tawmsak ahi hi.



Cikhuk na mu ngei hiam? Kei khatvei ka mu ngei hi. Cikha khuanawl ah 1988 January a ka khualzin khat un nawkkha in upate in "Hih pen cikhuk hi. Hih tuite suang leng a dat hong om pen cilom hong suak ding hi," ciin hong gen ngei uh hi. Tuni in tua cikhukte a omlai tam ka theikei hi. Cikhuk a tui dawn leng bel al ngial ding hi!

Ci pen a lompi in a om ciang a alna tam tuanlo a, a tawm cik in zong a alna kiam tuanlo hi. A alna themcikcik in kizeek a, mi tampi in noptuampih hi. An sungah khah leng an limsak hi. Meh sungah khah leng meh limsak hi. Theipuam, singgah tawh meh leng a limna behlap hi. Mihing nuntakna tawh teh leng mihingte zong ci bang a al kihi gige hi. Ci bangin a al nuntakna a nei ihi hi. Na nuntakna ci bangin a al hiam? Na nuntakna ci bangin na al sak den nuam hiam?



Hau Za Cin
Phuitong Liim
http://www.hauzacin.blogspot.com

 


Comments




Leave a Reply