WWW.TUNGZANGNEWS.COM

 
Sisanpihte,

Kawlgam Milipsimna hongtung takpi hita-hi! Tuni dongmah lunghianglaai, kinialniallaai, thu tuamtuam, la tuamtuam mat na-munmah kinei laailaai-a, Zomite' ading hunhoih khat-pen asiasak-nuam ngaihsutna tuamtuam kimu laai-hi. 

"Zomite haii lua sa-ing, Zomi ka'hi" (Lengtong Pauno) acih-pen amaanna kician peuhmah-hi. 

Kei' ngaihsutna-ah, "Zomi" kicihding a-uutlo hileng, Zomi kicihding a-uutte theisak seloding, tua hileh Zomi akici-nuam mite-in hong mudah loding, masuan zomzom lelding, bang siatna peuhmah omding ahia? Cilo-maw, laaizomte!

Innteek zawdiak-a kisehte-zong keibang hileng, "Zomi kici ni-e" ci-a zolna, huam sawmna lungsim-tawh amuiibunh theithei ding-a theihteng buptuah sukding-in zolding, langbawl loding, kobawl loding, leengla-bawl loding, simmawhbawl loding, tua hileh bangbang aci-nuam kuamah-in hong gimneih loding cih kei' uplehsaanna ahihi.

Mipih sapihte ataangpi I' lungsim puakzia khasiat-huai laai mahmah sa-ing. Atawpna-ah, code omsa I' cih giahgiahte ZCD Secy' cihtak-in, zaanhal zekmah-a code neihlam akiphawk-pan hi-a, abeisa kum 60 sungteng tua code ziak-in phattuamna nengcik/neukha-beek I' neihlohlam mitmuh ahihi. Minam phungcin nading alau Kawlmaangte' thaang antah (bait) ne takpiding mataw lawmlawm! Zomi akici kingkeng te'nzong-e, guulpi' khimh bang-a thaang antah aneeksawm laaizomte banghang-in eengbawl, langbawl peuhmahding I-hihiam? I' huai zawhkeileh koihpeuh lel lehang hizaw lo-maw? Gaal atuakleh I' huut veve, I' hum veve dingte-mah hiven!

Khatvei suutkiik laai-ni!

Minam I' cihpen Zomite (honkhat)-in theilo hihang. Nation/National (အမျိူးသား) cihpen Minam ahihkeileh Nampi/Minampi cihna hi-a, Kawlgam-ah minam min-pen gambup zil-in "Burmese (tuhun ciang-in Myanmar or Myanmarese)" ahihi. 

Union of Burma/Myanmar-pen Kachin, Kaya, Kayin, Chin, Mon, Myanmar, Yakhine, Shan leh Bama akici nampi 8-tawh aki-united ahih ziak-in Union akici ahihi. Maailam thumuhna saupi aneilo Mualmi Palaaite leh Kawlmaangte' thukimna-tawh State khen-in amau' phuah min tamhsak uhhi. Thumaan ahihloh man-in Wa hong kitom pah-a, Pao, Palong-zong hong kitom pah-hi. Karenni-zong kitom pah-a, Zomi-zong akitom ding-a akisasa I-hihi, banghanghiam cihleh hihte-pen minampi (National အမျိူးသား) ahihman ahihi. 

Kawlte'n hih minampi adang 7-teng asukmit nading-in, "Unaute  တိုင်းရင်းသား" ci-in min hongvawh uh-a, akhangkhin gamliante-a indigenous people akici leitangnei mite daan-a hongbawl cihlah hituanlo, alaklawh lingleng khat-in hongkoih uhhi. English-tawh agen ciang-in pawlkhatte-in "Tribal Group" hong cihsak-a, aneu zawkaan-in hong meekcip suk-hi. Hih laai asimthei khempeuh' masuanding-pen Zomi Nampi Sahkhualumlehna (ဇိုမီး အမျိူးသား တော်လၽန်ရေး) ahihi. Sahkhualumlehna paizia-pen nunniam tualniamna leh hencipna pan-a khuadaak khiatna, sahkhua khangkhaanna, gualbaan lungsimpuak, gamtatluheek kisinna cihte abulpi ahihi.


Nam (Ethnic မျိူးနွယ်စု) cihciang-in akician mahmah lahna-ah: Zomi sung-a awsuah tuamtuamte hi-a, Kachin ahzong Jingphaw, Rawang, cbt, Kayin-ah Sakaw, Po, cbt, om diimdiam-hi. Hihte Minam or Nampi/Minampi tanzil tutadih-in hi naailo phot-a, nam ciangbek ahihi. Shan sung-ahzong Shan-Gyi leh Shan-Lay awsuah kidang-a, Wa leh Palong leuleu-pen Shan sung-ah aki pumkoih hang-in nampi tanzil (atung-ah I-cih khitsa) ahihi. Hih nam te-pen Zomite-in lawhna nei se-a, nam zong cilo-in -tecihkhat kinei se-hi. Heh nading I' zonzon saam hang-in neutuung-apat I' zaakzaak-pen Sihzaangte, Zote, Khuanote, Thahdote, Teiizaangte, Saaizaangte, Dimte, Zote, Luseite, Hualngote, Ngawnte, Phaaileengte, -te, -te vive-tawh kilo, kisam-hi. Kammal kicinlohziak-hiam theikhang, khua khat-a mite akigen ciang-inzong Laaituite, Voklaakte, Keeltalte, Muizawlte, Tuikhaalte, -te, -te vive-tawh kizom-hi, banghanghiam cihleh minampi lawhna hilo, nampi khat nuai-a akee-te ahihziak ahihi.

Hih -te guino-pen minam/nampi tanzil-a angaihsun ki-om laai-a, Kawlmaangte-in amau' theihciang ahihkeileh amau' deihkaih-tawh British thuneite' kiang-ah apulaak bangbang-a akiguang code te-pen Minampi Hihna ding-a alamen khialgawp laaizom veve khenkhatte' ziak-in "Zomi-ah kigawm hihang" cih uplehsaanna anial/anolh awsuah tuampawl a-om, apiang ahihi. Lungngai taktak lehang hih milipsimna-ah I'Gammi Hihna Kaat (နိူင်ငံသား ကဒ်ၿပား)-in naseem bekding-a, minam code khempeuh-ah bangmah kigelh lo-in 914 bekbek-ah kigelhvek lehzong Kawl Gamukte-in bangcih theiding sa I-hihiam? Hia State-ah mi hihzah pha cihteng honghi masa lelding-a, tualeh Rohinya khaihkhiatna-in hongnei lelding uhhi. Rohinya cihpen Bangladeshis hi-a, Kawl Gamukte-in Gammi Hihna Kaat apiakloh minamte hi-in, Zomi-tawh gentehtheih, tehkaaktheih omlo-hi. Zomite mahmah inzong I' gam-ah I' deih hetlohding Muslimte ahihi. 

Nam tungtaang-ah, muhlehsaanna akician-a bawlphat kisam mahmah-hi. Atung-a laaikhil-tawh kizuui-in, "tua ahihleh Zomi kici lehangzong bang phattuamna omding" cih dotna omthei-hi. Zomi kici lehang bangteng masuan om-a, bangteng minam-in phattuam lawhding cihpen Zomi Kipawlna makaaite-in theihna, geelna nei zihziah ding-a, kei mimal' muhna ciangciang-ah;

Khatna: Census-ah "Zomi" I' kicih man-in Minam Hihna Maan Pulaakna (Hih hihna maan pulaakna cih nungsang-in Panglong Agreement hun-a "Unaute  တိုင်းရင်းသား" acih minampi-a akiseh khinsa 8-pen khial cihna hipah-a, masuan naakpi-in lian-in, phuutding, eimah bang-a "khial" ci-a amapang Wa, Palong, Karenni cihte-tawh atawmpen singnuai leh sumtual kizopna cihte I' politician neihsunte leh thautawi neihsunte' masuan masa hongsuak dinghi. 

Nihna: Zomi atuulza-in hong kilangh peuhleh nam ahilo minampi min-tawh atawmpen Gamgizuul Puahna Lawmhsum (နယ်စပ် ဒေသ ဖွံ႔ၿဖိုးရေး ရံပုံငွေ)-a kipan siamsinna leh cidamna lamsang lawmhsum tuamtuamte Gamukte' khut pan-in kisaang theiding-hi. Tu mahmah-in gamliante-in Kawlgam-a siamsinna tawsawn nading dollar 30 million vaal apiak-pen Yangon, Mandalay, Irrawady teng-ah zeek-in State khempeuh-in ngahlo-in Shan State-a khua 8 bek-in ngah laai-hi. Billion 100 hong kipia lehzong Zomi genloh State dangte nangawn-in lemlawh teeiding kua'n cithei ahihiam?

Thumna: Zomi milip hoihkhom khat I' hihna-tawh Zogam leitang tung-ah thuneihna ngahtheih nading lampi ziikthei, vaatthei cihna ahihman-in tua thuneihna-in Zomite hong hausak dinghi. Guullu Nickel Project bang-pen Zomite' masuan honghi ding-a, kiimlehpaam-a hong duhgawhte thusiam-a I' hop keibuangleh amau-tawh kisailo hongsuak dinghi. Guullu sumsuak tuatna-pen tunung-in Zoheisa Upa khat ahi U Suan Maang (USA)-in hong taangko khitsa ahihi. I' gam-ah thuneihna bekbek akisam hi-a, namgim khuuk-zong om, suangmanpha-zong piang, Daalkhai-Lunglei kual sukteng-a kumza taaksingte luangkhat-in bangzah manding, Theizaang kuam-a dolsingte (bei dekphial intehmaw), Meitei Guun khaaktan-in Hydropower kibawlleh mah-sah-lah hunlaai-in akituat khinsa; Zomite' zatvaal power-pen India leh Bangladesh te-in hong naaklei nuamlua hi-in kumkhat meisaap a-sàang a-sàang-a akiluak hiathiatding ahihi.

Hihte khempeuh kal masa akisuan theih nading-in "Zomi-ah luangkhawm peuhmah photphot dihni" akici ahihi. Kawlgam-a Zomi khempeuh (Dim, Saaizaang, Sihzaang, Teiizaang, Losau, Phaileeng, Zo, Thahdo, Khuano, Ngawn, Hualngo, cbt) I' vekpi-in Zomi-ah luangkhawm mahlehang-zong atung-ate lungkihual tak-a phuutkhawm, sepkhawm loh-in apiangding khatbeek omlo ahihi. Zomite abeisa lunggulhna-pen khaici vawh nuamlo-in agah ne-nuam cih lungsim tamlua khin-hi. Vawhding, tuhding, hahding, zuunding, tua nangawn zusa, vasa-in hong neeksak theilaai ahihlam phawk-a, khaici tuh nading leitang tokuak photphotding hihang!

Atung-a gah limci hiilhialte I'lawh theih nading-in khaici tuh kuul-hi; 
Milipsimna-ah 

  • Gammi Hihna Kaat neite' kuih nading-ah kuui,
  • Chin State sung-a mite' kuih nading-ah kuui,
  • Code omsate hawi/nusia,
  • 914 -ah kuui, (agei-a a-awnna-ah "Zomi ဇိုမီး" ci-in gelh).
Hihteng khaici tuhna ding-a lei atokuak, khaikhuuk to cihna hipan-hi. Po ding-hiam, muat ding-hiam, zusa, vasa-in ne ding-hiam kitel naailo laai-hi. Hongpo phetleh lolaih, khaikhuuk giit, sawllaak, tuibuak, lohon cihte-in abaanbaan-in zomto dinghi. Tua ciang-in anlaak cialpi kikhaam theipan dinghi. Code omsate-ah ahihleh nang leh kei' tuhloh, nang leh kei' khaikhuuk tawhloh ahihman-in khaikhuuk ato mite-in, "Komau' tawhsa hi-eih" hongci ziaulel ding-a, agah kigaalmuh khalo dinghi.

"Zomi-ah luangkhawm dihni" cih-pen leitung buppi-a thukhaam (law) akici khempeuh-in nial/mawhsak loding ahihna-zong phawkthak ciatni. Midangte do nading, midangte khuplet nading ahihkei naakleh Daw Aung Saan Suu Kyi-in Melbourne-a athugenna-ah, "namdang, pawldang langdo nading ahihkei-a, tualsung suksiat nading ahihkei naakleh,." acih mahbang-in "I' minam hihna maan Zomi-mah cini-ei guai" ci-a sanggamte ahuai mi-in thukhaam kalh lo-in Pasian' thukhaam ngialbang zuui zawtham-hi. Pasian-in minam bawl-a, tua minam aphungvuh nading-in tua minamte-mah zangh-hi. Nang leh kei lo-in Zomi mualsuak loding-hi cih uplehsaanna vomciat, kengciat, kuahciat lehang Zomi leh Zogam hong paalluun dinghi. "Ko nana pailel nu'ng-ei," ahihkeileh "No na papai lelvuau" kici hetlo-in, "Tonkhawm ni-ei," kici tading hihang. Gilkial-a lambaang pakte, sung nuamlo-a lamkaal-a daaileeng pakte-in amanteh hongdelh veve ding-a, kitonkhawm veve dinghi.

Maai-a paite-in nung leh maa khualtuah-in hong nungdelhte' lampi-ah ling leh so koihsak lo-in ling leh so heemsiang zaw-a, nung-a paite-in maai-a paite lampial lo-in delh-a, keeng kikal, keeng kisiah lo-in, kiphuulgawp lo-in, abahte kidon, azawngkhaalte kikom, alunghiangte kihuai-in tonkawm lehang VaanGam Maleep I' cihcih-zong hihkaan hilo dinghi. 


Zomi Pasian' Thupha!

Zokhai


 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 


Comments




Leave a Reply