WWW.TUNGZANGNEWS.COM

 
Abeisa sawt nailo hunkhat lai in, Zogam khamtung ah nek le dawnzia, heksuk hek tohzia, silh le tenzia leh khuasakzia pen ki tualngiam mahmah ngei a, tangngansih, buhmansih, buhman ngan, tang tangho, buhman tangho, aksa, bawngsa, sakhisa, sazuksa, sakuhsa, vagiksa, valahsa leh gamsa-innsa lim tuamtuam ihuan ciangin, aminsiang nailo hunin kilep nuam mahmah a, inu ten nawngkai hongsa thei mahmah zel hi. Amau deihna ah aminsiang takciangin nek liailiai ding lunggulh zaw uhhi.
 
Khua khat ah pawlpi sagih om hi. Papi khat pen AA pawlpi ah upa khat hi a, pawi kibawl simin meh huanlam panmun kipia den a, nasepzong kizen peuhmah mai hi. Ahi zongin, "Mehciap hat" mikhat ahih manin, meh ciamciam a, upa dangte in enkhialzo mawk uh ahih manin, kikam tamkha uh a, AA pawlpi taisan in BB pawlpi ah lut miau hi. BB pawlpi alut a kipan meh ciamciam nawnlo in, BB pawlpi ah gina takin na hongsem toto a, muantheih suantheih upa cingtak khat hongsuak hi.
 
Zomi leh Chin:
 
Kamphen kullo tengin Zomi ihihna kitel tek hinapi hangin, min nailo in naupang banga ngaklah lua ten Chin tawh kalsuan in na malep kiaukiau uhhi. Zomi tawh nasep lianpi sem dinga iki thawi laitak in, min nailopi a malep Chin nuai a kalsuante pen hawlkhiat ding hipah samlo in, puapaih pah dingzong hisamlo a, amin ciangin sam lehang ankuang hong umkhawm veve ding uhmmhi. Ahi zongin, mehmin nailopi anek mawk uh guithei ding uh a, agilpi in zolo thei ding ahih manin, patauh huai hi. Amin ngakin umkhawm lingling lehang icihcih hangin, amin ngak zolo pawlkhat om veve uh ahih manin, banglo khat hong hih uhleh nu le pa tungah mawhpuak om veve cihzong Zomi sungah makaipi ten ngaihsutna tangzai hong neizaw un.
 
Leitung ah mihingkhat ihihna tawh Biakna kician, Minam kician, Gam kician leh Innkuan kician cihte aneilo mite pen mival kici a, milak-lawh zong kici kawikawi thei hi. Tua ahih manin, mipicing khat suah theihna dingin atunga thuli teng kician taka bulkip let ding kisam a, nuntakpih dingzong kisam mahmah hi. Gamkhat tanzil, minamkhat tanzil leh pawlpikhat tanzil zong gen naikei ni. Innkuan tanzil bek ah zong nu le pa, sanggam laizomte tawh nuntak pen Society khat hipah hi. Malam zong muh kul a, nunglam zong leh ettheih kul hi. Tunglam dak to in ettoh hunzong om dinga nuailam kunsuk in etsuk zong kul hi.
 
Tua Ahih Leh:
 
1. Minam
 
Minam tawh kisai pen apicing khinsa minam pawlkhat enlehang, Chinese te bangpen Cantonese, Hakha, Hokkien, Mandrin leh Namke tampi kigawm khawm uh a, Chinese cih minam min tawh minampi khat in dingkhawm uhhi. Amau pen pau akibat lianloh uh hangin amel-asa uh enkak lehang minam khat ahihna kitel pah linlian lel hi. Aci-asa uh pen kangngo dikdek pah uh a, namdangte tawh kikhen theipah lian lel hi. Tua Chinese kici minampi ten lai le ham tanpi tanzil a azat uhpen Mandrin ahihi. Ei Zomi khempeuh zong tangpi tanzil a izatkim theih lai le ham pen Tedim pau le lai hi a, Tedim cihpen ikhuapi ahih manin, aneituam peuhmah i om kilkel kei hi. Zomi khempeuh tawh kisai khuapi hi a, Tedim pau pen eimau pau, Tedim lai eimau lai hipah lel hi. Ahi zongin, mun le mual zui a, awsuah ciat pen ikep cing nopleh kepcing luat ding ahihi.
 
2. Gam
 
Kawlgam sungah Zogam taktak pen Tedim gamke, Tonzang gamke leh Cikha gamke te ahihi. Chin State sungah Township 3 vilvel pen Zogam atai theilo thu ahihi. Banghang hiam cih leh Chin State sunga gamke dangte pen Zomi deih vetlo te' tenna ahih manin, Zogam in vahuam suksak sedah tapeuh ni. CNF ten Tedim ah zum honghon bek uhzong tangtel siktan abang tintente ihihi. Amau mun le mual ahzong ei vagamtang gawp dah lel ni. Sumtha leh biakna makaite' huzapna in azo zongin, hunkhat ciangin Zomi panin hong zuankhial keukeu lel dinguh ahihi. ZBC ah kum 60 sungbang kipumkhat khinsa pen Zomi adeihlo te uh ahih manin, va belpawl sedah ni. Ahi zongin, innveng khat hihna tanzil pen tel kawmsa in, ahun leh amun zui a gamtang thei ihih dingzong kisam veve hi. Topa Zeisu inzong mikhempeuh it kim ding thu hong vaikhak hi.
 
Ami - Zomi
Agam - Gogam
Avok - Zovok
A-ak - Zo-ak
Atui - Zotui
Angeina - Zongeina
Anungakte - Zolia
Atangvalte - Zotang
Ahuandan - Zohuan
Ala - Zola
Akam - Zokam
Akhuapi - Tedim
Alai - Zolai
Akam - Zokam
Apau - Zopau
 
3. Biakna
 
Biakna pen bangbiakna-bangpawl ihi zongin, biakna kician khat neih limlim ding thupi hi. Biakna kician zuih aneilo mi pen mival hong suak zel hi. Tua ibiakna pen zangsiam lehang minam le gam adingin ahiam mahmah namsau tawh kibang hi. Gentehna in GZA kipawlna ah makaipte pen pawlpi makai vive ahih manin, pawlpi pan nipi simin sumpi dong denleh GZA fund tawh Zogam nasia takin kipuah zihziah zo dinghi. Biakna anei mite adingin nopna-dahna ah pawlpi in vai khempeuh hong puakpih ahih manin, Biakna kician neite pen lungmuang taka Leitungah khuasa mite ahi uhi.
 
Thukhupna:
 
Minam kician ineih khit ciangin, gam kician neihzawh nadingin minambup in mainawt ding hihang. Tutunga Kawlgambup mi kisimna ah anmin ngak ngiungeu a aom minam adinga gamtang tengin itheih dingah anleplep "Mehciap hat" pawlkhat zong puapaih pah keini. Anmin ciangin ane dingin sam lehang eitawh hong umkhawm ding uh a, amau zong eiteng hangin, agil uh vah veve dinghi. I lunggulhpi pen i gilvah tekding hi a, amau teng gilkial a aom dingzong iphal tuankei hi.
 
Dal Sian Hung
Kuala Lumpur, Malaysia.
 


Comments




Leave a Reply