WWW.TUNGZANGNEWS.COM

 
Mipi tha lo tawh pianglo

( Zomi Zogam kilap sang nading kalsuanzia ding lampi tampi om ding
hi. Hih lai ah kipawlna tuamtuam, biakna nasemte le a diakin mipite
mapanzia ding tawmno khat ong sung nuam ing.)


Lo thak I zon ciangin a leitang lup dan( nitum nisuah), tuinak a om
na, bang singkung lopate po, aleitang mahmah vom hiam san hiam, sim
hiam zo hiam,...,cih bangin hoihtak kivil masa hi. Tua khit ciangin lo
kivat a khai kituh pan hi. Tua bangin Khuahun, munlemualte tel in
cilgil takin nasep I hanciam ciang bekin kilawhcingin an kihauzo pan
hi. Tua Bek hi loin sakgal khang le gamsate in a suksiat lohna dingin
sun tawh zan tawh lo kihung den hi. Mihing hanciamna pen tua ciang hi
a, Pasiam mahmah in thupha ong pia in guahtui hoih in khuahunte aman
ciang bekin an kila zo pan a, ankhing kikham zo pan hi.

Zomite in Zogam leitang tung mahmah ah ankhing kham in, nuntaknuam I
ngah theihna ding cih pen akuamah ciatin I lunggulhpi pen ahi hi. Hih
lunggulhnate a tangtun theihna dingin tu lai khuahun, mun le muan leh
kim le pamte thupiang leh thupaizaite mu in I pilvang mahmah ding ong
kisam hi.Tuate tungtawnin ei adingin a hoih pen kalsuanzia le
munlemualte I zong thei ding hi. Tuate siksan in I gam I lei puah in
zuun leng hun tonno sungin I Zogam ong paallun ngeingei ding hi cih
lamet ngam huai mahmah hi. Tua ahih manin tu lai khuahun luanzia le
Zomite I kivaipuakzia ding kei teldan tawm cik thu ong sung nuam ing.

Kawlgam ki-ukzia le leitung khuahun kikhelzia dung zui in Zogam le
Zomite sungah zong I thumuhzia, nisim nuntakzia, thungaihsutzia,
thupomzia,.., kikhel mahmah hi. I theihtek sa mah bangin kikhelna
pen a hoihlam kikhelna a om mah bangin a hoihlo lamah kikhelna zong om
thei veve hi. Tua ahih manin tu tung kikhelna pen ei adingin a hoih
lamin ong kihei theihna dingin muhkhak sunsun tawm khawng ong sung
nuam ing.

Kawlgam kikhelzai

" Kawlgam kikhelzia pen manlang mahmah hi. Tel hak mahmah hi. Ahih
hangin mailam ah hoih to semsem ding maw, hoih lo semsem ding cih pen
kigen khol thei peuhmah lo hi. Tu ciangciang pen ahuampi in en leng
ahoih lam in a lekzaw hi. ." (International Republican Institute)

Policy kikhel

Kawlgam kikhelzia pen ami ( adiakin thuneite/ galkap ) kikhello in,
thupaizia ( policy ) a kikhel kikhelzia ahi hi. Tu laitak gam maikai (
ki-ukna lam, Hluttaw, thukhenmang lam ) khempeuh avekpi phial in
galkap tawh a kimemat vive mah hi lai cih theih ahi hi. Amaute in 2008
Thukhunpi tawh ong kalsuanpih uh ahi hi. Abeisa lai in Galkap ( mi
khat ) thu neihna tawh kikal suan a, tu in Thukhunpi siksan in mikhat
thuneihna ( power ) pen khen thum kisuah in Mi Thum in pangkhawm
semkhawm dan hi phot hi.

Abeisa lai in amah tawh akibanglo khempeuh gal le sa bangin ngaihsun
uh hi. Ka pawl na hih keileh ka gal, ci lianlian hi. A vom keileh a
kang hi ding. Vot vetlo sa vetlo cih bang om theilo ci lanlan hi. Mi
nam nih bek om sak hi. Ngahsutna nam nih bek om sak hi. Amah tawh
kibanglo Kipawlna le party tuamtuam khempeuh mihai leh gamleminam itlo
suah uh a thulakah hel ngeilo uh hi. Gawt bawl mahmah uh hi. Cizek
het loin phial vat mang lel hi.

Tu in ahihleh tua dan hi buatbuat nawn sam lo hi. " Kei hih danin
kalsuan ta ing. Nang zong ong kihel lecin a ci hi veng. Nang deih dan
zong ong gen pongpong dih ve" Cih danin lampi tawm hong kiukiau hi.
Kihem et giaugiau nawn sam loin thu kikum khawm zel thei ta hi. Mipi
maitang khualna tawh in hoih a saklohnate zong siang takin kici vatvat
lel ta hi. Gam le minam ading ahih nakleh kuakua ci loin khut kilen in
kalsuan ngam sawm ta uh hi.

Policy kikhelzia

Leitung tangthute en kik leng Gam kikhelna lianpite a om theihna ding
Khanlawhna ( Revolution ), kinawkna lianpi tampi khit ciangin kikhelna
lianpi om to zel pan hi. Mipi thuneihna le kikhelna a om theihna
dingin nuntakna khua-ul sisan tampi leh hun tampi tawh kilei tangtang
den hi zaw hi.

Kawlgam kikhelzia pen a tuampi khat ahi hi. Mpi khanlawhna le
kisatsuahna pen a hun hun in a om ngelhngelh hangin kikhelna taktak
apiang sakzo om lo cih ding hi. Ahun zui in Siamsinte biakna nasemte
le mipite khut kilen in ki diang ziahziah zel hi.Ahih hangin Thunei (
galkap ) te in cikze het loin zial mang zel ahih manin kilawhcing zo
pak lo hi. Ahi zongin akikhel nop leuleu ciangin amah le amah in ong
kikhel to hi. Tu tungtang kikhelna pen amau( thuneite ) phalna tantan
a kihong to kikhelna ahi hi. A tung panin a kikhel suksuk kalsuanzia
ahi hi.

Kikhelna kizom

Ataktakin cileng 2008 Thukhunpi pen Galkap kumpi in ama deih bangin a
bawl thukhunpi ahi hi. Ama satan ding Vompi sahawm in a hawm hi phial
hi. Ama sialsa lampi tung tawnin mipite ong kalsuan pih ahi hi. Tua
lampi pen lampi thak bek tham loin ama adingin ahoih pen ding bekin a
bawl ahih manin tangpi tangtate ading ong zat nuam hetlo hi. Hih
thukhunpi pen lem asa mahmah pawlkhat a om sam hangin mipte adingin
ong lemkhin zo taktak lo hi. Ahoihlohna tamlua mahmah ahih manin
Puahpuah nawn loin a thak khat zongzaw leng a baih zaw tam cih
ngaihsutna nangawn zong om hi.

Kikhelna pen ong kizom toto cih ding hi. Mikhat thuneihna pan kipawlna
khat thuneihna, galkapte makaihna pan mipi tawmtawm kihel zawdeuh
makaihna, sep le gel tuah kimakaihzia panin Thukhun siksan
kimaikaihzai ah cih bangin in kikhel toto hi. Hih te khempeuh banah
Thukhunpi zong a kisam bangin puah ding ong kithawi leuleu pah seisai
bilbel hi. Apiang zo pah nai kei zongin mipi deihna ( thukhunpi ading
) ong ngen ta uh hi. Mipi' deihna ong kan limlim pen Kawlgam adingin a
lamdang thu hi ta hi. Lawp pah ni cih ahih loh hangin ni dang sangin
lamet huai zawdeuhta cih theih ahi hi. (Hih pen a huampi in I genna hi
a, a lungkham huai na leh a lungkiat huaina zong tam cih takin a ta
lai hi veve hi.)

Ci nawnlo ding

Pilna khangto in leitung pen khuata khat bangin a kingaihsut hun hi ta
hi. Thusim thulang cih bang kituam neih thei pha nawnlo khuahun sungah
hih atunga thupiangte siksan in ei Zomite mainawtzia ding ka
lunggulhdan pawlkhak kikum leuleu dih ni.

"Zomite ong kisim mawh. Eimite ong kinengniam lua. Ong kisimmawh lua.
Ong kideidan lua.Ei Christian ( biakna ) kidendan lua...," cih
thangpaihna khasiatna kammalte nusiat ding kisin ta ding hi hang.
Banghang hiam cihleh atunga I gensa 2008 thukhunpi in Gammi le
Tualsuak mite' pianken hamphatna( Right)te ahi ciangkhat ong lipkhia
leitei hi. Kawlgam mi / tualsuakmi hi in tua Right te I ngah naikei
leh lampi om bangbang tawh I zon ding ong hi ta hi. Tua hamphatnate I
galmuh khak nai keileh thulela tawh kopin sul zuih in zandelh ding hi
ta hi. I hanciam ding ong kisam ta hi. Ong guksak / ong selsim sak a
om leh upadi tawh kizui in I nawk ding ahi hi. Ngahding a kilawm I
ngah nailohte zong bangci ngahtheih ding cih khuadakin lampi om
bangbang tawh lak ding hi pah hi. Lampi tampi om kha ding hi. Hun
kikhel ta hi.

Tua bangin lampi zongin I ngahsa Right te kimtakin la to in, I ngah
nailohte I deek tektal theihding ong kisam ding hi. Hih lai ah
Kawlgam khuahun bulphuh in thu suut I hih manin 2008 Thukhunpi sunga
thute I theih masak ding pen a thupi pen lakah khat in kihel pah
dingin I lamen hi. Deih in deih ta keileng tu ni ciangciang tua
Thukhunpi tawh a kikalsuan hi phot hi. Zomi le Zogam ading I
deihngetna, I lungkimlohnate khempeuh hih thukhunpi le Gam tuamtuamte(
UNO a kipan) thukhunpite siksan in kalhkhiat sawm ding hi hang. Hoih
I sak het lohnate zong athu kician takin gen khia setset theih sawm
ding hi hang. Ei adingin a lemlohna munte puahphatsawm ding hi hang.
Bang deih taktak I hi hiam, ei adingin ei mahmah vai I hawm loh
phamawh ta hi. Athupi pen ah ei mun ei mual ading a lemtang pen ahih
ding thupi masa hi.

Mipi thahat kul

Tangpi tangtate nuntak nuam in, a hampha gam le lei minam I suah
theihna dingin a cih taak mahmah kikhelna kalsuanna le thasanna tampi
I kisam lai hi. Nidang hun lai tawh teh leng I kumpi in Khantohna
nadingin ci in sum ( budget )nak zat mahmah hi. Koi mun ah zang hiam
cihleh Leibawlna, lampi bawlna, sanginn lamna, zato inn lamna..., cih
bangin muh pah theih ding vive sem ziahziah hi.

Hih pen hoih mahmah hi. Thupi mahmah hi. Mipi in zongin khantohding
kilunggulh mahmah hi. Ahi zongin a hoihzaw lai ding khat om hi. Mipite
kisap pen bang taktak hiam cih hoihtak kantel ( research ) masak huai
hi. Tua kantelna tungtawnin a kimu khia thute siksan le dapphah in nei
in na kisem leh hoih zaw lai ding hi. Mipi mahmah in zong I deihna le
I kisap thute khen tel in, I kisapna munte ah kumpi budget tawh na i
sep theihna ding lampite zawt siam leng I khantohna manlang zaw lai
ding hi. Galkap kumpi hun sung tawntung lampi to, lei bawl, sanginn
lam..., in kini tum khin hi. I khangto taktak hiam et kik huai hi.

Zomite nuntak nuam in Zogam leitang tung mahmah ah lei thupha van
thupha I ngah theihna dingin mipi akl mimal kim in tavuan I nei hi. .
" Buipi leikei in zong khua ngai" a cih mah bangin Kawlgam in federal,
Democracy kician I ngah theihna dingin mimal kim in khuaphawk in I
pilvang mahmah ding kisam hi. Zomi Zogam kilapsang nading mapang
khempeuh in pilvang takin I maban ciat phul ciat ni. Hunthak leh i Lo
ma thak ciat ah khat le khat khut kilen dimdiam in hanciam khawm leng
thupha ngah minam le thupha ngah leitang neite I hihna a sawt loin ong
kilang khia ding hi.

Thukhupna

Mipi lam panin zong mipi deihna kisapnate a kisam le a kul bangin I
pholak theih keileh thuneite/ vaihawmte cih bangbang a suk a to ah I
zuih heihei ding ong hi leuleu ding hi. Thunei vaihawmte gelna pen
mipite kisapna tawh en kak in a kisam bangin I leptuah zawhleh hih pen
athu hoih mahmah hi a I lawmte gengen "check and balance"hi pah hi.
Check and balance athakhauh leh democracy a kici pen a ciamciam kha ta
cih theih ahi hi.

Khuasung tuisung thulelate mipi/ ei tektek mahmah in kantel in a kisam
leh a kul bangin thuneite vaihawmna ( kumpi budget ) tawh I taksuak
sak zawh ciangin I thu I late ong hoih in manlang semsem zaw lai ding
hi. Tua kawmkawm in ei mahmah zong vaihawm siam I hih ding I kisinsin
ding hi. Tua hileh I gam I lei I khua I tui I mun I mual ah ei mahmah
in Vaihawmte/ phungpite dinmun a la toto kihi pah a, tualsuak mi
khempeuh in I lunggulh " federal" I cih pen a kiciam to ding ong hi
leuleu ding hi

Liantuang
Kawlpi (09 400511757 )

 


Comments




Leave a Reply