WWW.TUNGZANGNEWS.COM

 

Dr. Cinpu' hong pulaakna tungpan:

Adiak-in Kawlgam lamkaai-a Zomite ataangpi laailam kilunggulh hetlo-hi. "Laailam-tawh minam tualkhaanna (minam tualniamna pan-in khangkhaanna) naakpi-in I' lunggulh ciat-a, tu tadih-in kiduh naailo-hi. 

2006 June kha pan-in ZAM masuan hiangneu khatbang-in "Nipi Thupuak (Sunday Message)" akhong-in kihawm-a, adiak-in biakinn zuatna kingaakna Bus Stand leh biakinnte bulphuh-in kihawm-hi. UN-vaai kinaak lungluut mahmah ahihman-in UN vaai thuthang ngah bangbang kiguang-a, Zomi minam luankhop ziading themthem kitah zeuhzeuh-hi.

2006 August sung-in U Haang Kaap (Canaan ZCF makaaipi)-in biakinn-ah UN vaai pulaak ding-in hongzawn ahihman-in ka' paisuk uhleh, KL Bus Stand-ah "Nipi Thupuak"-pen Zomi tengmah-in tutphah/tawdap-in nei-in nana tu zihziah-hi. Nasa mahmah kawm-in, "Koi lawmte, hih laaidalte akhong-a akihawm man-a 'manneilo' hi deklo ahi-aw" ci-in khawm samsam-in biakinn-ah ka' keng-a, ka-hawmkiik leuleu-hi. Tua ni-a "Nipi Thupuak" sung-a tengmah biakinn-ah ka' gen ciang-in aden-a tawdapphah-a anei sanggamte mah-in, "abangci daan-e, koidaan-e, …" ci-in hong dongpha zawsop uhhi.

Laaihawm (leaflet), laaitaai (pamphlet) , thukhopbu (journal), thuthang (news), magazine-a kipan laailam limlim-pen Zomi sung-ah naakpi-in tualniam-a, ei' khang-ah I-haanciam keileh Kawl Tadinsa khawngmah-in hong vuknelh totoleh Zolaai-zong thaneem seemseemding theihsa ahihi. Zomite' neih sunsun lak-ah thukhopbu hipen-a, neulaai-a ka' zaakngei leh ka' simngei "Ciimnuai Magazine" bangpen ka' za nawnkei-hi (a-omlaai ahihleh hong hilh un). ZOLUS Thukhopbu-bel kizom laai-a, laaitaai (pamphlet)-ah MOMNO, ZOAW, Yangon Awging cihdaan khawng hileh kilawm-hi.

Minam tualniamna-tawh kizuui-in laailam-zong kitualniam ahihman-in thukhopbu, laaitaai, cbt, I' neih sunsunte nangawn gualbaan tak-a akigelh hamsa mahmah-a, bias-tawh kidim-in, thuthang, thupuak, laaitaai limcitak akineilo zahdong ahihi. Aseem abawlte' rights bel kilimzat vaanglak-a, amau' naaihuai, amau' pawlpi-sung, amau' meeltheih, cbt zil-in thusuak, thupuak leh laaipaih (thuluui-article)-te kiguang zeel-hi. 

Tua baan-ah, editor tie-in article hoih khatpeuh aguanding sang-in amau' hoihsak guanna, mi' gelhsa gu-a ama' gelh bang-a guanna, amau' kivakna hitakeileh minam vaai, sumsinna, kiukna, biakna,… avekpi-a editor khat/nih bek-in hong guansuk-uh ciang-in kitukalhna omthei den-hi (gentehna-in; Yangon Awging-ah nungdeuh-a akisuaksak "Zomi khempeuh-in Chin kicihding thukim" cihte-pawl). Siamsinna niamlua I-hihman-in ziat leh vei, matmanteng baanmat sukmangzeel I-hihman-in mipi' simding laai thupi kisuah zolo den-hi. Zomite' laailam uuklohna kawmkaal-ah laailam kivakna aginaatloh sawnsawn ciang-in mipi' duhna khang theilo-hi.

Tua hi-in, editor' laaipaih column no khatleh thuthak bekbek akiguang laaihawm/laaitaai khatbeek I-kipatding kisam mahmah-hi. Akhong-a hawmding honghi ding-a, laaiteiman, teisawnman, ahawm mite cialna cihte-in hong nungzuih dinghi. Alungluut I-omleh kiho-ni. Khatbek mapan denkeei-pen naseem cihlah hilo, baih tuanlo, tate' khedap kamka leelaa khawngmah-tawh ahihteh kiuno khatpan kihel thei veve ciatding lamen-ing. Alungluut te-in groups sung-ah kidawng lehang Judah Siakazoh mah hong tamzeelding ahihteh, aituam ID-tawh kiho ding-in hong zawnpah-ing.

Zomi Pasian' Thupha!

Zokhai

 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 
 


Comments




Leave a Reply