WWW.TUNGZANGNEWS.COM

 
WHY 914-ZOMI?
By: JK Kam

Kei leh kei Zomi ka hih lam kitel mahmah in "ZOMI KA HI HI" ka ki cihcih hangin officially in Kawl kumpi minam ciaptehna (Ethnicity List) ah kikhum (record) kha nailo citciat ahih manin tun ZOMI ih hihna hong kiciapteh sakna ding lampi hong ki hong pan hia, a piang ngei nailo leh a piang nawnlo ding hamphatna GOLDEN OPPORTUNITY ahi hi.

Tuma Census masate pen mimal kidong loin khua hausa thuneite leh kumpi nasemte ki thuzakna tawh sazian kila bek ahih manin tualsuak awkaih (dialect) pen minam ciaptehna ah peuh hong om zanzan a, ih mibup hong huam ZOMI zawsop pen ki pulak kha lo citciat hi ding hi. 
Gtn: Saizang khua upa pa in "Saizang" kici in, Thuklai hausa pa in "Sihzang" kici dinga, Heilei hausa pa in "Teizang" a kicih masak phot ding lam ki ngaihsut pih thei mahmah hi. A huampi in ZOMI ih kicih hangin ih khua zui (locally) in ih pau awkaih tawh kisam masa zaw ih hih manin a tungkhum a ZOMI pen a ki mangngilh kha ahi hi. Tua ahih manin Sihzang, Teizang, Saizang, Khuano,...etc cihte in code nei zanzan a, Zomi a kici masa ding om thei tuanlo in Zomi in code hong neilo zawsop hi. 

Awsuah (dialect) pen minam ahih loh lam thei napi hangin Census lakna ah mipi, tangpi tangta hong buaisak zawdeuh thute in; 

- ZOMI in code a neih ding a kisap lam theilo kha,
- Ei dialect code tek ci kei leng ih dialect abei ding kisa kha, 
- Hih Dialects teng kigawm ciang ZOMI ih hih pan lam phawklo kha,
- Dialect level tawh dinna pen Zomi thanem sak ahih lam phawklo kha,
- Dialect code tawh hamphatna tel (share) a om ding sa kha,
- ZOMI ih minam pen nai-ngan-yay nasepna sa khial kha, 
- ZOMI min tawh minam khat a din ding a thupitna phawklo kha,
- CHIN pen ih minam min sa khial kha zawsop,
- ZOMI a kici leh CHIN a kicite tuu le keel banga kikhen akul ding sa kha,
- 914 kici leng Kawlgammi hi nawnlo ding khawng sa kha,
- Gammi khat ii thuneihna "Civil Right" theilo kha,... etc,

cih bangin telkhialh upkhialh khop dingin thu om bilbial ahih man in mipi lunghiang khop mahmah hi. Ahi zongin thu om dan tel sinsen le hang Zomi veve sung pan 914-ZOMI cih noplohna ding, cih ngamloh nading, adang code kicih nopna ding a thu om vetlo hi.

 


Comments




Leave a Reply