WWW.TUNGZANGNEWS.COM

 
Gam khat ii thupiitna pen, a gam sung aa Education in thu a gen hi. Gam thupi limlim te in, Education System thupiit bawl in, thupi sak pah hi. Education hoih a nei gam limlim te, a gam uh a khangto uh aa, a thupi gam a hi pah hi. Kawlgam sung aa Education System te en kik leng, i pilna te in bang ciang ong tun pih zo mawk a hiam? Lungmang’ huai mahmah thu khat ahi hi.

8888 uprising khit zawh, i kawlgam sang te pan, bang mah i thei zo nawn kei hi. Bang mah i theih zawh lo’ na in, ei(sangnaupang) a sin te ginat lo’ na maw, sanggam? Bang mah i theih khak lo’ na in, a thei zo lo ding te i hih man maw, sanggam? Matriculation Exam te i zawh nang, bang zah ta in, tha i san kul cih i thei tek hi. Tua i thasan na te hang in, minam khat, gam khat i tawisang zo mawk mah i hiam? Minam tawisang zawh na ciang dong ding, pilna nawitui i dawn kha mah hiam? Tuu-ni in, hih te i ngaihsut ding ahi ta hi. Gamvai i tuah, i phuut thute, theithei lo ihih man in, minam vei, khat leh nih ong om sunsun leh zong, Zomi Politicians te a awtawt bek mah hi-in, mipi’n zui thei lo ihih man in, minam bup, Zomi bup i khanglo thei kei hi. Mipi, nang leh kei, i mit te a ong keuh mateng, i minam a apcip laai ding ahi hi. Hun beisa themcik suut kik sawm leng,

KG pan kipan ngekngek, hanciam langlang, kideidan na te i phu to ngekngek pah hi. Kha sum kham lo sang saya, sayama ten, a nungtakna ding a ong ngaihsut uh ong kul ta. Sum nei zaw diak pilna lunggulhsak NulePa ten, ta te mailam ding lunghihmawhna ong lian tektek ta. Sang hun sung pan ngah khit zawh lo’ laitan pilna te, Tuition pan ong kicing zaw ta. Tuition a ki kha zo lo sangnaupang te, a lai te uh ong thei lo tektek ta. Tan 10 ong/pass, Graduate B.A, B.Sc, B.E ong ki phul keei ta. Leitung mun khem peuh aa kizang English tawh Simple Sentence khat na leng zong Subject, Verb, Object khen tel aa ki at thei lo ta. I hai luat man maw? A thei zo lo ngiat te i hih man maw? I theih ding ong ki deih lo hi zaw maw? I hai ding mah ong deih zaw uh maw?

Tuu-ni in, ei leh ei, Zomi leh Zomi, Mualmi leh Mualmi i kigup theihlo’na, i kisulsul-na te in, sung thu, pua thu theilo aa, theih zahzah kam dimdim aa, i genkhiat pualpual-na te in, i ki pilsak man hi-in; tua i kipilsak-na te in, i hai-na na hizaw hi. Hih Zomi leh Mualmi te i hai tektek ding a ong deih in, hong uk kumpi i cihcih te ahi..

U Nu makaih Buddhist Socialism ahi, AFPFL (Anti-Fascist People’s Freedom League)// Phah-Sah-Pah-Lah,
March 2nd, 1962 kum Pu Ne Win makaih Revolutionary Council, khuamial Council ong kah aa kipan, RC a zomh
BSPP/MSPP ( Burma/Myanmar Socialist Programme Party).. Burmese Way to Socialism, Left-wing Nationalism, a zomh
SLORC (State Law and Order Restoration Council) // Nah Wah Tah , a zomh,
SPDC (State Peace and Development Council) // Nah Ah Phah, a zomh
USDP (Union Solidarity and Development Party)// Kyant Phunt.. ..

Sanggam aw, ong kibawlna te, a dang tampi i theih zawh kei hang, bang mah i theih lo’ na mah tawh, i gamuk kumpi te zia le tong i tel na, a na hi mawk hi. Zomi khangthak sung en kik leng, 100 ah 5 in English i theih leh a phadawm lai cih ding ong hi ta hi. English a thei sunsun, a siam sunsun te en kik leng, Biakna lam leh sum nei zaw deuh te bek i hi mawk hi. RC thu-um mi te sung pan en leng, neu tung aa kipan Minor or Major Seminary pan a khang khia zaw deuh, Protestant lam pan en leng Laisiangtho sang man B.Th, B.Div, M.Div cih te ….. ahi hi. Leitung kumpi sang pan i sin pilna te, a baih tak aa i ngah lo’ laitan te, High School zo in, University pan major tuamtuam tek tawh i Graduate khit teh, tua Degree te bang aa ding in zang thei i hi hiam? I minam, i khuapih tuipih, i innkuan zun ding cih thadah, ei leh ei mahmah na ngawn i kivak zo kei hi. Hih te en kik leng ei a gina lo ngiat maw? I ginaat ding ong ki phal lo hi zaw maw..? Ei leh ei na ngawn a kivak zo lo i khangthak hun ah, nek tawm gilpi, gilvah pak na ding tawh i buai ding mah ong hi ta hi. Huih diik lai i hih man in, i gil zong a kial thei a hi lel hi. Nungta thei i hih man in, i si thei ding hi. Hun khatkhat teh minam nasep-na ci in, minam pau lam’ aa, siksan bulkip zong nei khol lo, nekpih theih ding te pawl pih kawikawii theih na pan, gilvah-na ngah phial mah ding i hi hi. A hi zong in, i minam i sanggam i awlmawh lo’ lam tak, i gilvah laitak i phawk kha kei hi. Kam khum, tung tham, suk hek to hek thuak in,khat vei gilvah pakna, angsung lungsim tawh i nui buabua kha mai hi. Minam it i sanggam, gilkial pi aa a hi tantan, a hanciam tantan te, zahpih bawl ko nuam phial keei kha ding i hi hi.

Zomi sung ah Politicians teng ki ko ta. Politicians minpua lian lo, minam veina taktak tawh a hi tantan te, ki zahpih keei ta. Minam vei, minam it teng ki nawl khin keei ta. Angsung lungsim, gilvah pak nang tawh, i sanggam, i innkuan, i minam it te ki pampaih kha ta…..a paaktaat huai te gen siasia keei ta. Potential nei te ki haza keei ta. Sum le paai hamsa Zomi te, hamsa tektek ta.Minam khat itna, a nungta thei khempeuh i itna hi. Minam khat a susia te in, a nungta thei khem peuh a susia ahi hi. A nunta thei khem peuh itna tawh, i hih zawh na ciangciang pan ma i pan kul ta ding hi. Leitung aa minam tuamtuam khem peuh aa ding na i sep kul ta hi. I minam aa ding sem leng, leitung minam tuamtuam te aa ding sepding tampi lak pan khat a sem i hi ta hi. Minam aa ding nasep ding pen, thau tawi, hiam tawi phei pah phangphang ding cih zong hi khin tuan lo hi. Zogam aa om cip ding zong a kisam masa hi lo, a kisam lo zong hi lo. I sisan tenten na ah Zomi a om ihi hi. Itna, I innkuan sung i itna, i beh i phung i itna, i khua i tui i itna, i awkaih i itna te khempeuh, i minam Zomi i itna i suahsak ding ahi hi. Hih bang ong pian theih nang, minam sung ah mimal khat ciat pilna cimna kitangsam mahmah ta hi. Pilna cimna i cih te in, laitan pilna bek ahi kei aa, ahi zong in, i pil nang, i cim nang, i sin kul hi. Tua ahih man in, Education hoih i kisam hi. Minam aa ding, i kanzek, i phutzek kisam hi.

Nang minam it khat, nang leh nang na ki it kha mah hiam, sanggam? A tung aa i thu gen masak ahi, bang mah thei lo, laitan nei lak ah na ki hel kha mah hiam, sanggam? Thuman leh thuman lo khen tel thei leng, mi kam khum tawh ki pukpak lo ding ihi hi, sanggam..

A zenzen in Europe leh US gam a tung khin hi aa, hih thului na lungsim tawh kituak na sak leh…

Minam it, Zomi khat na hi hi.Minam na it tak pi leh, nang leh nang mahmah ong ki it phot in. Minam it peuh mah in, minam aa ding nasep kul ta hi. Minam aa ding na nasep nop tak pi leh, minam na puah phat a kul hi.Minam puahphat nading in, nang leh nang mah ong ki puah pha phot limlim in. Nang leh nang na ki puahphat zawh nang, a hun na piak kul kha ding hi. I om na kiim leh paam te ii pau le ham zong thupi masa pah hi. US sung aa State tuamtuam ah, English free aa sin theih na, ESL class a tam lua zen hi. Kah lo’ sang kah hoih zaw aa, kah pong sang, limtak aa sin hoih zaw hi. Hih te nang aa ding in a niam luat leh, GED om hi. Tua na zawh leh, man tawm, hun a kicing, Community College te om hi. Kah vet lo’ sang Class 1 lak hoih zaw hi. Class 1 lak sang Credit hours 12++ la zo leng, Full Time student aa ong ki ngaih sun ding aa, kum bei teh, kumpi tung pan, na laibu man leh na sang sap teng ki claim kik thei lai hi..Innlam nektawm a buai huai khol lo te in, Federal Financial Aid siau in, sang Full Time in kah huai hi. Semester 2 khawng zawh khit teh, Internship program te zong aa, i lai sin tawh a ki zom nasep te, i ki pan thei hi. Nang leh nang na ki lamthak zawh leh, minam a lam sang na hi ta hi. Gen pak tawh bel, baih pak lo hi. Minam nasep cih pen, a baih lo mah ahi hi.

Minam na it leh nang leh nang ki it in la, ki puah phat sawm in..
Mimal pan minam i hih man in, mimal pilna le siamna in, minam pilna le siamna a hi hi..Nang na pil leh, i Minam pil hi. Nang na siam leh, i Minam siam hi. Bang mah sep lo’ sang in, nang aa ding nasep leh, i Minam aa ding a sem na hi hi. Minam makai te a huhhuh na hi pah lel hi.

(Controversy tawh kisai , lai at pa’ ong buaipih man lo ding hi)

Nicholas Pau

 


Comments




Leave a Reply