WWW.TUNGZANGNEWS.COM

 
Zomi te Amaai ah taai masa @Zomipau

 

Zomi te peen mipawlkhat te in midangte tawh kitehkaak in tualniam kisa ahizong athaneem azawngkhaal kisa bang in kingaihsun khathei zel hi. Nihing leh Minam kheempeuh in hoihna leh Hoihlohna, Haat na leh Thaneemna cihbang in namnih ciat kinei tawntung hi. Zomi te ithaneemna lam pangpan hizawlo in athahaatna lam suut lehang mimawk ahilo amaaitaai apicing minamlian te ihihi.

Ngaihsut siamna lam ah

Taanglaai pekpek 1800 mapek in Ipu ipa ten Inn analam uhciang, Ek kawng ci in Innpi tawh phaitamlam ah kizomsuak in Innsung pan guahthuak selo in Inn analam ban uhah, Tua Ek kawngpan akiasuk mihing zatnawnloh vante adawl ane ding in Inn nuai ah Vok nana khawi uha, Tua Vok agolciang Lawmsa, Khuadosa cihbang in zang in mihingte mah in kinekik in na,van akipai mawkmawk cihbang omngeilo ding in nageel uhhi. Hih bang ngaihsut siamna, pilna te Nitumna gamlam te in 1900 Leitung gaalpi nihna hunpawl in ongtheikhia uh ahihman in tu in leitung ah akilimzatmahmah Vanpaaimang lo a zatkikkik daan (recycle system) leitung ah kinaak zat mahmah hi. Zomi te peen kiniam seemseem lo in ipilna te khangseemseem himah leh Kawlgam ong uk kumpi te nakhangto hetlo uh ahihman nasepding bangmah geeltheilo uha, Tu in gamdang tuamtuam ah hih ipilna geelsiamna te zang in ki omciat hi. Adiak in Singapore bang ah Zomi Engineering 100 kiim bang ki om a Zomi te haangtawh Singapore hizah a akhangto cileeng kikhial loding ahihi.

Music Lamsang ah

 

Zomi te peen Taangtawn pekpan in lasiam nam tumging siam minam ihihna leh amadawk mahmah ihihna ingeina luui suulnungte enkik leeng kilang hi. Kawlgam ciang en leeng Kawlgam ah Drum, Taamngaai cihkhawng aom mapek in ipu ipa ten Lohonna ah Kilong ci in Drum nazang khin uha, Tuabek hilo in Zolapi asak sim un Singtawng natat khitkhit khin uhhi. Latawh kisai leuleu in bangzahta in laphuah kisiam hiam cihleh, mikim phial in ihehna khat ahihkei leh inuamna, Lawm kingaihna, lungleenna cihte aomciang latawh phuah leh sak athuah pahziauziau minam te ihihi. Music Groups tawh kisai in taangtawng  kawlminam cihbang aomma nangawn in Ipu Ipa ten Daaktaal Groups, Phit Group naneikhin uha, kilawm tak in nazai ziahziah khintheita uhhi. Tuabang a isiamna namkim te Zomi ten tunidong kikhahsuah peuhmah lo in tu in Kawlgambup ah minthang ahi Tg Sangpi, Zamnu,Thawnkham,Cinpi,Cin Khan Pum cihte akipan Lasiam, Music siam tampi tak ineiphitphet laai hi.

Khathu lamsang ah

Zomi te peen dawi ibiak laai peek tuma sawtpi hunlaai pan ibiak a hi dawi alungkimsak zongiat minamte ihihban ah Daw Siampu dong aseemzo minam citak te ihihi. Zomi te siampu cihte peen tulaai a kawl dawibia Siampu maimaitetawh tehding hinaai suaipal lo hi. Khut kitan khe kitan nangawn muutdam lel uha asisa thosaklo ciang bek uh ahihi. Anung ta Pasian thu imuh vanglak ciang zong mite tawh kibang ngiatlo in isaanglen mahmah a, Leitungbup kiimvial Pasian mizat tampi tak ineita hi. Tuate lah alamdang mahmah phadiak thukhat in Zomi te in mimal 50 ciang Pasian naseem Pastor khatta kineizo a , mimal 500 ciang Doctor khatta kinei zota hi. Hih I Doctor neihte peen a angtan huai mahmah khat ah minamdangte a dan a lei cihpeuh hilo in asin ngiatngiat te hisawnsawn ahihman Kawlgam sung ban ah minamdang kheempeuh lak ah atam neipeen hiding in upmawh huai ahihi.

Haangsanna tawh kisai

Ipu Ipa te siding tungkik nawnloding cih theisa sitset in cikmah hun a atheih ngeinaailohna uh Piantit gam ah gaalhuhding in nakuankhia ngam uha, kimu nawnloding ihihciang ci in Beh le Phung Innkuanpihte tawh sa kigawh kikha in misi vaaikhak in thu naki vaaikhak uhhi. Khangthak hun leuleu ciang Gamtampi kantan in Passport cihkhawng kisamsak se lo in tuah bangbang tuakngam thuak ngam in USA,Europe,Ausse cihte ah akopkop akhiilkhiil in it le ngaih Inn le lo tampi te nusia in kileeng miai ngamlel hi. 

Citak mahmah in Ciampeel ngeilo

Zomi te peen taangtawng akipan micitak minam leh ciampeel ngeilo minamte ihihi. Bangzahciang in kicitak hiam cihleh Niik le Puan nangawn hoihtak akisilh zolo kimlaai Pasal te bang in numeite lawngkha leh agaaiding in ngaihsun uh ahihman in kilawng kikel lo uhhi. Tuaban ah zuau gen ngeilo mikheem ngeilo uh ahihman in Pinglong thukimna bang ah suaikaaipah lel uhhi. Iminam kiciaptehna in Vaphual cikmah hun a ciam apeello kisihpihding acih leh zong asikhawmpah tawh nakigenteh in ciaptehna nala uhhi. Ciam kipeel ngeilo ahihman in Kawlte tawh kiciamna Pinlong thukimna tunidong mah kingak hithiat laai hi. Khangthak hunciang zong kumpi naseem ahi Colonel Khen Za Mong te, Professor Dr C Thang Za Tuan te akipan adang Mi Minthang tampi te in a uk kumpi na phunselo pension alaakdong mah un seem ngeungeu in cihtakna nalak khia uhhi. Kumpi lehdo vanglak leuleu namun ah Pu Chin Sian Thang te,Pu Thawng Kho Thang te, Pu Gin Kam Lian te, Pu Vungh Za Pau te gaalhaang mualliamsa tampi te in atawptan phunlo ciaklo laulo in napangtinten uhhi.

Pilna Lam ah

Taangthu a akigen ngei Nywin in napil uh leh Khen Za Mong bang in pil unla nahai uh leh Van Kulh bang in hai un cih kiza ngei hi. Pu Khen Za Mong in adeih angetna kipialo ahihman ahaibang asakha ki om a, Vankulh a piaknop kisa ahihman pil asa bang ki omliang hi. Ataktak in Pu Khen Za Mong a kingah hileh apillam telsinsen in kithei ding hi. Tua bek hilo minam khat sung ah aompakpak lo Professor Dr Tuanno,Dr Lian Za Khup leh Khalkha te bang in aneihngei naailoh zong aneihpak lohding uh, Dr Hau Za Cin ( Van le Lei kikaal hawl pilna ) cihte akipan adangdang tampi omlaai, asinsin zong ki omalaai ki om zihziah hi. Pilna sin minamdang te zah in itam loh hang a omsunsun peen zattheih pahpah minam te ihihi. Aneu peen ah Zomi te koikoi ah itung zong in ahaipeen te nangawn ei le ei nungta in kuamah konlawhlo sa in ki om thei hi.  

Thu Mu Masa Den

Karen minam ten kawlgam bup ukcip in kawlte sang gilo zawding cih Zomi ten mukhol ahihman kawlte honkhia kawm in Karen te nil khia mang uhhi. 1990 kum NLD makaai teng akimat mangphial ciang cihnading bangmah theinawnlo Aung San Suu Kyi naw ngawn huihdiik theilo in aomciang Pu Chin Sian Thang in Oxygen adiktheih nading lampi namu hi. Gaalkaap kumpi in lampi tuamtuam zang in NLD leh Mualtungmite akhaktan kawmkaal ah Second Pinlong kisam cih Zomi te mukhia masa hi. Kawl gaalkaap bawl 2008 thukhunpi hoih kisalo tek a bangcih ding ci in Mualtungmi te abuai mahmah laaitak Zomi ten puahphat saang athakkhat gelh in Pinlong 2 na ah luuiding cihthu mukhia a Mualtungmi buppi in hoih kisa mahmah pah hi.

 

 

Hauhna lam ah

Kawlgam sung Chin state ah Boss mihaupi ci a ciaptehna angah masapeen katheihkhialh kei a leh Pu En Kap hi a Zomi ahihi. Tualo khuahun hoihloh man a neihsa apholaak ngamnaailo neih le lam sum le paai hau mi atawmpeen 1000 bang omding in kilam en hi. 2000 kum ciangciang ah Kawlpi pan Khalkha-Falam Bus 2 taai a midim ngeimeello hi. Kawlpi pan Tedim-Tonzang peen atawmpeen 5 taaiden a letmat kingah zo ngeilo den hi. Yangon khuapi sung ah Perjero , mawtaw hoih tuangte Zomi te na hi kiaukiau se hi. 

Hehpihna nei

Kawlgam ah Chin state azawngpeen gam in kiciamteh a, Chin state sung ah Zomi te teenna munteng azawng peen mun hiphialding in kilam en hi. Ahizong in Zomi te peen hehpihna itna lungsim picing mahmah kinei ahihman in, Biakna sung ah pawlpi lian, ahau zawdeuh te in Kawlte lak, Minamdangte lak ah ineihsa te zeek in ahawmkhia ziahziah te ihihi. Ei naai peen ah enpak leeng Chin state khanglam a om te pawlkhat bang Puan zong asilh theinaailo, an zong ane thei naailo ann neekdan, puan silh daan kihilh in ineih vaal lamp vaal ahilo te khenkhia in ipantah zo hi.

Hih atung a thu teng peen Maanpeen leh kicing peen cihna hilo zaw in Zomi te hihna lahnop na hizaw a, kiphatsakna kiliatsakna lah nopna hilo hi. Et theihpak ding leh thaneem ding hilo cih lahnopna hizaw a helding a kilawm akihel khalo zong tampi omkha ding ahihman in ongthei siamciat un ci in kongthuum hi.


Thang Khawm Pau Zomi

-- 
Thang Khawm Pau ZOMi
1009 Bryant Way Apt B
Bowling Green , KY, 42103
USA
Cell- 270 -217 9593
joseptpau@gmail.comThang.pau@perdue.com
www.perdue.com , www.zomipau.wordpress.com

Itna icih bangcihtheih ding ihihiam cih leh Khris in eite ading in anuntakna hongpia hi. Eite zong i khristian imipihte ading in inuntaakna ipiakngamding ahihi. (John masa 3:16)

 


Comments

wow, great, I was wondering how to cure acne naturally. and found your site by google, learned a lot, now i’m a bit clear. I’ve bookmark your site and also add rss. keep us updated.

Reply



Leave a Reply