WWW.TUNGZANGNEWS.COM

 
Zomite khuapi Kawlpi ah Zomite tamtenna mun - Phualpi veng, Leioi veng leh Tahan (West - Tahan Tuiphum) vengsung ah lampite Kultak kitheh lampi kibawl a nuam mahmah ta hi. Leisan suanghum lak ah ipai sangin nuamzaw a cycle mawtaw aa dingin hita leh khepaina ah zong lamtam tungtawn ipai nuamzaw tham hi.


Kawlte vengte tuma kum 20 laiin kibawl khin a, Mizite omnate tuma kum 10 laiin kibawlin Haka Falamte tennate tuma kum 5 laiin kibawl hi. Paite khuanung pil bek hiloin mite nung adelh ihi hi. Veng hausate kiang ah tuma kum 5 laiin midangte in bawl hi. Ei Zomite vengte ah kibawl theilo hiam ka cih leh sumdon haksa hi cilelin thudonlo a, amipite in zong thupi ngaihsutlo hileng kilawm hi.

Kawlpi pen Kawlgam khuapi anawhkhan mahmah khuapi 5 sung ah kihel a, Gullu mual hangin zong Kawl kumpi leh mihaute' mitla khuapi hita hi. Zomite khuapi hi icih pen tun Zomi itamman hiloin pulepa hunlai a Lansong( Kawlpi lamkabom) ciang dong Zomite neihsa innpi omlai a, Zomite innteekna khua ahi hi.

Manipur ah Lamka, Mizoram ah Tonsim, USA ah Tulsa, Kawlgam ah Kawlpi leh Tedim pen Zomite khuapi ahi hi. Zomite in Kake-Kabaw valley iluahsa ingah theihna dingin Tedim sangin Kawlpi ah innteek sawmin ikikhual ding thupi ding a, Zomi politiciante leh Zomi khangthakte in Zomite khuapi ciin Tedim alimbawl leh Kawlpi, Khampat leh Tamu kingahlo ding a, Zomite khuapi Zozum kiphuh masakna Kawlpi hi ciin Zomite khuapi lianpen Kawlpi(Kalaymyo) ibulphuh leh Kawlpi, Khampat, Tamu leh Tedim, Tonzang, Rih leh Cikha igawmzo panbek ding hi cih lungngai kawmin Tedim puah kawmkawmin Kawlpi ipibawlzawk ding thupi ding a, Zomite ansal zong Kawlpi-Tamu ahih kul ding hi cih tulai makaite leh khangthakte in limtak ngaihsun ni ciin veina lianpi tawh thusunna kong nei hi. Hong kuppih nuamte kilungdam hi.

Lang Khan Khai

 


Comments




Leave a Reply