WWW.TUNGZANGNEWS.COM

 
IN GOD WE LIVE

“Zomite omna khempeuhah Pasian kibia hi”

a kicih ki za mun mahmah hi. Pasian bia in A maipha zon ding a masak tangtang Zomite ih hih manin tua ih biak Pasianin hong nusia lo beklo in, hong koihkhong hetlo ding hi. Nopna ih tuaka, dahna ih tuak zong Pasian minlawhna in ih neih detna in, ih nuntakna khempeuh Pasian khut sungah koihin, Ama tungah akinga ih hihna hong lak hi. Jehovah in Zomite Pasian taktak ahi hi. Haleluijah…!!!

Kum 100 bek a pha pan Zomite,

Kum tul kumza tampi a phakhinsa minamte tawh hong kikhawl thei sak a,

Ama zat takcing dinga hong teel Pasianin Zomite hong angvan ahihna kilang hi.

Jehovah Pasian eite Pasian ahih mah bangin Eite Ama a ih hi hi.

Tuahsiat tuahphat ding sangin, Pasian maipha ngah hih ding thupi zaw hi.

Pilna-siamna, hauhna-liatna khempeuh sangin Amah thupizaw lai hi.

Kumpi gilo, minam thahat tampite sangin Amah thahat zaw peka,

Miliante sep theihloh van leh lei, khuahun tuihualte Amah bekin uk hi.

Tua ahih manin Ama maipha ih ngah ding thupi pen sak ni.

Ih gam ih minam ii Pasianin Amah ahih manin

Ih pawlpi sangin Zeisu liansak zaw in,

Ih pawlpi sung zongah Zeisu mah lian pen sak in,

Thu leh la khat peuh sang Zeisu liansak zaw in,

Ei mahmah sang zong Zeisu liansak zaw le hang

Ei tungtawnin Ama min thangin,

Ei tungtawnin Ama gam zai dinga,

Ih mimal sungah Zeisu meel kimu ding ahih manin

Ih gam Pasian ukna gam kici ding hi.

Ih nopna ih dahna sungah Topa ih sam den a,

Lunggimna ah “Topa deihna hi” ih kici thei a,

Gualzawhna ah “Pasian thupha bek mah hi” ih cih theihna in

Ama tung bekah a kinga ih hih lam a lakkhia ih hi gige hi.

Sangkahten Topa tung pilna ngen, gualzawh ciang lungdam ko

Lokho ten Topa tung ankungte ap, anlak ciang lungdam ko

Sumbawl ten Topa tung tuahphatna ngen, tuahphat ciang lungdam ko

Zum nasemten Topa tung a nasepna ap, zakhan ciang lungdam ko

Khualzinten Topa tung a vaiteng ap, inn tunciang lungdam ko

Cidam ding Topa tung ngen, kum phazah zui in Jubilee la, lungdam ko

Maban khat peuh Topa tung ap, huhna ngen, a tangtun ciang lungdam ko

Amah bekmah bulphuhin khua kisa in vai kihawm ahih manin

Pasian sungah a nungta taktak Zomite ih hi hi.

IN GOD WE LIVE

Veina leh muhkholhna tawh

JK Kam

ITNA LEIBA



 


Comments




Leave a Reply