WWW.TUNGZANGNEWS.COM

 
Gam khangto te ah pilna pen lampi tuamtuam in kisin a, nam tampi in pilna khen in akhil-akhil in kisin hi. Science pilna sungah zong, nam tampi om a, Arts pilna sungah zong nam tampi om hi. Nam khat kiukiau tawh Ph.D dong kisin thei hi.

Tuate' sungah Body Language ci-in maitang puakzia bekbek tawh Ph.D angah, tua pilna tawh mihau milian tampi om uhhi. Body Language icih pen Ei Zopau tawh maitang puakzia cilehang kitel pen hi. Ahi zongin tatzia hekzia agen nuam ihihi.

Thu genna ah:

Adiak in mitawh kiho a thu igen ciangin, mit hahzia, luhekzia, khutvanzia leh pumpi hekzia tungtawn in igen thu dik maw/diklo, lungsim takpi maw/puatham tawh cihte i khinkhai ciangin maitang puakzia in 50% thu gen a, tat le hekzia in 25% thu gen hi. Kammal tungah 25% bek kingah hi.

Mipi' mai ah:

Mipi mai ah thu gen khat in pheituam ipsung khawng sawk lenlan, kawng khawng len lenlan sa in thu hong gen leh mipi te zahtak apiak lohna namkhat alak ahihi. Tua banah mipi lak khawng khutme tawh hong kawk zanzan leh mipi te thupi sim phalo cihna alak ahihi. Lu khawng khuat kawmsa, ci khawng khuat kawmsa in thu hong gen leh a thugen te sungah zuau tawmtawm kihel cihna hipah hi.


Maitang Kituah:

Mi khat peuh tawh maitang kituah a iki ho ciangin, maitang mah sal gige a hongho ten hong thusim uh cihna kilang hi. Luzang pan khedawn dong hong et gualgual leh hong neumuh cihna kilang hi. I thu gen laitak hong tuh samsam leh ei gen lunglut lualo cihna kilang hi. Hong khuakhat san laplap leh mit khawng hongsuk san supsup ten i thugen te lunglut lo in um phalo cihna mit hek panin kilang pah hi.

Maitang Puak:

I dah mahmah laitak hong nuihsan luahluah a hong hehnem te pen ei dah banga hong dahpih zolo suak phot hi. I lungdam mahmah hun laitak a hong maigum ngeungau te pen hong lungdam pih tak zolo cihna kilang pah lel hi. Ei tungah alung kimlo khat aheh mahmah laitak hong nuih luahlauh leh hong thusim vetlo cihna hi a, hong tai gamgam leh hong thusim cihna hizaw hi. Hongit taktak ten hong maisak hi.






-- 

Dal Sian Hung
Kuala Lumpur, Malaysia.
Mob: 011-1521-5972
Email: dalsianhung@gmail.com
Facebook: Dal Sian Hung
 


Comments




Leave a Reply