WWW.TUNGZANGNEWS.COM

 




Khantohna pen nawh pai mahmah ahih manin ei zong nawhsa a i delh kei leh i pha kei ding hi. Khatvei bek i nuntakna leitungah i nawhpai mahmah kei leh eima nuntakna ah khantohna i zang man kei ding hi. Mite khang hathat in i mu dinga, ei lah mite nung delh den bangin i kingaihsun kha ding hi. Tua manin nawh pai mahmah ding hi hang. Nawh pai kisam hi cih gen sawm dih ni.


Khantohna i cih pen nisim a hih ngitnget ding a kisamte hih ngitngetna tawh kipan hi. Kum tampi adingin na gel khol tham ding hi. Kum tampi adingin na ngimkhol kha mah ding hi; ahi zongin nisim a na zuih ngitnget ngeina hoih a om kei leh na tup na ngimna te na tangtun kei dinga, na gelna zong kipelh ding hi. Tua ahih manin lawhcinna, gualzawhna, matutna, sepsuahna, gualtungtuanna i cihte pen nasep neu cik tawh akibang nasep hoihte tawh a kipan na hi limliam hi. Nisim na hoih khatta sem suah in na tup na ngimna a tangtungsak ding vai khat zo den peuh lecin na tup na ngimna te a hun in hong tungtoto lel dinga, na hahkat luat a na sepkhiat tawh kibanglo ding hi.

Tua ahih manin nisim a hih den dinga hoih thu 10 i gen ding hi.

1. Gel khol inla sep masak ding tel in: Gel kholhna omlo in kalsuan dan ding om theilo hi. Gel kholhna a om ciangin a sep dan ding kipatzia kingaihsun thei a, bang sem ding cih ngaihsutna leh theihna, muhkholhna hong kilak thei hi. Tua sep dingteng muhkholh khit ciang 'koi sem masa pen ding' cih hong thupi mahmah leuleu a, tua sep masak ding telna hangin kalsang kisuan thei hi. Na tupna a tangtungsak ding nasep khat peuh nisim in sep sawm hamtang in; tua hileh tuni na zat khit na lup ding ciangin 'tuni in tua na hoih semkhia ing' cih lungnopna tawh na lumkhawm ding hi.

2. Sunsiah nei kei in: Nasep ding haksa na neih leh a masa pen a sep dingin koih pah in. A haksa penpen na zawh khit ciang a dangte in hong zui deudeu lel ding hi. Tua bang nasep na zawh simin na nitha tung na sa mahmah ding a, lawpna na nei semsem ding hi. Lawpna khang semsem leh na lian sepnopna khang semsem dinga, nasep haksa na sakzelte zong na sepnopna hong khang in na lawp semsem zawsop ding hi. Tua ahih manin nasep ding a lian, a haksa a om ciang a masa pen ah koih in sem pah buatbuat ding; a nunung lam ah koih in nawhsa a sep sawmlo ding. Nawhsa in sep sawm lecin a haksatna kibehlap dinga, na dipkua in na lawpna zong kiam ding hi. Tua manin a masa ah sem hamtangzaw in.

3. Nasep dan thak a om ciang theihsawm pah in: Nasep ngeite nangawn a sepzia, a hihdan kilaih pahpah hi. Gentehna in computer tawh nasepdan zong a kum khat sung nangawn in kilaih man om thei hi. I khuta kitawi handphone nangawn a zat dan kibanglo in kilaih pahpah hi. Tua ahih manin nang tawh kisai nasepzia thak, vai thak, kizopna thak a om ciangin theihsawm in siamsawm in kisin baih in thei baih in, na lawmte mai ah na tai dinga, na kisik kei ding hi. Computer om tungin ka sanginn vuah sangkhawl sunga kisin theihna kihonga inn lam ciahlo in ka sin hi. Ka lawmte khempeuh inn lam ciah uh a, kei bekin sanginn ah computer ka sin ngakngak hi. Kha khat khit ciangin ka khangual lak ah computer basic sin masa pen ka suak hi.

4. A hoih lam in na khempeuh ngaihsut siam in: Haksatna leh vai khat peuh hong om ciangin mihing ngaihsutna leh lungsim kikhel baih diak hi. Tua bang hunte ah a hoih lam kipia in a hoihlam in ngaihsut ding kisin hamtang in. Hih kisinna bel a baih hetlo thu hi a, ahi zongin kisin hamtang ding pawl ahi hi. Tuhun ciang laibu sim sangin internet ah hun tampi bei ding a baih mahmah thu hi a, tua zong nang mimal adingin a manpha hiam cih ki-en in a hoihlama na zat theih kei leh ahoihzaw ding ngaihsun pah in kikhel ngam in. Na hih ut mahmah khat na hih mana na tup na ngim na tunloh ding sangin na kidek theih ding kisin huai hi. Na kidek zawh kei leh na ngaihsutna hong nawngkaisak thupiang, van, neih leh lam, sum, etc cihte mawhsak lo in a hoihlama zat theih dingin bel hei theih dan ding ngaihsut ding ahi hi. Zingsang na thawh ciangin nasep ding khempeuh a lungdam huai dan phawk inla, nasep na neih khawng zong lungdam ko zaw in. Na hoih, na lian sep theih ni hi ciin nisim in ngaihsutna thak tawh zingsang kuankhia den in.

5. A manpha hetlo hun beina te pelh sawm in: Internet ah hun tam zat lua cih bang a manpha mah hiam cih ngaihsun in a meetna a om kei leh na hun beina khiam sawm in. Na tupna a tungsak lo ding vai ahih leh a nop mahmah hangin kidek keikai in. Nasep masak ding hong semsak theilo vai a om leh paikan phot mai inla, a thupizawte sem ngam lel in. Sep dinga hoih khempeuh sep suk pahpah ding hilo a, matutna lianpi i neih nadinga vai thupizawte sep masak huai zaw hi.

6. Hong huh thei dingte thudot mengmeng in: Nangma nuntakna pen nangma deih banga a khantoh theihna dingin na kisap, na deih, nang hong nungthuap a tha hong pia thei ding mite na thei hi. Tuate kiangah na theihnop thute dong pahpah in. Na sinnop nate sin mengmeng in. Pattah na kisapna munte ah kipattahsak mengmeng in. Tua hileh na khantohna manlang ding hi. Nang sanga a theizaw leh a mu masazaw, a mitkeuh masazaw te manlang takin thudot, kholhpih, holimpih mengmeng in; tua hileh na mazap na tung baih tuam ding hi. Tua bangin kalsuan lecin na bah ciang hong kai dinga, na puk na dingmun pan hong hu dinga, na kisapte a hunlap in hong hilh thei ding hi. Tua manin thudot pen thupi bawl inla, mite maipha mu ngam in naih mengmeng in. Na kisap dinga na up, na theihtel melloh, na telnop thute zong ciamtehin na muan, na suan, na thudotnopte kiangah dong mengmeng lecin mainawtna hong manlang mahmah tuam ding hi.

7. A phatuamlo holimna tawh hun beisak kei in: Mite huh thei i hih kei leh mite siatna ding kikupna khawngah hun tam beiloh thupizaw hi. Mite a lamsang i hih kei leh a kaipuk, a sawntuk dingin kikupna leh holimna, vaihawmna te ah kihel kha kei zaw in. A pelh theih laiteng pelh hoihzaw hi. Tungsiahte genna, nuaisiahte sikcipna, lawm leh gualte makhelhnop luatna ngaihsutna siangtho lo leh hoihlote pelh in lungsim siangtho tak tawh om ding thupizaw hi. Tua bang thusia kikupna ding leh holimna ding mun ah na om khak ciangin zong paulap bawl in kihemkhia ngam mai in. Tua hikei leh na gensiatna, na niamkaihna kammalte leh vaite mahin na kim na kiangah vaitham in nang zong hong zap puk kha thei veve hi. Tua manin tua bang a om loh nadinga kihepkhiat hoihzaw hi.

8. Pumpi cidamna thupi bawl mahmah in: Mihing pen i pumpi cidam kei leh i lungsim zong siangtho in khauh veva lo pah hi. Pumpi cidam kei leh matutna lianpi, khantohna lianpi nei ta lehang a lungdam ding, a nuam ding mi lungdam zolo ahih manin a meetna tawm mahmah, kiam mahmah hi. Tua manin na lungdamna pen lungsim takpi leh pumpi tawh na dianpih zawhna dingin na pumpi cidamna hoihtak kemsiam in. Lup hak luat khawng a hoih kei leh kidek pah zaw in; ihmut cimloh sangin ihmut cimte pumpi cidamna hoihzaw hamtang hi. Nisim in khua-ul suaksak dingin lampai, tai, diang, vaksuk vakto cih bangin hanciam in. Tua hileh nitum ciang na pumpi tawldam dinga, nithak na muh ciang na thazangin nasep na lawp ding hi.

9. Nang leh nang bangciang tungta cih ki-enpha tawntung in: Nitak na lup ding ciangin tuni bang teng na semkhia a cih kidong in ngaihsun kik in. Tuni a manpha hiam, zanni a manpha hiam, zingciang ka manphasak zaw thei diam cihte ngaihsun kik hamtang in. Zawh ding na ngim na zawh manloh a om leh bangcih zop ding, na sep dinga hoih khat na sep manloh a om leh bang hun ciang hih thei kik ding cihte lungngai kik in. Nisim a nasep khiat a thupi mahmah vive hiding cih kisam lo a, nisim in a ciapteh tak nasep a om hiam cih kietkik ding hilel hi. Tam sep sawm lua lo ding, tam hih man sawmlua lo ding ahi zongin mailam hong nawtpih thei vai khat peuhmah nei hamtang ding, tua pen zo hamtang ding.

10. Lungdam ko hamtang ding: Nisim nasep ciamtehna laibuno (Diary) khat nei in na nisim matutna, na nisim nasep leh ngaihsutna thak neihte cih bang ciamteh kiaukiau hamtang lecin nidang ciang na khantohna na enkik thei ding hi. Na lungdamna ding na tuah, na sep, na hih, mi na huh, a thak na sin cih bang a omte gelh ding ahi hi. Nikhat sung bekbek in lungdamna ding thu tampi piang thei a, hanciamna ding zong tampi omlai thei hi. Tuate ciamteh in a hunhun in sim kik lecin na lawpna hong kibehlap dinga, na lawpna khangsemsem leh na lianzaw na sem thei ding hi. Na ngaihsutna hong kibehlap den dinga, na sepnop hong lian semsem in na matut nop hong lian semsem ding hi. Na sepzia ding, na khantoh zia ding zong a manlangzaw, a kilawmzaw, a hoihzaw, a kicingzaw in na kalsuanpih nuam dinga, zong na hihzo takpi ding hi. tua hi leh na lawpna kiam ngeilo in khangkhang dinga, nuam nasa semsem ding hi.

Mihing khan khat kum 60, kum 70 sungin khantohna tampi mu nuam, ciam nuam, thei nuam, tuak nuam i hih manin nawh pai mahmah ding kisam hi. Tua dingin midangte ngaklo in ei mahmah in kisin theih hi cih a gen nuam ihi hi.



Hau Za Cin
Phuitong Liim
http://www.hauzacin.blogspot.com




 


Comments




Leave a Reply