WWW.TUNGZANGNEWS.COM

 


Rev. Dr. J.M. Ngul Khan Pau

Zomi sungah laibu bawl tam pen leh thugen siam Rev. Job Thawngno inn ah May kha 2005 kum in ka hawh leh a inn min Van Daitui cih na kitaak velval hi. Siapa in a innmin dingin van daitui a teel ka ngaihsut kikkik ciangin gennop tampi nei dingin ka um hi. Pasian tung panin thu manpha, neih leh lam, leh zi manpha manpia-loin a saanna mun ahih man hiam, ahih kei leh Pasian in Ama thu siapa tungah van daitui kiat hunin a kiatsak na mun hi kha ding hi. Ei zong i nuntakna ah van daitui kisam vive ihi uh hi. Tuni in Lai Siangtho sungah van daitui kigenna tam lo kikum leng ci-in ka ngaihsun hi.

Van daitui hong pian theihna dingin khuavot leh tuikhu kisam hi. Israel tuipi tawh kinaih ahih manin tuikhu kingah in, sun hun sungin khua a lum mahmah hangin zan hunin khua hun kikhekin votpah hi. Tua ciangin tuikhu van lam kahto in huihvot tawh hong kinawk khak ciangin daitui hong piang hi. Hih daituite singkung leh lopate adingin nuntakna naak ahi hi.

Van Daitui manphatna: Israelgamah April panin October kha dong guahzu lo hi. Nipi hun sungin van daitui omlo hileh singkung leh lopate pan khaigah bangmah kingahlo ding hi. November panin March kha dong guahtui ngah uh hi. Guah leh daitui omna gamte gam hoih ahi hi. Syria gamkeu, Jordan gam leh Sinai mual naih dong guah a ngahloh hangun a kicingin daitui a ngah manun singkung lopa om thei hi. Zomite tenna gamte guahtui tamna gam ahih manin van daitui bangzah manpha hiam cih i ngaihsun kha kei hi. Guahtui tawmna gamah daitui a ngah uh leh lo leh huan bawl thei uh hi.

Van Daitui Lai Siangtho in a genzia: Lai Siangtho ah daitui leh guahtui kizangkhawm koikoi a, tua mah bangin guah a kicihna mun leh daitui a kicihna mun kinaih mahmah cih theih kholh ding deihhuai hi. Akizatna leh a tehpihte theisiam leng van daitui i pahtakna lianzaw kaan dingin ka um hi. Tua mah bangin thungetna i neih ciang zong van daitui i lu tungah hong kiat dingkilim ngetzaw ding hi. Tuate sung panin pawlkhat en ni:

 (1) Thupha ngahna lim hi: “Pasian in na tungah vantung daitui hong pia henla, nalote hoihsak ta hen. An leh leenggahzu tampi hong pia ta hen” (Pian 27:28). “Tua ciangin a omlai Israel mite pen Topa in minam tampite-a' dingin a piak, lopate a nosak zing daitui, lopate a khangsak guahtui a bang ding uh hi. Amaute in mihingte muan'in neiloin Pasian bek a muang ding uh hi” (Mikah 5:7). “Tua ahih ciangin Israel mite lungmuangin om ding uh hi. Jakob suante bek an leh leenggahzu gamah om hi. Hi taktak hi, a vantungte in daitui hong khiatsuk hi. Israel aw, mi nuamsa na hi hi. Nang hong kihuhna lum leh na gualzawhna lum leh na gualzawhna namsau ahi Topa in nang banga a hotkhiat mi kua om ahi hiam? (Thuh 33:28).

(2) Israelte adingin thupi mahmah hi: “Gam keuna muna guahzu bangin Israel mite tungah nuntakna guah ka hi ding hi. Pak bangin amaute palh ding uh a,Lebanon gama singkungte bangin zung thuk khakin a kip ding uh hi” (Hosea 14:5). Hih lai a guah kici daitui ci-in zong kilet thei hi. Pasian in, “Israel mite adingin nuntakna daitui bang ka hi hi,” ci hi. Pasian amau adingin daitui, guahtui bangin amau tungah zu hi. Manna ann zong daitui tawh kia khawmsak hi. “Zingsang ciangin giahphual kiimah daitui kia hi” (Pai16:13). “Zanin giahphual tungah daitui a kiat ciangin manna tawh kia khawm hi” (Gam 11:9).

(3) Thathak ngahna lim hi: Daitui in a vul ningniang lopate a nosuahsak bangin Lai Siangtho sungah thathak ngahna thu na gen hi. “Ka thuhilhte guahmal bangin zu-in, ka thugente daitui bangin kia hen la, lo-ngek tunga guah phin leh ankung tunga guahzu bang ta hen” (Thuh 32:2). “Topa in kei tungah, ‘Nitaang sunga nisa silsel, anlak nisat hun sunga meiizun bangin,’ ka omna panin daitakin ka en ding hi,” (Isai 18:4) ci hi. Hih lai a “meiizun” kici pen daitui cihna hi. Topa in anlak hun a nisat laitak, daitui bangin Ama deihsakna tawh anla mite thathak pia ding hi. Solomon in zong ki-it kingaihna vai-ah thathak ngahna hi bangin gen hi. “Ka lup hangin ka lungsim ihmulo a, ka ngaihno in kakong hong kiuh ka za hi. Itluat ngaihno ka lungtup aw, kei hong tumsak in. Ka lu tungah daingo kia a, meiizun in ka sam kawtsak hi” (Solomon La 5:2). “Nangma mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsangin na khangnona nangma tungah hong tung ding hi” (Late 110:3).

(4) Cipha suan leh khak hoih neihna lim hi: “Pasian in na tungah vantung daitui hong pia hen la, na lote hoihsak ta hen” (Pian 27:28). Hih lai a lote hoihsak kici in suan leh khak hoih neihna lam genna hi. “Topa in ama leitang, tunglamah a om vantung letsong hoihpente, leh nuai-a om a thuk nate tawh” (Thuh 33:13), vantung letsong hoihpente leh daitui tawh,” ci a leh ding hi. Israelte Moses in thupha a piak tawpna ah, “Vantung letsong hoihpente leh daitui tawh,” ci-in thupha na pia hi. Ei theih siam dingin gen ding hileng, Pasian in vantung panin thupha namcin leh suan leh khak cipha sapha in hong bawl hen cih tawh kibang ding hi. “Lungnuam takin lokho singpua-in nuam a sa ding uh hi. Lengguite gahpha ding a, guah tampi zu-in lo-ah an tampi piang ding a, a suaktalai ka minamte tungah hih bang thupha khempeuh ka tungsak ding hi” (Zech 8:12).

(5) Van daitui ngah loh pen hamsiatna in kingaihsun hi: “Tua ciangin a pa Isaac in, ‘En in, leitung pana piang an leh lenggahzu na nei kei ding a, na lo-a' dingin vantung daituite na ngah kei ding hi’” (Pian 27:39). Esau in a pa tung panin thupha hilo in hamsiatna ngah hi. “No Gilboa mualte aw, daitui ahi a, guahtui ahi zongin, na tung uhah omsak kei un. Tui thukpi kilok zong omsak kei un! Banghang hiam cih leh a vanglianpa' lum nin a, Saul' lum, sathau kinuhlo hi” (II.Sam1:21). Kumpi David in Saul leh a tapa Jonathan sihna mual Gilboa a hamsiatna la hi. Kumpi Ahab in Israel mite Baal milim biakna lamah a paipih manin Pasian hamsiatna guahtui leh daitui ngah loh ding thu hih bangin kamsang Elijah in pulak hi, “Tu-in Gilead gamsung Tishbe khua panin Tishbe mi Elijah in Ahab kiangah, “A mai-ah ka din'na Israel Pasian,Topa a nungta ahih mah bangin keima thu tawh loin daitui ahi a, guah ahi zongin hong tung ding kumte sungah omlo ding hi” (I. Kum 17:1).

Kamsang Haggai in Pasian thupha a ngahlo Israel mite kiangah biakinn lam kik ding a thupi bawlloh manun hamsiatna a thuak uh hih bangin gen hi. “An hau dingin na kilamet uh hangin tawmcik bek na nei uh hi. Na neihsunte nangawn uh inn na tunpih uh hangin kong mutkhiatsak mang khin hi. Bang hangin tuacih ka hi hiam? Note khempeuh, nomau' inn ding ciat lamin na manlah uh a, ka biakinn a siapi-in na koihdakna hang uh ahi hi. Tua thu hangin guah zulo a, leitang panin bangmah khangkhia zolo hi. Keimah in gamsung teng, mualtung khempeuh, leitang pana a piang kung khempeuh, mihing, ganhing, leh mite' nasepna khempeuhah keuna ka tungsak hi,” (Hag 1:9-11).

(6) Mi honpi genna in zong kizang hi: “Tua ciangin amah i muhna mun khat peuhpeuhah theihkholh lohin i hihgawp ding hi. Amah leh amah tawh a om mi khempeuh khat zong kisitlo ding hi,” (II Sam17:12). Hih bangin zong kilet thei hi, “Tua ciangin amah i muhna mun khat peuhpeuhah theihkholh lohin van daitui kia bangin amau tungah i hihgawp ding hi. Amah leh amah tawh a om mi khempeuh khat zong kisitlo ding.” Kumpi David in a tapa Absolom kiang panin a taikhiat ciangin Hushai in Absolom kiangah, “Na pa David leh a tonpih mi honte tungah van daitui kiat bangin i satgawp ding hi,” ci hi. “Nangma mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsangin na khangnona nangma tungah hong tung ding hi” (Late 110:3). Hih lai ah mi honpi leh daitui kigenkhawm hi.

(7) Kithutuakna leh sanggam bangin ki-itna lim hi: “Tua pen Zion mualte tungah a kia, Hermon mual pana hong piang daitui tawh kibang hi. Banghang hiam cihleh Topa in nuntak tawntungna thupha tua munah a pia hi,” (Late 133:3). Late 133 sungah sanggam bangin mite a tutkhop uh ciangin a hoihna nam nih in gen hi. Khatna, sathautawh tehkak hi. “Tua pen a puan ngawng tungah Aaron khamul kaisuk zui-in a lu tung panin a taaksuk sathau manpha tawh kibang hi,” (Aneu 2). Sathau a lutung panin taaksuk hi. Lu tungah sathau kinilhsak ciangin kumpi ding, kamsang ding, hamphatna lim ahi hi. Nihna, daitui tawh kitehkak hi. “Tua pen Zion mualte tungah a kia, Hermon mual pana hong piang daitui tawh kibang hi,” (Aneu 3). Tua banga sanggam khat bangin kithutuakna tawh mite a gamtat uh ciangin Pasian deihsakna maipha daitui bangin ngah uh hi, “Kumpipa hehna humpinelkai hawk bangin lauhuai a, ama pahtakna lopa tunga daitui taak bangin deihhuai hi,” (Pau 19:12).

(8) Kipiakna kiplo, kikhel themthum genna lim hi: “Israel leh Judah aw, note bang hong cih thei nawn ding ka hi hiam? Note' hong itna pen zingsang meiilum bangin thengpak a, a mangthangpak daitui tawh kibang lel hi,” (Hosea 6:4). Pasian tungah na kipiakna kiplo kikhel pahpah na hih leh daitui hanga kawt lopate keu kikpah tawh na kibang hi. Tua bang bek a kipia Israel mite Pasian in daitui keupah tawh na tehkak hi. Efraim mite tungah Pasian in ama deihsakna tawh a kep hangin milim bia teitei uh hi. Amau kipumpiakna zong daitui keupah tawh kibang hi: “Tua hinapi-in amaute khialthuah semsem uh a, a biak ding uh milim a bawl uh hi. Amau' ngunte milimin bawl uh a, hoihtakin khutsiamte a bawlsak uh hi. Tua ciangin, “Hihte tungah biakna pia un,” a ci uh hi. Mihing in milim bia-in nam tazen uh hi. Tua ciangin amaute pen zingsanga kaai meiilum, a maimangpak daitui, ancilna panin huih in a letkhiat ansi, meikhu suahna-a a pai meikhu bangin a maimang ding uh hi,” (Hosea 13:2-3).

(9) Thawhkikna lim hi: “Nangma mi a sisate hingkik ding uh a, amau' pumpi thokik ding hi. Han sungah a lum mite aw, tho-in lungdamin la sa un! Banghang hiam cihleh zing daitui in leitung a nosakkik bangin sawtpi-a a sisa mite Topa in hingkiksak ding hi,” (Isai 26:19). Sihna panin mi siangthote a thokiksak ding Pasian vangliatna daitui tawh kitehkak hi. Pasian daitui in guh bek tawh a om nuntakna pumpi hong pia kik ding hi. Hih thu hangin Job in sihna panin thokik ding ahih leh Pasian a muh ding hi bangin gen hi: “Ahi zongin a tawpna-ah kei hong pan'pih ding a nungta tawntung khat vantungah a omna thu ka thei hi. Natna in ka vun a nektum khit hangin, hih ka pumpi mahmah tawh Pasian ka mu ding hi. Keima mit teekteek tawh amah ka mu ding a, amah in kei hong khualmi etlo ding hi. Ka lungsim in a lunggulh hi,” (Job 19:25-27).

(10) Cih theihna khantohna lim hi: “A zung in tui a ngah tawntung singkung tawh ka kibang a, daitui in a hiangte a nomsak singkung tawh ka kibang hi,” (Job 29:19). Tui a ngah, daitui a ngah singkung khangto loin om lo ding hi. Khristian nuntakna ah zong Pasian in singkung tawh, lenggui tawh hong tehkak hi. Late 1:3 sung i et ciangin mi nuamsa mi hamphate hihbangin na gen hi: “Amah pen lui tuiluang gei-a a kisuan ama gah hunin gah a, a teh a vul ngeilo singkung tawh kibang hi. Ama hihna khempeuhah a ma pai mahmah hi.”

Pasian ta na hih leh na ciamteh ding thu tamlo kong pulak nuam hi. Khatna, Pasian khut in nang hong suan hi. A po mawkmawk singkung na hi kei hi. Pasian in lei hoihna mun ah nang hong suan hi. Nihna, hong suanna mun in luitui luanna gei ci hi. Tui kiang, tui kicing mahmah a kingahna mun hi. Na khan nop keileh tuidawn nuamlo singkung na hi ding hi. Thumna, gah hunin gah cih ciangin ngaihsutna nam nih om hi. (i) Gah hun cih ciangin a singkung picing khin ta, gah hun hita cihna tawh kibang hi. (ii) Gah hun kum simin om a, tua hunin gah cihna zong hikha ding hi. A thupi pen gah hun a gah cih hi. Nang Khristian na suahzawh a sawt zo maw? Singkung hi leteh gah hun khin hi lo na hiam? Lina, a teh vul ngeilo cih ciangin hing sitset, hing kilkel cihna hi. Singkung ciatciat vul ningniang cih bang hiloin a cingtaak nuntakna a nei (John 10:10) tawh kibang hi. Na nuntakna teh a vul pahpah mi na hi maw?

Atawpna ah, na nuntakna ki-en kik dih; a nosuak a hing sitset na hih keileh van daitui na kisam hi. Leitung thu leh la in a zawh manin a gah theilo na hi hiam? Pasian hong cihna munah na omloh manin van daitui na tungah hong kia nawnlo hiam? Leitung sum leh pai deih gawhna hangin van daitui in nang hong pel hiam? Hih thului ka gelh kawmin Sia Thawng Za Kim la ka bilkha in ka za hi:

Sun nisa lel a a vul ningniang pakte
A palh kiksak thei daituite bang zah etlawm
Zion mualtunga Hermon daitui ciim bang
Etlawm Kalvari kross kei-a hi.

                        Kei nuam lua ing, Topa aw,
Kong muan theih nuam lua ing
                        Ka theih gige ka Gumpa nang na hi
                        Bang zahta in nuam diam na mai kong muh hun ciang
                        Gen ning, gengen ning; sasa ning hi thu mahmah
                        Zion mualtunga Hermon daitui ciim bang
                        Etlawm Kalvari kross kei a hi.





KUMPI SOLOMON LEH MIHAU BILL GATES TUNG PANIN

Rev. Dr. J.M. Ngul Khan Pau

Lai Siangtho ciamtehna ah a hau penpen, a pil penpen Kumpi Solomon tung panin nuntakzia ding leh tuhun leitung bup ah mihau penpen Bill Gates tung panin i sin ding pawl khat tutungin kikum ni. Amasa in amau hauhna tawh kisai kiciamtehna tawm khat en ni.
Solomon Hauhna: II Khang 9:13-20 i et ciangin, Kumpi Solomon hauhna hih bangin kiciamteh hi. “Tu-in kum khat sungin Solomon tungah a tung kham a gihna talen za guk leh sawmgukleguk hi a, sumbawlte leh sumbukte' tutte a kisimlo ahi hi. Arabia kumpite khempeuh leh gamsung a ukte in Solomon kiangah kham leh ngun puak uh hi. Kumpi Solomon in kham a kiseek lumpi za nih bawl hi; lum khat ciangin a kiseek kham shekel za guk bei hi. Tua ciangin amah in a kiseek kham lum za thum bawl hi; lum khat ciangin kham shekel za thum bei hi. Tua ciangin kumpipa in Lebanon Tulak Inn sungah tuate koih hi. Kumpipa in saiha kibawl kumpi tokhom a lian khat zong bawl a, kham citak tawh zut hi. Kumpi tokhom in cial guk leh kham a kibawl khengakna khat nei-in, tuate kumpi tokhom tawh kimat a, a tutna pang tuakah ban ngaknate leh a ban ngaknate pangah humpinelkai nih ding a, kahlei cial guk mong ciatah khat ciat, humpinelkai sawmlenih ding hi. Kumpi gam khat peuhpeuhah tua tawh a kibang kibawl ngeilo hi. Kumpi Solomon' dawnna haite khempeuh kham hi a, Lebanon Tulak Inn sungaumlebeelte khempeuh zong kham citak ahi hi. Solomon' hun lai-in ngun bangmahin kingaihsun lo hi.
Bill Gates Hauhna: Tuni July 8, 2010 ni in Bill Gates hauhna $58.420316 billion in kiciamteh hi. Minute thum sungin a hauhna $50,000 in khang man tazen hi. A sum neih khempeuh dollar khat in kigual leh leitung panin khapi dong giat vei tung ding hi. Dollar khat vive in kiciang to ding hi leh tai (mile) 2,690 in sang ding hi. Amah bek leitung gam khat in kituat hileh gam hau kisimna ah 76-na hi ding hi. 
KUMPI SOLOMON TUNG PANIN
Lai Siangtho sungah mipil leh mihau pen Kumpi Solomon in nuntakzia ding tampi a gelh sung panin i zatpah theih ding pawlkhat Paunakbu sung panin en ni.
            Nu leh pate tawh kikalah: “Ka ta aw, na pa' hong thuhilhna hoihtakin zui in la, na nu' hong thugente ngai in,” (1:8). “Ta pil in a pa lungdamsak a, ta hai in a nu dahsak hi,” (10:1). “A pa' hilhna a ngai nuamlote mihai hi a, hilhna a mang nuamte mipil ahi hi,” (15:5). “Tute pen puteekte-a' dingin minthan'na lukhu hi a, tate pen pate' minthan'na ahi hi,” (17:6). “A pa nawtgawpin a nu a notkhia tapa pen zumna leh mindaina a piangsak tapa ahi hi,” (19:26). “Na nu leh na pa na samsiat leh khuamial sunga om meivak kisumit na bang ding hi,” (20:20). “A pate samsia-in a min a daisak, a nute a phatlo mi pawlkhat om hi. Amaute a nin mahmah hinapi-in amau' muhna-ah siang a kisa mahmah mi pawlkhat om hi,” (30:11-12).
            Kithuhilhna: “Ka ta aw, Topa' thuhilhna limtakin ngai-in, hong tainate thudon in (3:11 Job5:17). Bang hang hiam cih leh pa in a pahtak a tapa a thuhilh bangin Topa in a it mite a thuhilh hi,” (3:11-12). “Kihilhna man'na nuntak lampi zuihna hi a, hilhna man' noplohna lampi lauhuai zuihna ahi hi,” (10:17). “Thulamlak ding a neilo mihingte kipuk uh a, thulamlak tampi neihna pen lungmuan'na ahi hi,” (11:14). “A ta a tai nuamlote a ta mudah hi a, a ta a itte in limtakin thuhilhin a tai hi,” (13:24). “Thu hong man'theih lai-in na ta thuhilh in; na hilh kei leh a siatna ding a deih na hi hi,” (19:18). “Naupangte a hai gamtat a ngeina hi a, deihtakin pangbetna in mihoih suaksak thei hi,” (22:15). “Naupangte sat ding lunghiang kei un; satna hangin silo ding hi. Ciangduai tawh sat le uh cin nuntaklawh zaw ding uh hi,” (23:13-14).
            Nasep Hahkatna: “Nakpi takin lo khote in an hau a, man neilopi-in hun beisakna in haina ahi hi,” (12:11). “Mi thanuamte vanglian a, mi thadahte sila suak hi,” (12:24). “Thadahte a tup tung ngeilo a, a thanuamte in a deih ngah hi,” (12:27). “Thadah mi in a deih ngahzo lo a, nasep hahkat mi in a deih khempeuh ngahzo hi,” (13:4). “Ol takin hauhpakna oltak mahin kiamkik pah a, haksapi-in hauhtohna khangto semsem hi,” (13:11). “Gimpi-a nasepna pen hauhna hi a, kam bek pau-in tutmawkna pen zawn'na ahi hi,” (14:23). “An duhna in mi na semsak a, gilkialna in nak sepsak semsem zaw hi,” (16:26). “A nasepna-ah a siam mahmah mi na theikha uh hiam? Amah in mi mawkmawkte' na semlo ding a, kumpite' na sem ding hi,” (22:29).
            Lawm leh Gual: “Mipil tawh kikhawl lecin na pil ding a, mihai tawh kikhawl lecin gimna na thuak ding hi,” (13:20). “Lawm citak in a tawntungin hong it a, i sanggamte pen i lungkhamna a hong thuakpih dingin a piang ahi hi,” (17:17). “Midangte tawh a kipawlthei phalote amah bek thupi a kisate hi a, midangte' cih khempeuh man a sak khat beek omlo hi,” (18:1). “Lawm pawlkhatte sauvei kimanglo a, lawm pawlkhatte sanggam sangin kipzaw hi,” (18:24). “I lawmte in hong liamsak hangin i hoihna ding a hong deihsakna hizaw hi. I galte in hong ngawng kawina pen hong lehbawlna ahi hi,” (27:6).
            Zahmawh thu: “Numei paktatte' kampaukhuaizu bangin khum mahmahin a thugente uh a neel dakdak hangin, a tawpna-ah lungkhamna leh natna simloh nangma tungah bangmah dang hong guanlo hi. Amah in sihna gamah nang hong paipih ding a, ama tot lampi pen sihna mun tun'na lampi ahi hi. Nuntakna lampi-ah amah omlo a, nang na phawkloh hangin amah lam pialin a vakvai ahi hi,” (5:3-6). “Mi' zi tawh na mawhlohna dingin nang hong kemin, kam khum zangin a hong zol numei ginalote kiang panin nang hong hu ding hi. Amau' melhoihna iplahkha kei in la, amau' hong zawlmitna khenglahkha kei in. Banghang hiam cih leh anlum khat tawh numei paktat khat kingahzo a, ahi zongin numei tawh mawhna in nuntakna bup siasak hi. Na ang sungah meikuang pom lecin na puan kangloin om ding ahi hiam? Mei-am tung tawnin pai lecin na khe kangloin om ding ahi hiam? Tua mah bangin mi' zi tawh a mawhte in gimna thuak ding uh a, tua bang a gamta peuhmah in gimna thuak ding uh hi,” (6:24-29). “Numei tungah mawhna pen thangzak bang hi a, tua thangah a awkte tungah Topa a heh hi,” (22:14). “Numei paktatte pen kiattheihna ding gum tawh kibang a, numei ginalote pen tangciak theihna hawkguam tawh kibang hi. Gutate bangin nang hong buksim a, mi tampi tak siasak uh hi,” (23:27-28). “Pilna a deih mi in a pa lungdamsak a, numei paktat tawh a kikhawl mi in a neihsa teng lawnmang hi,” (29:3).
BILL GATES IN KHANGNOTE A THUHILHNA
Bill Gates in khangnote a thuhilhna nam sawm leh khat hih a nuai-ah kong gualsuk hi.

  1. Nuntak baih lo hi – tua hangin hanciam in.
  1. Leitung in nang hong khuallo ding hi, leitungah nopsakna na ngah nadingin bang hiamah lawhcing masa phot in.
  1. High school ah sangkah kawmin kum khat in $60,000 na lawh khia ngei kei ding hi. Car zong na neihna ding leh tua zah sum na neih nadingin na thalawh masak kul hi.
  1. Na siapa genhak nasak leh ama siapa na muh dong ngak phot in.
  1. Burger bawl a kithalawh ding zumna in tuat ken, na pi leh pute’n tua banga nasemte hampha nasa uh hi.
  1. Na lawhcin kei leh na nu leh pate hang hi lo hi, tua hangin phunphun kenla, na hih khialhnate panin sinin kibawlphat sawm in.
  1. Na pianma in na nu leh pate na cim man (boring) khawl lo uh hi. Inn na lei khin zo, nek leh tak a lim nono hong pia zo, laisimna ding sum leh pai hong pia zo ahih manun nang ngaihsut sangin na pilzaw uh hi. Na nu leh pate cinlohna na gen ma-in nang cinlohna kimu masa in.
  1. Na sangkahna ah mi lawhcing leh mi lawhsam na mu ding hi. Ataktakin ci leng sangnaupangte adingin laisim lai zawh loh ding omlo hi. Na siate nangawnin na zawh teiteina dingin hong hanciampih ding uh hi. Ahi zongin leitung nuntakna tua tawh kibang lo hi.
  1. TV a na muhte a taktak hilo ahih lam mangngilh ken. Leitung nuntakna ah mite’n coffee dawnin tutu man lo uh hi. Nasep ding zongin a muh uh ciangin tu man loin sem uh hi.
  1. Nang leh nang na kitheihcian kei leh midangte’n hong buaipih manlo ding hi. Tua bang dingin hun na ngahnop hangin nasepna company te’n hun hong pia lo ding uh hi. Na hun neih sunsun manpha takin zang in.
  1. Mi tawh kikhawlkhawl khollo amau bekbek a thu ngaihsunsunte simmawh ken. Na dam leh amau nuaiah na nasem kha ding hi. Company na neihma in amau bangin thu ngaihsunsun-mi na hih ding kisam masa hi.

            Kibawlphat ding hanciamna a nei, hilhtheih leh hilhding lunggulhna a nei; tua bang mite mi hampha ahi hi. Kumpi Solomon leh mihau Bill Gates tung panin na theih thute zangkhial ken. Topa in thupha hong pia hen.

 * * * * * * * *


Vaak banghang vom hiam?

Kisam hiven. Vom kei leh amah 'mel' (color) neilo ding hi. Tangthu ah - vaak in mi zemzem in a tawpna ah amah a kizemna ding om nawnlo in belmang kinuh, tua manin vaak tuni tan vom suak hi - kici hi. 'Tangthu' himawk ahih cianga a pian laitaka mute in a gen uh a kigen toto, a kimangsaklo thu hi dinga, tua manin zong maan lel ding hi. Maanlo hi cihna ding proof om tuanlo a, maan hi cihna ding proof zong om tuanlo hi. Mihing te Zawng pan piang hi a ci pawl om a, mihing te Pasian bawl hi cih Christian te in i um hi. Mihing pilna themcik tawh bel kisutkhia zolo hi. Up ding hilel a, theihzawh ding hilo hi. Vaak banghang vom a, vasa dangte bang hang gial uh hiam? Kisam hilel hi. A tua dinga a kibawl, piansak laia kipiangsak hilel a, ei buaipih ding omlo hi. Banghang vaphual lu guh vive tawh kidim? Kisam hilel hi. A tua banga a om ciang vaphual ahihna kilanga, mul khawng po thilthel leh vaphual ahihna om lo ding hi. Vamul khawng suak lel ding hi. Ahih kei leh
min pia masa khat peuh min piak tawh kiciamteh lel ding hi. 
 
Akpi in banghang nawi neilo hiam? Kicinglo hiven. Tangthu ah akpi in nawi hawmhawm a, a tawpna ah ama ading zong hawmkhin in kicing nawnlo a, tua manin akpi in nawi neilo hi kici hi. Tuni dong akpi nawi nei om nailo hi. Ak khawi khempeuh in thei ding hi. Akno a keuh ciang a keuh ni mah in leilak phiat in an zong pah uh a, vokno suak, bawngno suak bangin a pi nawi teplo, a pi nawi tawh kivak phot cih omlo hi. Amau nek ding a pi in zong haizan sak tuanlo a, phiatkhiat sak bek hi. A muh bangbang uh a neu a lian tu pah leihleih uh a, an kizontawm pah lel uh hi. Mu in hong vil leh bel akpi in a kha nuai ah sel in liah cip a, kimusak lo hi. Aknote in zong lauhhuai om cih thei leh (a kihilh khol mah ahi diam) a pi khanuai zuan damdam uh a, a pi khazak nuai ah kibu tek uh hi. 
 
Thankik in no a neih ciang bang hangin kem in khoilo hiam? Kisam hiven. Akpi in nawi a neihloh hangin a note ann zonpih a, a let dong kikholhpih buang hi. Thankik leuleu in bel a tui khit ciang a tuite gul in ne maw, ahih kei leh keuh maw cih zong theilo hi. Vakmangsan lel hi. A tui lei lak ah phum in vakmang san a, a tuina mun zong phawk nawnlo. A no keuh maw keuh lo cih zong phawk nawn se lo hi. A note in a nu leh pa thei in na um hia? A DNA test le uh bel thei kha ve. Thankik te in DNA test a hih ding uh mihing ngaihsut pak in bel gamla lai leh kilawm mate? A nu leh pa a theih uh kisam khollo hi inteh. Tua ahih leh a mangthang, a vakthap a hi diam? Hi tuanlo sam. A nu, a pa khawng mah tawh tano a neih khop kik na mel uh zong i thei a hia! Sisan kinai hileh tate ginalo thei cih khawng a ngaihsun tam uh? Uphuai khol sih mate? Ka nu ka pa kua ahi tam ciin a lungngai ngei tam uh? Theih utna lungsim khawng a nei tei tam uh? Nei lo maithei, nei maithei. A
neih uh hang a theihna ding uh ollo kha ding. I panpih thei diam? I panpih man diam? I panpih a phatuam diam? 
 
Ngasa a tui ciang a tui keuh dong cingin kem in a khoi tam uh? A no keuh leh e? A no a khoi toto diam? Tuipi lianpi sungah ka no tua hi ei, ka pi tua hi ei, ka pa tua hi ei.... ka sanggamte tua teng hi ei ciin a kankan tam uh? Theihpih khol khang mate? Theihpih leng a phatuam diam? Theihpih in a note uh ciamtehsak in, a let uh ciang 'hih na pi, hih na pa, hih na na nu' ciin hilh kik leng e. Phatuam tam? Bang meetna a om tam? Theihloh pen a meetna a om diam leh? A kitheihloh uh pen a nuamzaw diam? A hoihzaw dinga a bawlpa bawl ahi tam? Ahih kei leh a thei banlo ding zaha 'hai' a kibawl ahi uh tam? Ngaihsutna neilo ding, thu ciamteh theilo dinga kibawl ahi tam? Ahi kei leh ngaihsutna nei, kithei tek uh, innkuan, beh leh phung, u leh nau mah tawh kithei a nungta mah uh ahi tam? A nuntakzia uh en theihpihlo zaw i hi tam? 
 
Mihing ten i u i nau, sanggam u leh nau i kitheih pen a phattuamna bang ahia? A phattuamlohna a om diam? Kitheilo hizaw leng a hoihzaw tam? A kitheisa in i khankhiat sangin a kitheilo in kikhangkhia leh a nuamzaw tam? Ganhingte bangin eima nuntakna ding ciat ngaihsun in zongin sem leng a nuamzaw tam? Kipawl, kizom, kikhawl in i om pen nekzonna namkhat mah hilel hiam? Kitheih kinaih pen nuntakna neite omzia ding mah ahi tam? A tuabang tawh buai selo te nuntakna leh a tua bang tawh buaite nuntakna a kibang veve hiam? Mawtaw, vanleng, meileng, khawng i bawl pen a kisam takpi mah hi ding hiam? Machine, weapon, tools, engine, khawng a kibawl pen a kul mana kibawl hiding maw, a ommawh khat khut ommawh mana kibawl hiding maw? Guahzuk hun, nisat hun ding i theihkholh khawng a metna om takpi mah hiam? Puansilh nikten khawng i lim zat mahmah pen a tua dinga piang mah hi ding i hiam? 
 
Vaak pen a kang hong suak khin leh vaak mah a hilai veve diam? Zawhngeu pen nidangin a gial philhphelh hi a, tu hun ciang, a vom, a kang, a san, a mel tuamtuam hong omta hi. Zawhngeu mah hiveve lai hi. Mi eitungah gilo mahmah dingin ei zong mi tungah dik tuan kei leng a kibang mah hilel lo diam. Zawhngeu a kang sitset hang zawhngeu mah hilai veve hi. Vaak a kang hang vaak mah hi lai veve a, sahang a kang hangin sahang mah hilai veve hi. Akpi nawi ngau liahluah in kai dangdang leh bel nuihsuak huai ngel ve. 
 
 
Hau Za Cin
Phuitong Liim
 


Comments




Leave a Reply