WWW.TUNGZANGNEWS.COM

 

Kum sima ih zat den ahi Nute’ ni pen ni om khempeuh lakah a manpha pen teng kitelkhia in hileh nga lakah a Khatna ahih kei leh a Nihna hi hamtang in ken ka ummawh hi.

Hih bang ni in pasal nei a ta nei khin teng deidan om lo a pahtawi ni hi a, nute’n hih ni hong tunkaal ding a ngaklah mah bang un tate’n zong ngaklah mahmah hihang. Hih ni mah in nute tungah Itna thu gen ngakngak hanga, biakinn sunga thugen khempeuh in zong nute’ thupitna bek mah cilphuan kaai liangin gen uh hi. Bang hangin gen lo mawk ding! A dang thu dang peuhmah kigen thei lo hi. Nute’ ni himawk hiven.

Nu nei napi nute’ itna a ciamkha lo leh nute a hehpih thei lo pawlkhat aa dingin hih bang ni thupi pen ni dang tawh a kilamdanna om lo kha ding hi. Tuhun nuntakzia, nungak tangval bek hi lo nupi papi om khong thei lote khuasak luhekzia ih muh tak ciangin Nute’ ni a thupitna a thei zo lo mite pen mawhsak theih leh mihai mimawl khat banga ngaihsut pah theih zong hi tuan lo hi. Mawhsak ahuai zaw kua hiding hiam cih pen dot kul lo a theihsa hipah lel hi. Hih bang ni thupi ni hong tun ciangin lungdamna mel a thei lo leh nute a pahtawi lo ih muh khak zenzen leh zong amaute pen mi hehpihhuai leh thungetsakna tampi a kisam cihna hipah hi.

Lam khat panin enkik lehang nulehpa pahtawina mel atheilo ten ta hong neih tak uh ciangin amau tate’n zong hih bang ni thupite pen thusim theih dingin zong ngaihsun lo uh a, midangte nulehpa pahtawi nuamin diang ziahziah mah taleh amau pen ngaihsut mel nei lo in om hilhial lel uh hi. Ei Zomite’n ih paunaak sungah “Sakhi api san, ano san” cih khat ih neih mah bangin Laisiangtho sungah zong “ Na vawh bangin na at ding hi” cih thu na om a, hih tegel pen kizawitawn kei mah taleh kituak hilhial ka sa hi.

Mi pawlkhat ta leuleu in Nute’ ni ci-in pawlpi sunga nupi om khempeuh pahtawi nuam in sum tampi bei lawh uh a, amau Nu om lai gige khawng peuh mangngilh ek thei uh hi. Hih bang mite zong lam khat panin en lehang thupi mahmah napi a thupitna uh bucing zo lo ka sa hi. Nute’ ni pen nu neilai na hileh nang Nu ni hi a, na pianna Nu mangngilh liangin midangte nu thupisak zaw ngei kei in. Paunaak Laisiangtho 23/25 sungah “Na pianna na Nu lungdam sak in” ci bek a, “midangte nu na lungdam sak in “ ci lo hi. Ahizongin midangte nu na hehsak inla, na khasia sak in aci zong bel hi het het lo hi. Nang Nu mah thupi masa pen hi. Midangte nu bel midang hi photphot hi.

Bang bang hitaleh mikim in ih theih dinga thupi ka sak khat pen Nute’ ni bekin nute tungah amau ih Itna pen thu leh laa leh gamtatna tawh lak khia lo in, a twntung in a It den zo tanu tapa ih suah theih nangin hanciam lehang hoih pen ka sa hi. Bang zah takin ih nu pen haiin mawl in taitai phial mah taleh leitung mi tampite lakah amah bek mah ih nu himawk ahihman in ih it ding ahihi. Nu tampi a om phial zongin nang Nu hong sileh Tagah na hi veve hi. Tuni pen kei pianna ka Nu’ ni a hihi.

Nu aw, nong Itna lian lua, cikmah hunin hong thuk zo ngei kei ning.

Itna tawh Zo Sunni pan,

Francis Lamthang (Zomi Quavadis)

 


Comments




Leave a Reply