WWW.TUNGZANGNEWS.COM

 
Kong it Tawngno,

Lawm ngaih tawh kisai in na pa’n lawm na ngaih ding hong kham keng. Na ut peuhpeuh, hoih na sak peuhpeuh ngai in. Laipian te ahi-a, miliim bia te ahi zongin hong phal ing. Mivom, mikang ahi zongin hong kham keng. Ahi zongin 'Zomi’ te kan in kong deih sak om kei. Na deih deih, na utut ngai thei hi teh, hong kham lo hi’ng. Ahi zongin Sang lai en lo, ki khop hun ah kikawm lo liangin numei tawh buai in, laikiat lawh liangin zawlthu tawh na buai ding peuhmah hong phal kilkel lo hi’ng. Kong gen zel mah bangin na pa zong nang ka bat zong hi lo-in ka tan ( 2 ) kah lai in ka khan pihte numei khat hoih sa-in a inngei khawng ah kapai ciangin kamai zum in kisuang in suangkhawng ka sui kha thei hi. Ahi zongin College ka man dong numei hangin kei leh kei kisia tawm sak lo-in numei hangin ka khitui luang sak lo hi ing.

Hih bang kong gen ciangin, ‘ka pa a ngaih te tawh kikhen kha ngei lo hi-in teh,’ hong ci kha ding hi teh. Ki khen ngei hi ing. College kum ( 1 ) na ka kah laitak in ka ngaih mahmah numei khat in tha khat thu in hong khen vat hi. Na salua kisa in ka sang bang tawp sawm hi’ng. Ahi zongin dam in ka ngaihsut kik ciangin hih numei khat leltak hangin ka sang tawp mawk leng kei kasuum ngel kei ding maw! Pasian hong gawm loh hi’n teh ci-in tha kala tawm hi. Na a sa lo bang, a phawk nawn lo bangin om ka kisin hi. Na asa lo hi keng, na a sa lo bang in om a kisin hing. A phawk lo hi keng, a phawk lo bangin om a kisin hing. Tawngno aw, haksa mahmah na pi’n zo zo veve hi’ng.

Tawngno, na ngaih khat tawh na kiken ding hong phal keng. Kong panpih theih ding aom leh zong hong panpih lai ning. A zenzen in kikhen na ding thu khat aom leh zong na pa bangin kisin in, na kigin kholh ding hong deih ing. Tua hi leh na mailam hun kisia lo ding hi! Nang khangual khangno tampi tak numei bawl, lawm ngaih hangin a mailam uh a kisia gawp tampi tak na pa in mu ing. Ka lawmte mahmah zong lawmngaih bawl in kisia mang uhi.

Hih bangin ka tuak khak thu te kong gen zel ciangin Tawngno in hoih tak ciamteh in galvan bangin na lungsim ah pua den le cin ut ing. Banghang hiam cih leh nu leh pa tampi tak te-in atate’ uh hih bang thu kuppih dingin ngaihsun lo-in, a hun tung ciang thei lel in teh ci-in tua ci koih lel uh hi. A hun tun ciang theih kha mah uh teh! Ahi zongin zekai lua kha thei ding hi! Sanginn ahhih thute kisin lo-in, kumpi in laisim bu sung ah zong koih lo uh hi. Sia, Siamah te’n zong hong hilh lo ding a, na dong zongin sanginn sung ah hong hilh lo kha ding uh hi. Leitung na khualzin na lampi ah na puk khak, na hawi khak loh na dingin na pa in hih laikhak te hong gelh zelzel hi ing!

Na pa zong ka ihmut hong suak duaiduai ta, hih zah tawh hong khawl phot ning. Mai ah hong gelh lai ning!

Hong it,
Na Pa

May 1, 2014
Columbus, OH

 


Comments




Leave a Reply