WWW.TUNGZANGNEWS.COM

 

Tawngno,

2007 Kum March kha sung ahi tam tel lian nawn keng. Kigin ni khat bel hi ngel ven, pawlpi pan in ‘ Pa Sa Gawhna’ci-in sapna lai ka ngah aa, a hun pen hun dang mah bangin nitak nai 3 in hun kipan ding ci hi. Ei pawlpi bel Pa Gin in ciamnuih cihtak in, “thaukaa khat ka neih sangin pawlpi Upa kasep, sa ne mun zaw ing,” acih mah bangin kha khat in nih vei thum vei peuhmah pawlpi sung Lungdam koh inn thunget om den takpi hi. Ama cih zong a hih na ciang khat om leh kilawm sa takpi ing.

Na pa zong na sangkhak ni uh ci-in na nu kiang ah, “ Naupangte nih tawh sailohgal ah va kuan nung in, nang’ inn na ngak ve,” ka cih leh utlo se-in,“ naupangte innngak sak zaw in eite nih in tuitawng gal en pak ni,tua khit ciang sailoh gal ah pai ni,” hong ci ahih manin na nu tawh tuitawng gal ah ka kuan uh hi. Nitak lam kuan kik nawn lo-in zii gei aa Pa Tuang te’n ‘Pa sa gawh’ lungdam kohna ah ka pai hi. Hun man annek khit ciangin na pa zong ka kamtam teng mah hiven ci’n, “ Pu Khual, an tampi na ne zo beek hia leh? Khupthang’ pa bel etteh tak sa ing, hih ci bangin Pa te’ tung ah lungdam kohna hong neih zawh,” ci-in a pu uh ka hopih hi.

“ Hmmm…thei khang ei mataw…Pate’ tung lungdam ko sa gawh ci na pi, a pa’ duh dan aa lahhong bawl sak lo, hong huan sak kei uh ei! Amau duh dan teng in huan uh! Ka ha aom nawn loh tawh ne zo mahmah keng,” hong ci mawk hi.

Na pa ka om hong nuam vat het lo hi. E’n lungdam kipaak takin pawlpi min tawh hun bawl in lungdam koh biakpiakna nei-in, a pai khempeuh Sia leh upa te akipan nuamsa in lungtai in aom uh hangin sa gawh min pua, a Pu uh lungkim zolo, lungtai zolo mawk hi.

Tua in ngaihsut hong tam sak in, ‘ Pa te sa gawh ci-a pa in lim sa lo, ne zo lo, lungtai lo’ cih bek bek ka lungsim ah om in, inn ka tun ciang na nu kiang ah ka ko pah hi. Tua hun in kong gen hangin tel zo nai lo ding na hih manin tu’n na tel theih ding ciangin hong gen pan hi ing.

Tawgno aw, na pi ading ci-in na khat peuhpeuh na leisak vua leh, na pi’ deih mah dongh in na pi’ duhte mah leisak in bawl sak un maw! Na nau ading na leisak sawm vua leh zong na nau mah tonpih in na nau mah teelsak in leisak un! Tua hi kei leh hua hun lai-a ,pata sa kigawh te’ mah bangin i leisak, i sa gawh te-in deih lo-in, duh lo-in ne zolo kha ding uh hi.

Na pa in ka hih mah bangin kong laikhak te na ngah ni, na daily bu sung ah ciamteh le cin hong deihsak ing.



Hong it,
Na Pa

May 7, 2014
Columbus, OH

 


Comments




Leave a Reply