WWW.TUNGZANGNEWS.COM

 
Vondeih Kep Ding – 26




Kong it Tawngno,

            Na pa in lai kong khak ciangin ka tuak khak thu te kong hel zel lam kiphawk ing. Ka tuak khak thu te hong gen kik leng nang adingin hoih pen kha ding leh lung hiang omlo pen kha ding ci-in um ka hih manin hong gen zelzel hi ing. Ahi zongin tutung bel adang kong gen nop thu khat om!




            1853 pan in 1878 ciang Kawlgam ah kumpi asem Mindon Min ( King Mindon Min ) thu khat hong gen nuam ing. Mindon Min in Kumpi a sep sungin tu laitak in Nyipyidaw pen Kawlgam khuapi in a kineih mah bangin tua lai-in Madalay pen Kawlgam khuapi in bawl in na siatak in puahin tattong ( pagodas ) khawng lim bawl mahmah hi. Tu laitak in kawlgam in a kisak theihpih leh gamdang tourists tampi tak in zong a et tangtang uh Shwedagon Pagoda zong hih Mindon Min in kumpi a sep sungin a piak khiat hi. Tua bek hilo in gamdang Piantit , Italy, Great Britain leh U.S gamte ah pilna sin dingin mi tampi tak pai sak lai hi. Ih gam a it mahmah leh a khan sungin a puah a zun mahmah kumpi khat cileng kikhial lo ding hi.




 ‘A neulai Phungzi sang ah sang kah in a om lai-in ni khat a sang ngak Siapa in ngasa keu pia-in, “an nek ciangin na meh ding, hoih tak kem in,” ci hi. Aman zong bizu sung ah hoih tak a koih hina pi-in Zawhngeu in na neksak cit ciat hi. Phungzi pa in a theih ciangin cinglong ( ciangduai ) khat la-in, “ hih nga keu tawm cik na ngawn keem zo kei le cin, gam uk in om le teh bang ci bangin kem zong peuh mah ding,” ci-in deihtak sat gawp hi’ ci hi.




Na pa’n tuma kum (10 ) lai-in ka sim khak tangthu hina pi-in ahi zongin tuni ciang dong mangngilh thei mahmah lo hi ing. Na neulo khat ah i cihtak ding hong hilh hi. Inn pan in na nu in na hoih na dingin ciangduai tawh hong sat in, sang pan in na Sia te in na pil ding hong thei in hong sat ciangin heh ding, thangpaih lak leh khasiat dingin ngah sun kha ke’n.




Hong kitot lai teng hong ki-it mahmah lai ahih lam phawk tawntung in.




Ih Inn nung aa Pa Khan te nupa a kingaih lai-in aman zu dawn in kham thei hina pi-in a lawmnu’n khat vei zu kham dan aive. Pa Khan zong a lawmngaih nu in zu kham ci-in a kigen ciangin heh lua mahmah in zong in a muh ciangin a humsam pan manin benhual gawp hi. A zing a thai lam ciangin  kikholh pih te in, “ zong kiteeng nai lo-a tua bang a hong hih gawp, hong vel gawp, amah bek pasal aom hi kei, khen o,” acih leh ama’n,“ Hong it hong ngaih taktak lam tun tel pan ing,” ci-in dawng zaw hi.




Hih mah hi. Ih It, ih ngaih te a sia in agamtat ding kiphal hethet lo hi.




            Na pate ka tan ( 4 ) lai un ka Manglai Siapa un lai ka ngah loh uh ciangin hong satna ding, cinglong lei na’ng ka khanbup un mi khat ciang peek nih ta hong dong hi. Ih pil zawk na ding, i hoih zawk na ding, i kikhel na ding ahih nak leh na pa in bangbang in thu hong ki hilh in hong kitawng zongin thuak zawh sawm hiing.




Tawngno in na bang cih ngaihsut a leh, na pa' ngaihsut dan e khial nong sa hia?




Hong it den tawntung,




Na pa

May 10, 2014

Columbus, Oh USA

 


Comments




Leave a Reply