WWW.TUNGZANGNEWS.COM

 

Kong it Tawngno,

Tawngno aw, om dan khawl dan tawh kisai in na pa in kong gen nop tawm om:- Mi inn ah na hawh ciangin an nek tawh a kituah leh kileh kik in, an ne ding a kitawi leh zong, ‘ mun khat ah kapai na ding om in den ciangin hong baang kik ning,’ ci-in paikhia phot in. A zenzen in anne in hong sawl tantan leh a mau innkuan teng kham khit ciangin ne pan le cin hoih ding hi.


Kisai lo pi-in mi lupna khan sung khawng peuh ah pai mawkmawk kha kei in. Khin tung khawng en-in khua dakdak in khua khakha kei in. Mi pawl khat te mi inn ah hawh ci-in a innsung khawng peuh, a lupna khan sung khawng peuh paiphei in etsak mawkmawk uhi. Tua bang gamtatna pen kilawm lo hi. Nu leh pa te’ hilh lo, gen loh bangin tua bang peuh in gam ta zanzan kei le ci ut ing. Khat peuh in letsong hong pia-a nek theih ahih leh zong ne pah in, niik leh puan ahih leh zong silh pah le cin hong pia te a lung uh kim ding hi. Nang’ nek dingin hong kipia khat na nu puak in, nang’ silh dingin hong kipia khat na nau pia le cin hong pia te a lungkim het lo ding hi.

Bizu sung ka laibu koihna-ah, “ Mite’ Nunzia 90%” cih laibu Sian Cin Zam ( SDA ) i gelh na zong in la, na man kal in nasim le cin hih laibu sung ah gamtat, kam pau, omdan, khawl dan ding thu hoih thu manpha tampi tak om hi. Na pa’ kong gen sang zong kicing zaw lai hi!

Pa pi te pau leh ka tangval no, nang ka bat lai nitaks khuamui kuan khat in i tuangdung tungah na pu leh na pi tawh tu-in na pu’ hong thugen khat na pa in mangngilh thei lo hi ing. ‘ Inn lak na vak ding uh ciangin, “ Pa, kei tua ah pai ning.”“ Nu, kei ka lawm ten ah va hawh pak ning ei,” ci-in na nu kiang ahi zong, inn aa om khat peuh peuh kiangah gen hamtang in,’ hong ci hi. “Tua bangin hong gen kei le cin na om loh kal khat peuh in na lawm na gual te khat peuh hong hawh in hong dong leh na paina thei kei le ung ka gen ding uh omlo hi. Na om kei zongin na pai na, na hawh na thei le ung ka lung uh nuam hi,” hong ci hi. Tuni dong ka bilkha ah zaza lai hi’ng. Veng te’n ka hawh ding ahi zong, nitak ki khawm ding ka hi zong, kawlpi ka pai ding ahi zongin ka pai ding ciangin na pu kiang ahih kei leh na pi kiang ah kapai na ding mun, ka zekai leh zekai loh ding gen masa in tua khit ciangin ka pai nopna mun ah kapai khia pan hi.

Na pi in zong hih bang thute hong hilh zelzel in teh maw!

Ahong it den,

Na pa
May 16, 2014

Columbus, OH USA





 


Comments




Leave a Reply