WWW.TUNGZANGNEWS.COM

 
2014 kum tunnu pahtawina ni tawh kituak in tagah abang Zomi te' tunnu Zogam ah zalenna ngahkik nading hamciamna mitkeuh sakding deihna in, Judah te pianna tunnu leitang ngahkik tangkona konghawm sawn hi.

Tel Aviv, Palestine, Saturday, May 15 – Palestine kuampi sungah British Thusa sepna(mandate) a tawp zankim hun aa kipan in Judah Nampi Gam (The Jewish state), leitungah suahtakna a thak liklek ngah in, a minpi dingin ISRAEL GAM (State of Israel) kici dinghi.

Hih gamthak dingkhiat vai a awilo USA nangawn in, thakhat thu in theihpihna hong tangko vatciang in, buluhkik dingaa kithawi Arab gamveng te langdo pih dingin huhngen aa tangko kei pawlkhat leh UNO nangawn hong khuadaakvat zawzen hi.

Zomi khang tangthu mangsia uipi in honggaihsak bangkek hunsia kawmkaalpan in lamet huai hunpha sungah hong khanglovat tawh kibang phial cihtheih, leitung ah a vanglian leh a thahatpeen USA in leitungbup kipawlna gam bangkua sungah hong tualtangsak ciangin dah leh patauhna teng hiuhmuutkeek hongbang zuahmah cihi.

Nitaklam nai 4 hun in, Gam thusapi masa pen leh Nampi Vaipua kipawl makaipi pu David Ben-Gurion tungpan in, gamthak tangko na daitak leh lungngai tak in hongtangko ciangin huihnunglai nangawn din’khawl phialleh kilawm hi. Mipi sungah nuntaakna thak hong kibuaksuk bangkeek ahih kawmkaal ah, thau ging, thauvui khu tawh ki lazo suahtaakna ahihmah bangin lungleng khuangaihna zongh huihlak dimin zeel hi.

A masa peen in Gam vaipua kumpi thak in 1939 Palestine Laikang Dal (Palestine White Paperof 1939) kici Judah peemtaa te leitang neihtheihna gaakcipna thukhun beisiang masa sak hi.

Gamthak tangko na sungah kumpi in, “Judah te gamthak lamna panpih ding leh leitunggam kipawlna phualpi ah hong lutsak un” ci-in UNO ahzongh thum masa uhhi.

Tangkopi na ah: Gamveng khempeuh leh mipi khempeuh tungah daihna/Lungnopna leh ki itna khut kongkhak uhhi, nuamtak khuasa khawm in a suakta Judah gamthak tawh mual suakkhawm liailiai ni. Middle East/ Ur khua pan kipan ih pu Ham nautualkaihna gamteng lamthak nading leh gamdaihna lamthak kiknading in Israel gam in theihtawp suahin kongpang dinguh hi.



Gamluahkik na leh khaangtoh na leh kh~angtampi hanciam in Israel luahkik nading/ the redemption of Israel sunmang tangtung kik na thu, leitungbup Judah te tungah tangko in cialna ka hongnei uhhi.

Tangkopi pawi hunpen simtham takin kigeel in, hun kipat masiah lengla zahtak leh thupuak palai zalom khatval losiah in theikhollo uhhi. Zinmang pawl nangawn in pawi munding suangkang inndawlnih sangaa, Tel Aviv ah kilam khutsiam kivak lahna innpi/ Tel Aviv Museum of Art ah hun kibawl ding ahihlam pen hun kipatma minute 10 ciangbek in kizasak pan hi. A tungah David Aksipi a tuang gam dialkaii kikhai, a nuai ah Paletine kuam Judah pahtawi pia pawl/ guard of honor of the Haganah te’ kigual uhhi.

Khawkzum makaipi/ minister leh kumpi vaisai milian te hong sungtang ciang un, thupuak lamsai te, Limding/ limpai(media) manbu meiphia ziahizah kawmkaal ah mihonpi awng ziahziah uhhi. Daihna keempawl/ security kiseh danzongh paubanglo hi. Sten thausau/ kawlciang tawh munciteng leh innkhum tung nangawn ah gaal kivil sak hi.

Tangko na inndeipi sungaa kisuang dingin Judah khutsiam kiva te zep a kithehthang Judah minamte thuakkhakna leh nuamna limzeem laidalpi te kikhai hi.

A tunglam aa kikhai meldum leh melkang puan kikhuikhawm gampi dialkaii kikal ah 1897 kumpek in Judah gamthak ding a geelmasa leigam pa ahi Theodor Herzl limlaakpi kikhai nuai ah, Gampi vaihawm khawkzum makai sawm le thum kigual in tu hi. Khawkzum makaipi te tutna veilam pangah minam vaihawm nasem milian tu in a vekun 37 pha uhhi. Pawlkhat bel Jerusalempan hong phaphei zolo uhhi.

Nitaklam nai4 a satphet in, vekin dingto in Gam/ Minampi lapi Hatikvah sakhawm hi. Mi khempeuh in lungsim leh kha tha tawh lawptak in sa ziahziah ahihman in maikaipi pu Ben-Gurion in tangkopi nalai hongsimkhiat ciangin kidai zopan hi. Tangkopi na lai a simgaihkhit ciangin tuahun laitak aa kisialhpih ding gamneilo mikhempeuh mi tawh liangko kikim zahtaakhuai gamnei mite hongsuak ta uhhi. Tuazawh ciangin, Paletine ah Judah gamthak kiphut in Israel ci’n min kivawh dinghi, a cihkhit phetin lungdam leh nuam in mihonpi awngziahiziah hi.

Laikang dal thuneihna leh Leitang thukhun te beisiang hi cih tangko khiatkhit ciangin, tua laipi tungah pu Ben-Gurion in panin milian khempeuh in a zomzom in minkuih giitciat uhhi. A tawpna ah gampua vaisai khawmpi zum leh UNO tawh kizopna Judah palai in minkuih a giitkhit ciangin hunpi kizo tahi.



Hunpi mahial nading in tumging pawlin gam/minampi lapi tumin mi khempeuh dai dide in ki dingciat hi. Inn pualam ah mipi te kikawi, kibansah, kinam in nampi itna kisial kawmin dialkaii te huihlak ah lek ziahizah hi.

British Thuneih hun abei lian zankim 11 pm aa suahtaakna tangko ding ahih hangin Sabbath ni kipan khinding ahihman in nai 4 a lolzaw in kitangko ahihi. U pa pu Shertok in a genkikna ah a zingciang lah Sabbath hita, Brittish thuneihna a beizawh leh gammthak phuhna kikal awngthawl sak nuamlo ahihman in hihbang in nai 4 lol in ki tangko khia hi cihi.

Suahtaak tangko laipi sung thumasa ah, hih leitang pen pupa te luahsa Israel luahcilna panin tuni kikal tangthu leh tuhun kikal kigelh suk hi. A kilang zaw in, pu Herzl’ in pupa luahsa gam sunmang, 1917 Balfour tangko na in Jedah tuan pupa gam kipsakna, leitung gam kipawl na in kipsakpih na leh Nov 29, 1947 UN Huampi Thu kikupna khentatna thu te kicing zaw in kigelh suk hi.

Laihkik leh puahphat ding akulnawnlo UN theihpih leh kipsakna lai ah leitung minam te gam le lei thuneihna tawh gamkhat in a ding mahbangin Judah minam, gamkhat ki vaipuakna khat nuai ah kiptak in ding tahen, cih theihpihna pen bangthu khatpeuh hong omzongh in kikhel kikthei nawnlo ding, kiptak in gen hi.

Tangkopi in a genna ah zankim khit aa kipan a omsa Nampi kongsil panin donghu Nampi vaihawm pawl ci’n vaihawm na min kikhel dingaa, vaipua khawkzumpi in Oct ni 1 kiteelpi na masiah thunei tosuak ding in phalna kipia cihi.

Tangko na azom ah, leitungbup aa kithehthang Judah khempeuh hongciahkik theih nading in hih Israel gamthak in kongkhakpi hong in, nuntaak nuam khuasak naahihtheih nading in Hebrew kamsangte laibu khutleen in suahtaakna, thumanna leh daihna tawh ih kidimsak ding hi.

Tangko na azom ah, beh nam ki lamdang , upna biakna ki lamdang,pianken’ zahmawh ki lamdang na khatpeuh paulam in deidan, tuambawl leh nawlkhin na omlo ding aa, mikhempeuh in suakta tak lungdeih teel upna zui in biakna pia thei, upna pulaak thei, leh pilsin na leh ngeina kepcing na neithei dinghi.

Thusuah tangko khupna ah, Gamte kipawlna (UN) thulai guipi lenkip kawmin biakna namkim te siangtho pen mun leh muan te’ kidemtheilo siangtho na ki keemden, ki zahtaak den ding ahihi.

Jerusalem lamziikpi panin Camas lampi dongah mipi lungdam in lamziahziah hi. USA ahzongh lungdampihna mihon pawipi kibawl hi.


ZH




 


Comments




Leave a Reply