WWW.TUNGZANGNEWS.COM

 
Mipilte gen theih zel ka zak ciangin Zomi sungah lai tawh nasep mah baih lo pen hileh kilawmsa ingh. Minam pil leh khangto te lakah lai tawh nasem a laibu gelhte mah kizahtaak in vang kipia penpen hi. Laigelh siamte lakah Millionaire/ Billionaire a suak zo mi tam mahmah uh hi. Gentehna in Harry Porter tangthu gelhnu bang pen a laibu gelhna hangin Billionaire suak zo ek a, Sidney Sheldon, Jeffry Archer, Dan Brown, Poulo Coelho cihte pawl zong a laibu gelhna uh hangin Millionaire suak zo uh hi. Mipil leh mi khangto ten laibu pen thusim mahmah uh hi. Lai sim cihtak mah in na sim uh hi. Laibu sungah sum tawh lei zawh zoh, manseh theih loh pilna om cih thei uh ahihman in laibu na lei in na sim tangtang uh hi.



Ei Zomi sungah e leh? A tamzaw ei Zomi sungah lai tawh nasemte mipi in en neu in, mi thadah leh hun awng neite ciin simmawh bawl zanzan uh hi. Tua man mahin laibu kibawl sunsunte zong leisak ding cih thadah man piak lohin phuum leng zong phup zawh loh tazen uh hi. Hihte ih ngaihsut ciangin namdangte ih bat nai lohzia leh ih khantoh lohzia kilang mahmah hi. Laibu khat lei ding sangin ei hong siasak thei khamtheih guihtheih lei ding kihanthawn zaw hang a, dangka tang khat tawh Newspaper khat lei ding sangin Zaa tawn khat ahih keileh kuunza khai khat a lei nuam zaw kitam mahmah lai hi. Tua ahihman in ei Zomi sungah lai tawh nasemte pen zawn lawh lianlian uh hi. Laibu gelh ngei khat in laibu hong gelh nawn loh ciangin mi citak lo leh mi lawhsam in ki ngaihsun pah a, ki simmawh bawl hi. A taktak in cilehang laibu gelhpa pen simmawh bawl ding hizaw lo a, a leisak lo mipite’n laibu manphatna leh pilna thupitzia tel zo nai lo ahihman un mipite a hamsia leh a hehpihhuai hizaw uh hi. A sumh taktak pen mipite hizaw hi. Laibu gelhpa bel sumlehpai bek asum hi a, a pilna leh a laitheihna pen kuama guuksak theih loh ahih banah tua pilna leh laitheihna a zeek khiatna ding mun tam lua lel hi.



Zomi sungah ‘theih tam, tel tawm’ cih kammal hong kizat mahmahna ahang hoihtak kanin hilehang laibu leh laisim a thupisim het lo ih tam luat man ahihi. Migen zaakna ciang bek tawh tampi tak lungkim lel uh a, kician taka kan ding hileh laibu asim hong kul ding ahihman in kuamah in hun pia zo lo uh hi. Pawlpi sia pawlkhat pen migen zaakna ciang bek tawh a lungkim lel uh a, bangmah kan beh se lo uh hi. Laisiangtho mun khat hong lem ziau in, gual khat khong hong sim ziau lel a, tua tawh nai khat val sung bang elzen in thu hong gen thei uh hi. A thugenna ah midang gensa khat peuh hong genkik in, ama hoihsak leh san theihdan peuh hong gen a, a kaal lakah ciamnuih khat leh nih hong hel kiaukiau thei lai hi. A za a ngai mipite nuinui sak zo uh ahihmanin cim lo uh hi. Ahizongin ciin ding vom ding tampi om khollo pah hi. Tua thugenpa in a Laisiangtho taang sim ii deihna leh tupna cian takin theiin gen thei hileh pawlpi mite pawl taitai cih bang om lo kha ding hi. Tua thugenpa in mipilte leh Pasian mizat Misiangtho te laigelhte khong sim in kician takin thukan hileh a thugen in vaang hong nei dinga, a Laisiangtho taang sim ii deihna leh ngim bulpi hong tel ding ahihman in mipite aa ding panin zong hong zaaknop mahmah bek tham lo in mangngilh pah cihbang hong om nawn lo dinga, Pasian thulaigil ngai takpi nuih nilohna leh lusukna cihte hong tawmzaw deuh ding hi.



Laisim hahkat leh laibu a thupisim ei Zomi sungah hong tam ni ciangin khantohna ei aa hong hi ta dinga, ih omna namdangte khutnuai pan in kilamto thei ding hihang. Tuani ciangin Gamthumna ih lunggulh denna zong hong veng diaidiai dinga, kithuhual theihna in ei sungah mun hong ngah ding ahihmanin pumkhat khauhual khat bangin Zomi te om khawm, pang khawm, mainawt khawm thei ta ding hi hang. Tuani ciangin ei Zomi sungah mipil khat leh khat Zolai gelhzia tawh hong kinialnial nawn lo ding uh hi. Ih theih hong tam in ih tel zong hong tam ta ding ahihman in ih thu theihna leh ih thumuhna zong hong zai mahmah ta ding hi. Tuani ciangin Lasiangtho sangkah khempeuh in pawl thak hong phuan nawn lo ding uh a, Zomi teng ih omna a kilamdan hangin Pasian thu leh Minam vai ah ih lung hong kaak nawn lo ding hi. Laibu sungah pilna om hi, simsim ni. Laisiangtho zong laibu mah ahihi.

 

Itna tawh "Zo Sunni" pa'n,

Francis Lamthang (Zomi Quavadis)

 


Comments




Leave a Reply