WWW.TUNGZANGNEWS.COM

 
  Leitungah nuntak khuasak theihna dingin ka nulepa ong gawmsak a thupha ong piaksak Topa ka pahtawi masa hi.

Ka nu gil sungah ka om a kipan ka nu leh a gil sunga om kei ka cidamna dingun ahih theih tawp tawh lokho singpua, sum zong paai zong ka pa' ong itna bang tawh teh thei ding ka hiam? Ka suah khit ciang zong ong it mahmahin ong nono nuam himah leh zileh tate adingin sum zong paai zongin guahzu nisa nuai haksa sa mahmah ta leh saklekhang ah zin suk zin to hi.

 

Lampai kisin leh pau kisin in ka om ciang zong hong sinpih nuam mahmah in lam kalkhat kalnih ka pai theih ciang kam malkhat malnih ka pau theih ciang nuam mahmah in lungdam mahmah hi. Ahizongin inn ah ong ompih hun ding neilo liangin ziletate ading khualman mahin sumlepaai zong dingin zinkhia den hi.

 

Sang kah thei dinmun ah ka tun ciang sumbeina kibeh lap to ahihmanin ka pa buai tektek in ka pa tawh ka om khawp hun tamlo hi. Ka pa in Pasian thu tawh hoih tak ong pan tah ahihmanin ka nu leh ko unau in ka pa ka zahtak mahmah uh hi. Ka nu leh ko unau tengin ka pa tuaci zawdeuh leh ci-in ka hawmthawh ngeikei uh hi.

 

Tan lang pan tan 8 (giat) ciang ka pa'n amah leh amah hanciamin sang ong khazo hi. Tan 9,10 Khuapi ah kah kul ong hita ahihmanin ka theih pih loh hang ka pa a lungkham mahmah ding hi. Ahizongin ken ka pa ka muang mahmah a ka pa'n Khuapi ah sang ong kah sak zo lel in teh ci'n ka muang mahmah hi. Ka pa pen tan 2 ka kah laitak a kipan Pasian na hubit in semta hi. Khuapi Boarder ah ong koih nuam ahihmanin sum alom a puak kulta hi. Ka pa'n thudang onggen lo in na lai uh ong hanciam un maw mite khut nuai ah omlo ding hi hong ci ngiat in thu hong nget sak tangtang hi. Khual ah sang kah pen simmawh i tuak hun leh i gialkial hun om in lunglenglua in ki om thei hi.

 

Tua ciangin nulepa ki honuam ngaungau in ki ciah nuam mahmah hi. Lunglen ding leh lungkiat ding ka pa'n thei ahihmanin lai ong khak a ka lunglen ong nuam tuam in thathak ka lakik zel hi. Ka pa'n thu ong hilh ciang, phone tawh ong hopih ciang leh lai ong khak ciangin Paunak 4:7-8 tawh tha ong pia denin tha ka ngah mahmah hi. Sangsap ding leh zat ding sum a om loh ciang ka pa kiangah ka vaikhak den hi. Ka pa'n ama khut sungah sum a omloh ciang zong mite kiangah leitawi zongin ong khak veve hi. Ka pa ong itna leh ong khualnate cik mah hun in ka thuk zo ngei kei ding hi.

 

Ka pa it banga ong it ong khual ong panpih ong lamsang ka it mahmah uh ka pano ahihi. Ama ading zong khawllo liangin ko unau teng ong huh den hi. Tu dongin ka kisapna khempeuh uh ama tungah ka ngenlai uh hi. Ka papi leh ka palaiten zong amau hih theih zahzah in ong huh uh a thu ong nget sak den manun ka lungdam mahmah hi. Pate' ong itna gengen ni gelhgelh ni cileng bei ngeilo ding hi. Tua ahihmanin ka pa ong itna, ka pano ong itna, ka pa sanggamteng ong itna leh ta bang ong nei a ong it khempeuh tungah kuama piakzawh loh Pasian hehpihna thupha ong tungkim ciatta hen.Amen


Zomi ka hi hi.
Suanno
Malaysia
HP:017-6402338
http://zamsuanlangh.blogspot.com/

Nothing is impossible

 


Comments




Leave a Reply