WWW.TUNGZANGNEWS.COM

 
Thuthak Tomkimcing 18 June 2014


A. Japan te in Zogam ah' Singzat kul loh, Fuel Factory hongding.

Japan gammi te neihsa Kisyu Nenryo Co.Ltd te in Zogam Tedim khuapi huam Valvum khua ah' Singzat akul lo alum leh thahaat na apia thei (ထင္း အစားထိုး ေလာင္စာ) Factory hong in nasep kipan ta ding uh a, omna innte leh thuvaihawmna zum inn lamta ding uh hi. Hih thu tawh kipawl in Kisyu Nenryo Co.Ltd Company leh Kawlgam sung aa om Hi-Tech Company(ထင္း အစားထိုး ေလာင္စာ ထုတ္လုပ္ေရး) tawh kipawl khawm in sem khia ding uh hi. Valvum pen nasep kipat cilna hi in tua mun pan in amanh khit uh teh Zogam sung mun tuam tuam ah pai kawikawi ding in gel uh hi.

 

Singkung peuh mah Japan te'n mawk Phukding leh Mawk hal tumding deih peuhmah lo cih kiza hi. A hiang te hoihtak aa heuh sitset ding a ama liamna te zaatui hoihtak tawh nuh in' kepcing ding leh khansuah ding mihingzah in ngaihsun a, bawl puahphat ding ci ngeu uh cihi. Tuni zing sang lian in, Zogam kumpi ten nasep theihna phalna Lai apiak uh Valvum khua Hausa zum tung ta cih ki za tahi. A thu thei cian nuam ten Japan pa min - Hideyukiku Jurisu hi in Company min pen - Kisyu Nenryo Com.Ltd ahihi. Na hopih nop leh Ph-073-452-7626 Fax - 073-456-3156 ah athu kidawp thei ta ding ahihi. Azenzen in Phone line leh Fax line pen Myanmar gamsung ah' lemtang pahpah lo thei hi.

 

B. Tourist ten Zogam ah' Suang manpha tamsa mahmah.

Zomi te in Suang manpha akicih teh Gold, Diamond bek sakha pahpah ihihi. Kumpi kikhel zawh Zogam ah khualzin minthang leitung muntuamtuam pan hong paita uh hi. Zogam hongzin tourist khualzin mi pawlkhat te in a paipaina lampi kim ah Suang te enen uh cihi. Khuasung ah atun uh teh singtawh kilam inn bekbek amuh uh teh lamdang sa uh cihi. Lampi kim ah aom suang amuh te pen, inn in akilam thei vive khuam in akiphut thei, sual in akidawh thei, Lampi bawl nading in ahoih mahmah suang vive hi a, akizat loh pen lamdang sa uh cihi.

 

Agen kik na uh ah amau gamte ah hihbang suanghoih te leisung leh mualpi toto in la uh a, inn kilam uh cihi. Zogam ahi leh leisung tawh kulnailo in innhoih lamh nading apua lamah suangcip hoih nono pusuah zihziah aa, suanghoih nono tamsa mahmah uh cihi. (Ei bel Zogam suang manphatna ipilna in ban nailo na higige hi.)

 

C.Khedap khuina sumlut tawmlo' kivaak zolo Gui awk ziau'

Kawlgam democracy dinmun kalsuan mahmah hun laitak Yangon Takeetah myonee, Manpee veng ah kum 35 apha khin Mg Aung Myo Thu in khedap khui nasep' asep tawh kikhuasa zolo in 2014 June 17 ni zingalam daak 5:00am hun pawl in ainn sungzawlpeek 8ft sang na ah lungkia in gui awk miau cih Yangon Takeetah palik in thu tangko khia hi.

 

D. Malaysia ah hongpai te daak 24 sung aki kan kei leh Ciahkik.

Malaysia ah Myanmar gampan in nasem ding hongpai te Agent in daak 24 sung in KLIA, LCCT airport ah akan apui man kei leh ciah kik sak ding cihi. Tulaitak in Thaigam leilam pai hoih lo in vanlam vive kizui ci hi. Abeisa in Leilamzui mipawl khat te Malaysia gam Cameron High land mehteh mehgah ci'in na , mun lam ah' kipuak thei a, Chin State Simhlam- Kanpetlet' Paletwa lam om mi Agent kiang tungthei cihi. Tua Agent in KL puak nuam ngei mahmahlo in amite Rm 4500 aloh kik masiahsiah Cameron hightland ah aleiba aloh kik khitdong nasemsak cih thu om hi. Kidawm ni!

 

F. U Ye Htut sangkah na Khandii sang angei na bang in omlai.

Myanmar kumpi thu a kisam bangbang agen ziahziah thei Minister U Ye Htut in aneu lai hun a, Khandii ( Naga minam omna) Sagaing region ah asiamsin na sang tudong kipuah nailo in angeina bang in om lai cih ama facebook time line ah gelh koih ta ngiau hi. Khantoh na zong alek amak mai hi.

 

G. Saizang khua Tansawm sang athu in honna kibawl.

Na khempeuh ah athu masa himah ahihi. Zogam sung Saizang khua tansawm sang hon nakinei a, a hihhang athu hipan kici hi. Kumpi pan in sangthak lamh nading leh laihilh ding sangsia akicing omnailo koihnailo ban ah Sang sia te om nading innzong kilamsak nailo cih kiza hi.

 

Hau Thang

 


Comments




Leave a Reply