WWW.TUNGZANGNEWS.COM

 
Amasa in Zolai ah awsuah tawh kigelh ahih loh ziakin, laimal telhak pawlkhat aom khak leh laigual tungtawn in nong khiatsak dinguh zaktakna lianpi tawh hongthum masa ing. Laigelh mi khat kahih manin, asimte adingin Topa Zeisu' dawnkhak tuikha dawn nabat dinguh kapatau mahmah hi.
1) Aki lekkim2) Aki leekkim 3) Akileekkim4) A kileek kim5) A kilek kim  Hih atunga tengbang pen laigual omlo in, kammal khat bek in khia hilehang, khiat hak simsim hi. Bang pau, banglai ahi zongin, laigual tungtawn in akitel laimal om a, malkhat lian a kitel sinsen laimal  zong na om veve ahih manin, laigual ensuk in ih khiatsuk ding uh zahtakna lianpi tawh hongthum masa nuam ing.
Kei' mimal muhna ah awsuah tawh kineh theizah tawpin gelh huai kasa ngei hi. Tua dan gelhzia pen anuai ah tawmkhat ciamvat lehang,
1) Zoomi2) Zoogam 3) gaam (liautuak)4) Cing (Tui cing, kicing) 5) Ciing (Ta ciing, Lo ah khaituh)6) Cingg (Lo cingg khat) 7) leek (khuaval, leekkim)
Hih atunga laimal pawlkhat ih et ciangin, Zolai bek hilo, leitungah lai khempeuh ah awsuah tawh kigelh kimkhin thei hetlo mawk ahih manin, mipil tingteng ten Liguistics ci-in, laimal le awsuah khenna bekbek tawh kisai University thupite ah major khat in nei ngiat uh a, ei Zomi sungah anuai abangin ki om hi. Adangzong omlai hi.
1) Rev. Khoi Lam Thang, M.A (Linguistics) 2) Sia Dal Sian Pau, Ph.D (Linguistics) Candidate
Yangon University ah English major ngiat tawh sangkah te inzong, Linguistics tawh kisai pen subject khat in sinkha uh hi, cih Tg. Zam Sian Sum, B.A., Dep.Ed., M.A (English) inzong hong gencian hi. Adang University pan English major tawh sang zo tenzong Linguistics tawh kisai basically inbel sin veve dingin um ing.
Bangbang ahi zongin, laimal zatzia tawh kisai pen double/single vowel lianah laigual ensuk lehang adeihna kitel pah ahih manin, hih tawh kisai in Linguistics lamah mipil ten double vowel tamzat loh ding lim gen uh ahih manin, single vowel vive zatna lamah hong hanciam hizaw ing.
Aki Lekkim Ngaihsutna pan Aki banglo Ngaihsutnate Pomsiamna:
 Mipil tampi in agentheih zelzel uh kammal khat om a, hoih kasak mahmah thunih pen anuai a bang ahihi.
1) Unity is not uniformity (Kimpum khatna cih pen kibatna hilo)
2) Diversity in unity (Kipum khatna sungah kibat lohna teng kizepna)
Tua hi-in leitungah mipil pen ci-a kigente inzong, ahun le amun zui-in ngaihsut khialhna mun nei veve thei uh a, mipil lua a minthang khollo te peuh in ngaihsutna hoih mahmah nei theizaw thei uhhi. Atawntung bel hisamlo in, khat veivei cihna hi. Atamzaw inbel mipil a kigente mah in thu khinkhai thei zaw hamtang uhhi.
Leitung ah mihingte khat le khat kitel khialhna, gal le sa a kineihna, kimuh dahna le huatna hong piangsak thu pen aki banglo ngaihsutnate pomsiamna aom loh man ahihi. Tua ahih manin, aki banglo ngaihsutnate' sungah thang bangin ki-awk cip hi. Tua ziakin, suahtakna dik mihing ten kinei zolo hilel hi.
Gam le lei, minam, biakna vai leh mimal vai mahmah ah khat le khat ngaihsutna leh muhna, thuakna leh phut khakna, panmun le dinmun cihte kibanglo ahih manin, kitel khialhna hong piang hi. Tua kitel khialhna pan ih suahtak theihna dingin, aki banglo ngaihsutnate khat le khat kipomsiam ding kisam kasa hi.
Hih kipom siamna hong pianzawh nadingin aki lekkim ngaihsutna mah neih masak hongkul dinghi. Aki lekkim ngaihsutna nei nailo in, aki banglo ngaihsutnate kipom siam theilo a, kei pawl, kei dan, kei bang, kei beh, kei khua, kei minam, kei, kei, kei, kei, kei cih bekbek tawh ngalulok bangin awlmawh kineilo hi.
Minam vai:
Leitungbup ah minam tul tampi om a, tua sungah Zomi kici zong minam khat in ih kihel hi. Zomi in Zo Ngeina nei a, Zolai, Zopau kinei hi. Zolai, Zopau tawh Zomite in ankuang umkhop zawhna dinmun kitung zo nailo ahih manin, Burmese, Hindi, Chinese, English cihte theih hongkul hi. Malaysia bangah Malay pau kisam zawlai hi.
Adiak in, Myanmar ah pilna tawh ankuang umte adingin, Burmese kiciantak siamkul a, USA, UK, Germany, Italy, Australia, Japan, Singapore le gam thupi tuamtuam ah pilna tawh ankuang umte adingin, English siamloh hong phamawh hi. Hih munah "kei pau" cih bek tawh hong pianglo hi.
 Tua banah Zomi sung bekbek iki et ciangin, awsuah tuamtuam tawh ki deidanna pen kipom siamlohna hi a, eima' awsuah tek tawh amun le ahun zui-a izat ipau zong khialhna omlo hi. Tua sungah aneituam aom hetlo Tedim kam le Tedim lai pen adiak in kawlgam sunga om Zomite in kizang phadiak hi.
Sihzang le Zo inzong amau awsuah ngiat tawh Lai Siangtho tei uh a, amau lungkimna leh amau lungnopna ahih manin, Tedim kampau Zomi atamzaw ten Zomi sung panin puapaih pah ding hilo hi. Amau le amau zong Zomi mah nakici veve uhhi. Hibanga awsuah ultunsak luatna zong ahang tampi om dinghi.
Sia Dal Sian Pau in Tedim Khuapi ah kibawl GZA khawmpi ah agenna khat hoih kasa mahmah hi. Tua pen, "hunkhat lai in, India gamah Zomite awsuah zui-in, minam naki khen uhhi. Khangthak sungah kipum khatna le thumuhna tangzai semsem in, kigawm khawm theita ung. Lai lamah zong tuzawh kum 30 ciang bangin kigawm kik zo dingin gelna nei ung," ci hi.
Aki banglo ngaihsutnate pomsiamna in kipum khatna hong piansak nadingin, aki lekkim ngaihsutna neih kul a, aki lekkim ngaihsutna in kitel siamna hong guan hi. Kitel siamna in muh dahna thang pan suahtakna hong pia a, suahtakna man taktak icih sungah itna adim in om hi. Tua itna in deihsakna, nek ngaihna, huhnopna, panpih nopna, hotkhiat nopnate hong guan hi.
Biakna vai:
I Zogam ah Christian biakna hongtun ma in, Lawki ci-in dawi biakna tawh kikhuasa a, ipomzia ahih manin, ki um mahmah tek a, dawithoih siampute' cihcih in kita hi. Myanmar ah Budish upna atamzaw in kizui hinapi, Zogam le Zomite hong ukcip nuam pen Kawlte ahih manin, Kawlte' nungzuih ding pen alotheilo munte lobuangah kizui nuamlo ahih manin, Zomite Budish ah kilut vetlo hi.
Thukhualna leh deihsakna lianpi tawh amau upbang umkhawm, nekhawm, dawnkhawm, nuamsakhawm, genthei khawm dingin veina tak tawh USA gam panin, Mikang Missionary te hongpai uh a, I gam sungah amau metna ding om hetlo in, hun le vai, sum le pai, tha le ngal suplawh bailawh sihlawh dingin Zomite' lakah hong gamtang uh ahih manin, Zomite in kimuang mahmah a, kizui hi.
Hih pen ei mimal pomzia khat hipah hi. Tua sungah Baptist makaite' kipiak khiatna ahatna munah Baptist pawlpi mi khang hi. RC makaite' kipiak khiatna ahatna munah RC pawlpi hongkhang hi. AG makaite' kipiak khiatna ahatna munah AG pawlpi hongkhang hi. SDA makaite' kipiak khiat zawhna le thahatna munah SDA pawlpi khanghi. UPC makaite' kipiak khiatzawhna le athahatna munah UPC pawlpi hongkhang hi.
A taktak in, Budish ten Zomi le Zogam hong ukcip selo in, ei le ei ki ukna tawh khut kilen in, itna vilvel tawh biakna thu hongsung uh hileh Zogambup Budish ih suah khit namel kitheilo hi. Tua mah bangin, tulaitak ih Zomi le Zogam sungah Pu Pau Cin Hau mangmuhna tungtawn a upna kiplet Laipian le Siangsawn zong tampi mah ki om hi. Hih upna le biakna ih cihte pen muhna le zakna tungtawn a kizui ahih manin, khat le khat kipom siamtekna tawh Zomite gualzawhna lamah galkah tading hihang.
Gam vai:
Gam vai pen Leitungbup in alotheilo a kibuaipih thu khat hong hizel hi. Gam khat le gam khat pen amau muntek ah buaikhop tek uhhi. Gam pawlkhat te ah minam vai in buai a, gam pawlkhatte ah biakna vai in buai uhhi. Zomi tampite' tenna Myanmar ih et ciangin, ih buaina pi penin anuai abang ahihi.
1) I gam ah nekkhop ding kumpi in vaihawm theilo,
2) A vaihawm theilo kumpi in ukna lencip nuam,
3) Minamte in amau mun le mualtek uk nuam.
Kumpite pen a gensia nuam masa hetlo pawl a kihel khat kahihi. Tua banah Lai Siangtho mahmah inzong "hong uk kumpite' thu namang un!" ci hi. Tua ahih manin kumpite pen gensia nuamlo le alangpan nuamlo hi ing. Ahi zongin, gensiatna cih ciangin, ahoih pipi asia a gen cihna hi a, Myanmar kumpi pen phat nading tampi omlo citciat ahih manin, a gensia ihi keizaw a, ahibang agen ihihi.
Hunkhat lai-in, Leitungbup gam tuamtuamte thauvui thautang tawh kikap kido in, azozo in ukna nei a, tua hunlai in, Japan, Germany, British, France, Rusia leh gam thupi thahat ten gam neuneute simin azawh uh ciangin ukcip uhhi. Tua hun mapek tangtawng thu ensuk suk lehang, Israel le Egypt khawngte zong nakpitak in nabuai toto uh a, gam vai pen leitungbup gam khempeuh in kibuaipih tek hi.
Japante honglut in, Japante in Myanmar hong uk laitak un, kithuak lah mahmah a, ei thabek tawh pianglo ding ahih ciangin, British Empire tawh mapang khawmin nilkhia ding ci-in, tua hunlai a gamngak makaipi Boyoke Aungsan in Mikang kumpite tungah huh ngetna hongnei hi. Tua dungzui in, British te in Janpante hongdo toto in hongzo uhhi.
British ten hongzawh tak uh ciangin, Myanmar gambup ukna honglen uh a, ei le ei ih mun ih mual tek ki-ukna tawh gam sung hong len uhhi. Leitung khuahun hong kikhel toto in, "thauvui thautang tawh mihingte' kidona pen mihing vai hetlo ahihna thu hong mukhia uh a, "Leitungbup mi khempeuh sihna lamah kimakaih lo in, nuntakna lampi ah ki makaih ding," ci-in, UNO (United Nations Organization) hong kiphuankhia hi.
Leitungah gam khat peuhpeuh gamkhat a adin theih nadingin, milip leh minam vai tuamtuam kisam ahih manin, Myanmar ah minam anuai ateng gamkhat a dinkhop theih dingin, gelna hong nei uh a, Mikang kumpi tungah suahtakna hong ngen uhhi. Tua banga gamkhat dinkhop nadingin, anuai atengin akibangin Myanmar ah ukna neikhawm, nekhawm, dawnkhawm, hawmkhawm, gelkhawm dingin, thuciamna "Panglong Agreement" hongnei uhhi.
1) Kachin2) Kayar 3) Kayin4) Chin (Zomi)5) Mon 6) Burmese (Kawlte)7) Arakhine  8) Shan
Hih atunga thuciamna hoih mahmah atangtun dektak hunlaitak in, vaihawm makai tengin thahna hongtuak uh a, tuate' sung panin, Dr. Vum Khua Hau bekbek suakta hi. 
 ZCD (Zomi Congress for Democracy)
Hunkhat lai-in, ZNC (Zomi National Congress) tawh mainawt ahi, Zomi Party pen hun hong kikhel toh ciangin, National hong sansak lo miau uh a, Zomi naleng omlo hong cihsan lai uhhi.
Tua ciangin, ih gamsungah mipil taktak ahihna hong kilangkhia Prof. C. Thang Za Tuan, Ph.D (Deputy Director General, Ministry of Education, Union of Myanmar) tungah ZCD tanute in huhna hong ngen uh a, aman zong Zomi ihihna kiciantak in kumpipa U Thein Sien tungah akisam bangin lai hongkhiat ciangin, U Tein Sein zong hong kisuang kik peuhmah bilbel in ZCD makaipi Pu Cin Sian Thang tungah Zomi omlo kongcih khak mawk uh khial ung, hong maisak un, ci-in na thumkik hi.
Kacih nopna ah,
1) Panglong Agreement nelhsiah in Kawlte in hong ukcipna pen ZCD in pilna tawh law om bangin, Party lampi tawnin kalsuan in mainawt uh ahih manin, Party tawh mapanna zong Zomibup in ihuh zo keizongin pomsiam tek ni.
2) Zomi omlo hong cihsan lai un, Myanmar ah kumpi sung nasepna ah zalian, mipil Dr. C. Thang Za Tuan pen minam adingin alotheilo munah nakpitak in hong gamtang veve ahihna hih munah kimu thei hi. Tua ahih manin, kitel khialhna thang panin Zomite suahtak hunta hi.
GZA (Global Zomi Alliance)
I minam hongzun dingin kipawlna kician ahihna Census ah nasiatak in kimu thei hi. GZA Central makaipi Rev. S. Pau Khan En, Thuzekpi Rev. Do Suan Mung, Thuzekpi huh Rev. Go Cin Zam, Member Rev. Gin Khan Khual te Census ah nakpitak in minam ading alotheilo munte ah hongdiang khia uhhi.
LZI (Leitungbup Zomi Innkuan)
I minam adingin, vaihawmna khempeuh ah sumtha tawh mapang, khua-ul kai lianga minam itna tawh gamtang LZI makaite zong nak thupi lua hi. Asawtlo in Tedim khuapi ah Radio Station zong LZI in honglam dinghi.
WZC (World Zomi Congress)
Zomite mailam ding akhualna tawh mat le hen thuak in minam ading akipumpiak Pu Cin Sian Thang omna ding Yangon khuapi sungah kumkhat sungbang hong sapsak ngei pen WZC te hi. 
Zogam sunga neihsa lianpente sungah kihel Gullu mual hongtawh mangsak sawm lai un, Leitungbup in akihtak mahmahna mun, Washangtan DC ah lungphona anei ziahziah pen WZC te mah hi.
Sanggam Kachin minamte haksat luat laitak in Zomibup aidinga diangkhia a US$ 13,000 valbang panpihna apia WZC te mah hi.   ZRO/ZRA (Zomi Reunification Organization)
India gamah Zomi sung buaina lianpi hong phelh, minam hongzun, minam hong kipum khatsak pen ZRO mah hi. Banghang in thupi lo ding ahi hiam?
Thukhupna:
 Amun mun, aphual phual ah kipawlna khempeuh amau munzui in, akisam vive hi a, khat le khat kalsuanzia le ngaihsutzia ciat ih kitel siamna tawh kipomsiam ding kisam mahmah hi. Tua hileh minam sungah kipawlna, biakna le vai tuamtuam ah kipum khatna tawh mai ih nawtto zo hanhan dinghi.   Tua banah hih atunga kipawlna teng pen kipawlna lian mahmah teng hong pulak kahi a, tualo Zomi sungah kipawlna khempeuh zong amau mun leh amau sanciat ah akisam le thupi vive ahihi. Khat le khat kipomsiamna tawh mainawt, mainawt, mainawt Zomite tungah daupaina leh gualzawhna hongtung kim ciat tahen!
Dal Sian HungKuala Lumpur, Malaysia.
 


Comments




Leave a Reply