WWW.TUNGZANGNEWS.COM

 

 
Minam leh gam khantoh nang: Banghang pilna, siamna kisam

 
Gamkhat minam khat a khantoh na ding, a hauhna ding leh democracy ki-ukna tawh phungcing takin nuntak theihna ding in a kisam tuamtuam lakpan in pilna siamna pen a thupi leh a kisam khat in kihel hi. Abeisa hun in tha leh ngal hat man tawh gual kizo a, tuhun takteh, pilna leh siamna in gualzawh hong piata hi. Gam khangto khempeuh leh a khangto ding gam khempeuh te pen mipil misiam tampi omna gam te hi pah a, siam sinna “education” zong a thupi bawl gamte mah hong hi pah uhhi.

 


 
Kawlgam ah tukum 2014 June kha nipi masa sung in, laisin sangnaupang tansawm (grade 10) results hong kisuak sakkhia hi. Zomi te khat leh nih a lamdang in results hoih pipi tawh gualzawh na hong ngah hang in, a tam zaw pen tansawm kizo zolo hi. Tedim, Tonzang, Cikha cih khuapi te ah laisin khempeuh lakpan in pasen sawm (10%) zong agual zolo dinmun kihi hi. Tua bang ahih man in, Zomi leh Zogam mailam pen a lungkham huai leh a khasiat huai mahmah ahih lam kilang mahmah hi.

 

Kawlgam a om, laisin sangnaupang te in tansawm laihuan (exams) pen hamsa a sak mahmah khat a hihi. Hi bang in hamsa a kisak na pen laisiam loh man, thadah man zong hi khin lo a, kumpi a ginat loh man, siamsinna tha apiak loh man leh ki-ukna a hoih loh man hi zaw hi. Nidang pek a kipan in, kawlgam a uk galkap makai te in mite te a pil, a siam ding uh deihlo uhhi. Galkap makai te lau penpen in mipil misiam te hi. Tua huhau in, tuni dong mah Kawlgam education system (policy) pen leitung ah a diklo pen/ asia pen lak pan in “top ten” sung ah khat in kihel ding hi.

 

Abeisa hun lai in, siamsinna thupi bawllo lua kisa - education budget ding na leng zong 2-3% bek ki zang hi. Tua budget sung na leng pan in, guuk nekna tuamtuam leh makai te zattawm ding tuamtuam te hang in, sang laisin na ding leh sangnaupang te khantoh na ding in a gina in bangmah kizang lohi.

 

Gentehna in khuano pawlkhat te bang ah a kisam mahmah sanginn lam na ding sum teng pen makai te zattawm ding sum suak khin mang hi. Tuaban ah sang a om sunsun te na leng zong pilna siamna hoihtak in sin theih nang a kisam van a kicing in bangmah om zolo lai hi. Laikung, laidal a kipan, tutna, sabuai (desks) na leng akim in kingah zolo lai hi. Sanginn a ding in a kisam furniture, tutna sabuai te leh a dang tuamtuam te pen kumpi sik ding a hi kimlai, kicing zolo a hih man in sangnaupang te tung ah sum ngen beh lai hi. Furniture leinang sum, sport bawlnang sum cih bang in piak tamsim sim a hih man, sang a kah zolo naupang kitam mahmah hi. A taktak ci leng, hi te pen kumpi sikding vive hi.

 

A thu in ah, naupang khempeuh laithei khin ding, pilna pen a khawnkhong hi ding in ci in policy a neih dep uh hang in, hi bang in sangsum tuamtuam piakding tamlua a hih man in sangkah zolo naupang tampi tak zong omhi. Zawnna leh hamsat na tuamtuam hang in, abeisa hun lai in sangnaupang vekpi lak pan 30% bang in primary sangzom suak zolo in khol uhhi ci-in Ministry of Education (2007) in ciam tehhi. Tua ban ah khuano pawlkhat te ah primary sang bek om in, middle a hih kei leh high school omlo a hih man in a zom suak zolo zong tampi om lai hi.

 

Tua ban ah, adang poimawh mahmah khat ah, laihilh siam sangsia a kicing in omlo hi. Kumpi ten khasum a kicing in piazo lo ban ah, a tam zaw pen nasep ngah baih man leh adang sepding a omloh man in sangsia a sem hi a, qualified man leh uk man hi khin lo hi. Laihilh dan mahmah te zong sangnaupang ten telmaw, tel-lo maw cih te sang in, vaipuak a hih man in a hilh tam zaw hi. Tua ban ah, sangsia te pen teaching techniques te a hunhun in sinna ding training ki pia zolo a hih man in, laihilh dan method te mahmah zong luikhin lua (outdated) in muibun zo (ineffective) nawn lo hi.

 

A phadiak in Kawlgam makai te in siamsinna a thupit sak loh dan pen education budget ding in kum sim in bangzah zang cih tawh ki en kak thei pen hi. Kawlgam nidang in siamsinna ding budget pen 2-3% bek zang uh a, 2010 khitciang in 4-6% kikal ah tawmkhat hong khanto uhhi. Galkap leh galkap van leina ding in, budget a tam zaw zang khin uhhi. Tuabang hi mawk a hih man in, Kawlgam pen a khantoh hetlo mah ding hi, cih telcian tak in kimu thei hi.

 

Gamkhangto te in siamsinna pen thupi bawl mahmah uh a, budget zong tampipi zang uhhi. Gentehna en pak leng, Kawlgam tawh a ki vengta Thailand, Malaysia, Singapore cihte a khantoh na pen siamsinna a na thupit bawl mahmah man uhhi.

 

A nuai ah ‘education budget’ bangzah ta zang uh cih en kak le-hang, kilang pen ding hi. Education budget pen 2014 tungtawn in etkak na hi a, GDP per capita pen 2013 tungtawn hi.

 

Gam min

Education (% budget vekpi)

GDP per capita (US$)
(mimal khat kumsum)

Singapore

20% (rounding)

52,052

Malaysia

21%

10,432

Thailand

21%

5,480

Burma

6%

380 (approximated)

Source: World Bank

A tung a budget en le hang, kuagam te in pilna thupi sak, thupi saklo cih kilang mahmah hi. A thupi sak gamte mah hong khangto zaw pah in, mimal khat in a khasum ngah zong hong tamzaw in hauzaw pah hi. Singapore, Malaysia leh Thailand te in a budget khempeuh lak pan 20% val vive pen education ah zang ciat uh a, siamsinna thupi bawl mahmah uhhi. Singapore pen tuni in education lam ah leitung in a ki zahtak mahmah a hihi. Mipil misiam zong tam mahmah a, hauhna, khantohna leh ki-ukna te zong hoih zaw pah hi. Tua mah bang in Malaysia te zong siamsinna lam a khantohna a hanciam san mahmah laitak hi a, hong tung ding kum 15 sung in world-class education a piakzawh na ding ngimna nasia takin nei uhhi. Malaysia gam makai pipa in a gen na ah “mihing nuntak na khat peuhpeuh pen pilna siamna tawh a kithuah khop kei leh a sawtlo in maimang thei ding hi” ci in, thupi takin genhi. Tuamah bang in, Thai te zong ahi ciang khat in khantohna leh hauhna nei uhhi.

 

Tualakpan in pilna siamna a thupi saklo Kawlgam pen a khangto lo penpen leh ki-ukna a hoihlo penpen, gamsung a buai den penpen dinmun ah om hi.

 

Kum 2010 khit, kawlgam ki-uk zia a hoihlam ah hong kikhel tawh kizui in gamdang tuamtuam pan in business bawlding in companies tuamtuam te hong lut khin uhhi. Hong lutnuam pawlkhat zong om lai hi. Nasep theih na ding (employment opportunity) hong tam tuam mahmah dinghi. Ahizong in a kisam pilna, siamna nei tuan kei lehang, panmun hoih nono, zalian, zanei dinmun kisam thei tuanlo ding a, thagui thatang mah tawh nasep hong kul lai veve ding hi. Gam khangto semsem leh nasem ding mipil misiam tampi kisam semsem ding hi. Tu tadih in, Zomi te sung ah skilled job a sem thei ding kitawm lai mahmah ding hi.

 

Kawlgam hi ta leh, Zogam hita leh khangtoh na ding leh mailam asau pi a ding in, pilna, siamsinna kisam pha mahmah lai hi. Sepding bawlding tampi om lai a hih man in, a thak in thapia in panpih ding kisam mahmah lai hi.

 

(a ban zop lai ding)

by C.S. Dal
Policy Analyst, Department for Education, British Government

 


Comments

03/08/2017 03:11

We know Iran is one of the principle Muslim nation that is exceptionally dynamic yet i trust they won't confront issues of common wars like Syria and Iraq. Since this is truly harmful for nation at any rate i hope that slaughtering of those Kurdish rabbles.

Reply



Leave a Reply