WWW.TUNGZANGNEWS.COM

 


 Dr Mang Khan Cing @ Bianca in Hanmual hong zuatsan ta

 

Sanggam nu Dr Mang Khan Cing @ Dr Bianca Son luanghawm in tuni zingsang in hanmual hong zuatsan ta hi. A luanghawm pen London khuapi sung ah om Honor Oak Park Crematorium ah tuni 07/07/2014 zingsang 10:00am in sihvui na leh mangpha khakna hun kineih pih theih hi.

Sigal nuam, hankha nuam tampi om hi mah te leh inntek lampan in na mau geelna tawh kizui in, a mau naihuai innkuan pih teng leh a it a ngaih a lawmteng tawm khat ah hun bawlna ki nei khawm thei hi.

Dr Mang Khan Cing pen Zomi a it mahmah Zolia vontawi kician mahmah khat hi a, a nuntak sung tawntung, hong nusiat dong mah Zomi leh Zomi te khantoh na ding tawh a man lah den in, nasem khat ahihi. Zomi te sung ah khantohna a om na ding, pilna leh nasep khopna a om theih na ding in a hanciam mahmah khat hi.

A mau lunggulhna leh nasepna te pen a Pa Dr. Vumson in tampi tak in na influence kha hi ding hi. Nidang in USA ah a omlai in a mau inn ah Zomi (Chin) refugees te tampi tak a mau inn ah tung zeel uh a, a hi zong in, a vekpi un Chin kici ngeingai uhhi ci hi. A nung kankan leh a theih theih teh avekpi un Khakhal lam vive pan hong pai a hih lam thei kik pan hi.

Tua tawh kizom in Khalkha lam te in Zomi sung ah a mauteng bek a ki ui-tui bawlna uh leh a mauteng bek in Chin cih min tawh hamphat na khempeuh a lak sawm lam uh, thei khia hi. Hi thu tawh kisai in University of Amsterdam ah MA a sinsung in a master's dissertation ding in limtak in ciapteh na zong na bawl hi.

Tua tawh kizom kawm leh a Pa patsa Zo tangthu a diktak in a zawhzawh nang hanciam tak in na hongsem a, 2008 kum ciang in University of London, School of Oriental and African Studies (SOAS) pan in PhD sin theih na in hong ngah hi. A PhD thesis ding in 'the making of the Zo: the Chin of Burma, the Lushai and Kuki of India through Colonials and local narratives, 1826-1988' cih thubulpi tawh research deihtak in hong bawl khia hi. A research a bulpi in Bangladesh, India leh Burma gamgi a om minam teng khempeuh a min taktak pen Zomi cih kician tak hong hong mukhia hi. A ma genna ah 'Chin' cih min pen ka research tawh 'that' zo (killed) khin ing ci hi.

Zomi sung ah a kibuai mahmah a hi, Chin maw, Zo cih pen ei a dang te lungkham kulpeuh mah lo in kician tak hong ciapteh sak khin zo hi.

A nungta lai hi leh a sepnop a bawlnop, a patsa zong tampi om khin hi a, a hi zong in lam et het loh pi leh a hun a pha tunglo pipi in hibang in hong nusiat na pen a mau innkuan bek hi lo, Zomi khempeuh in zong a suploh mahmah hi lam hong phawk sak semsem hi.

Zomi sung ah Zovontawi liapal hoih mahmah khat a sum khin hi hang.

Zomi sung ah
CS Dal

 


Comments




Leave a Reply